kraamaat@gmail.com
+ +92 333-430-6384


آکسیجن دا بحران پیدا نہیں ہویا،لوکائی نوں آپ وی سنجیدا ہونا پے گا ہر کم ڈنڈے نال نہیں کروانا چاہندے:فواد چودھری……٭رویل خبر٭


نمائندا رویل April 28, 2021


اسلام آباد (نیوز ڈیسک) وفاقی وزیر اطلاعات و نشریات فواد چودھری نے کہیا اے کہ کوشش اے کہ لاک ڈاؤن ول نہ جانا پوے تے عید دیاں 5 چھٹیاں دِتیاں جا رہیاں نیں۔ منگل نُوں وزیراعظم دی صدارت ہیٹھ وفاقی کابینا دے اجلاس بعد میڈیا نُوں بریفنگ دیندیاں ہویاں فواد چودھری نے کہیا کہ حکومت اینی سنجیدا اے کہ اسیں خیبر پختونخوا وچ اپنے وزیر دے اُتے ایف آئی آر کروا دِتی‘ ایہ 20 توں 22 کروڑ لوکائی دا ملک اے ایتھے ہر کم ڈنڈے نال نہیں کروا سکدے‘ آپ وی تے عقل کرنی چاہیدی اے‘ ایہ اپنیاں زندگیاں دا معاملا اے۔ اوہناں دا کہنا سی کہ کابینا اجلاس نُوں کرونا دی صورتحال توں ہور اگاہ کیتا گیا۔ کرونا بارے عوامی اگاہی لئی میڈیا دا کرادحوصلا افزا اے۔ ایس ویلے کرونا نال 5 ہزار متاثرین ماڑی حالت وچ نیں‘ ایس توں پہلے پیک 3400 سی یعنی 3400 روگی انتہائی نگہداشت وچ گئے سن ہُن 5 ہزار لوک گئے نیں۔ اوہناں نے کہیا کہ اسیں اِک سال وچ 7 ہزار بیڈز دا وادھا کیتا جہدے وچ آکسیجن تے وینٹی لیٹر بیڈز وی شامل نیں‘ جے ایہ نہیں ہوندا تے ساڈی حالت بھارت ونگوں ہوندی‘ اسیں اِک سال وچ اپنی صلاحیت ڈبل کیتی‘ جے انج نہ کردے ے اج آکسیجن دی حالت وی ساڈے ہتھوں نکل چکی ہوندی۔ آکسیجن دی پیداوار دے حوالے توں اوہناں نے کہیا کہ جون 2020 وچ 484 میٹرک ٹن روزانا بنا رہے ساں تے ایس ویلے 792 میٹرک ٹن بنا رہے آں تے 308 میٹرک ٹن دا وادھا کیتا اے جہدی وجھا توں حالے آکسیجن دا بحران پیدا نہیں ہویا‘ صحت دے شعبے وچ 500 یٹرک ٹن آکسیجن جا رہی اے۔ اوہناں نے کہیا کہ ایس ویلے تشویشناک حالت دے روگیاں دیاں دیاں لوڑاں لئی کافی اے پر اسیں 90 فیصد تک پہنچ گئے آں تے ساڈے 3 آپشنز نیں‘ اِک صنعت توں لے کے صحت دے شعبے نُوں دواں گے فیر چین تے ایران توں آکسیجن درآمد کرن دی گلبات چل رہی اے۔ پاکستان وچ بحران ضرور اے پر افرا تفری نہیں اے تے حالات جس طرحاں اگے جا رہے نیں تے معاملا گھٹ نہ ہویا تے سانوں مسئلے وی ہو سکد ے نیں۔ اوہناں نے کہیا کہ خیبر پختونخوا دی حکومت نے مردان وچ مکمل لاک ڈاؤن کیتا اے جتھے کووڈ دی شرح 40 فیصد دے نیڑے پہنچ گئی اے‘ قریبی شہراں نُوں شدید خطرے لاحق نیں‘ ایس لئی حکومت نے مردان وچ کل مکمل لاک ڈاؤن کر دِتا اے۔ کوشش اے کہ لاک ڈاؤن ول نہ جانا پوے‘ ایس وار عید اُتے 5 چھٹیاں وی کیتیاں جا رہیاں نیں جو رلا کے ایس توں ودھ ہون گیاں پر ایہدا فایدا ہووے گا۔ فواد چودھری دا کہنا سی کہ جہانگیر ترین دے ہم خیال گرُپ نال تعلق رکھن والے ایم این ایز نے وزیراعظم نال ملاقات کیتی اے تے وزیراعظم تک اپنا نکتا نظر پہنچایا اے‘ وزیراعظم نے جہانگیر ترین ہم خیال گرُپ نُوں کہیا اے کہ انصاف دے تقاضے پورے ہون گے‘ اوہناں نے واضح کیتا کہ کسے صورت ایف آئی اے دی تحقیقات اُتے اثر انداز نہیں ہویا جا سکدا تے کسے وی صورت احتساب دا دُہرا معیار نہیں ہو سکدا۔ فواد چودھری دا کہنا سی کہ پی آئی اے دا نقصان گھٹ ہو کے 1 ارب رُپئے اُتے آ گیا اے جو موجودا مینجمنٹ دی وڈی کامیابی اے‘ تجویز اے کہ پی آئی اے نُوں اِک اولڈ تے اِک نیو پی آئی وچ ونڈ دِتا جاوے‘ پچھلی حکومت ن قومی ائر لائن وچ لوڑ توں ودھ بھرتیاں کیتیاں جو بھار بن گیا۔ اوہناں دا ہور کہنا سی کہ پاکستان وچ تقریبن 20 لکھ لوک ویکسین لگوا چکے نیں جد کہ دنیا وچ ویکسین لگوان والیاں دی گنتی 1 ارب تک ہو گئی اے‘ ایس لئی جہڑے تذبذب دا شکار نیں اوہناں نُوں کہواں گا کہ 1 ارب لوکاں نے سمجھیا کہ ایہ محفوظ معاملا اے ایس لئی گھبراؤ نہ تے ویکسین لگواؤ۔ اوہناں نے کہیا کہ اج کابینا گردشی قرضے اُتے بریفنگ ہوئی جہدا مسئلا اے کہ نواز سریف دی پچھلی حکومت نے 50 فیصد ایکسس بجلی پیدا کیتی جہدی سانوں لوڑ نہیں سی‘ ایہدیاں کئی وجھاں سن بدقسمتی نال اوہناں نے 40 توں 50 فیصد بُہتی بجلی دی صلاحیت لائی‘ ایہدے نال ساڈی لازمی ادائیگی 450 ارب توں وددھ کے ایس سال 900 ارب اُتے چلی گئی اے۔ فواد چودری دا کہنا سی کہ 2023 وچ جدوں چوناں دا سال ہووے گا تے بجلی دے چارجز ودھ کے 1500 ارب رُپئے ہون گے یعنی اسیں بجلی استعمال کریے یاں نہ کریے سانوں ادائیگی کرنی پوے گی‘ ایہدی وجھا توں بجلی دے بھاء وچ 11 رُپئے 75 پیسے ودھ کے 16 رُپئے 44 پیسے وادھا ہویا اے۔ اوہناں دا کہنا سی کہ وزیراعظم نے ہدایت کیتی اے کہ ایہو جہے راہ لبھیے جہدے وچ بجلی دی قیمت ودھائے بغیر ایس معاملے دا کوئی حل کڈھ سکیے۔ وفاقی وزیر نے کہیا کہ آندے الیکشن الیکٹرانک ووٹ مشیناں اُتے کروانا چاہندے آں‘ اپوزیشن انتخابی اصلاحات وچ حکومت دے نال مشاورت لئی تیار نہیں لگ رہی‘ اپوزیشن انتخابی اصلاحات بارے اپنا موقف واضح کرے۔