حکومت لوکائی دی حفاظت لئی ویکسین دی فراہمی دے عمل نُوں تیز کرے: شہبا ز شریف ……٭رویل خبر٭

اسلام آباد (نیوز ڈیسک) پاکستان مسلم لیگ (ن) دے صدر تے قائد حزب اختلاف شہبا ز شریف نے ملک وچ آکسیجن دی تھوڑ وچ وادھے تے کرونا صورتحال اُتے تشویش دا اظہار کیتا اے۔ اپنے اِک بیان وچ اوہناں نے کہیا کہ بھارت ورگی بدقسمتی توں بچن لئی سارے فریقین دی مشاورت نال جامع ہنگامی حکمت عملی مرتب کیتی جاوے۔ اوہناں نے کہیا کہ وایرس دیاں نویاں قسماں تے ایہدے مہلک اثرات توں لوکائی نُوں بچان لئی حکمت عملی نُوں بہتر بنان اُتے توجا دِتی جاوے۔ اوہناں نے کہیا کہ ساڈے دور وچ ڈینگی وباء نال نبڑن لئی وضع کیتی گئی کامیاب حکمت عملی دا ماڈل استعمال کیتا جا سکدا اے۔ اوہناں نے کہیا کہ حکومت لوکائی دی حفاظت لئی ویکسین دی فراہمی دے عمل نُوں تیز کرے ایہدے لئی نجی شعبے دی مدد لئی جا سکدی اے۔ اوہناں نے کہیا کہ کرونا دے موجودا مرحلے وچ ہور کسے قسم دا ابہام‘ شش و پنج یاں لیت و لعل ہلاکت خیز غلطی ثابت ہووے گی۔ اوہناں نے کہیا کہ پچھلے مہینیاں تے سال دے تجربیاں توں ایہو نتیجا ساہمنے آیا اے کہ کرونا اُتے قابو پان دا کلّا راہ ودھ توں ودھ لوکاں نُوں چھیتی توں چھیتی ویکسین لانا اے۔ اوہناں نے کہیا کہ ایہ مجرمانا غفلت اے کہ حکومت نے مطلوبا ماترا وچ ویکسین دی خریداری لئی ویلے سر اقدامات نہیں کیتے‘ ایس مجرمانا غفلت دے نتیجے وچ کرونا اج ایس حد تک ملک وچ کھلر گیا اے۔ اوناں نے کہیا کہ قوم توں اپیل کردا آں کہ کرونا احتیاطی تدبیراں اُتے عمل کر کے ایس خطرناک وباء دے خاتمے وچ حکومتی اداریاں دا ساتھ دین۔ اوہناں نے کہیا کہ حکومت عقل مندی دا مظاہرا کردیاں ہویاں بلدیاتی اداریا ں نُوں فعال کر ے تے کرونا وباء نال نبڑن وچ ایس ادارے تے ایہدے نمایندیاں توں مدد لوے۔