جہانگیر ترین میرے ذاتی دوست تے پارٹی دے اہم آگو نیں‘ انصاف دا تقاضا اے کہ اسیں سارے قانون دے ساہمنے جوابدہ ہوئیے،میرے توں امید رکھو ہر صورت انصاف ہووے گا:عمران خان ……٭رویل خبر٭

اسلام آباد (نیوز ڈیسک) وزیراعظم عمران خان نال ملاقات کرن والے جہانگیر ترین ہم خیال گرُپ نے وزیراعظم توں جوڈیشل کمیشن بنان تے معاون خصوصی شہزاد اکبر نُوں معاملے توں وکھرا کرن دی استدعا کر دِتی پر وزیراعظم نے دوہاں منگاں نُوں رَد کردیاں ہویاں کہیا کہ میرے توں امید رکھو ہر صورت انصاف ہووے گا‘ میری واضح پالیسی اے کہ احتساب دے دوران مخالفین دے نال وی زیادتی نہ ہووے۔ جہانگیر ترین گرُپ دے وفد دی وزیراعظم نال ملاقات دی اندرونی کہانی ساہمنے آئی اے۔ وسیلیاں مطابق راجا ریاض‘ نعمان لنگڑیال‘ عبدالحئی دستی‘ نذیر چوہان نے وزیراعظم نال ملاقات کیتی۔ راجا ریاض نے کہیا کہ وزیراعظم صاحب! جہانگیر ترین صاحب دیاں خدمتاں تہاڈے توں لُکیاں نہیں نیں‘ نذیر چوہان نے کہیا اسیں فیور نہیں منگ رہے‘ چاہندے آں انصاف دے تقاضے پورے ہون‘ انج لگدا اے کہ شہزاد اکبر صاحب دا ٹارگٹ صرف جہانگیر ترین نیں‘ نعمان لنگڑیال دا کہنا سی معاملا کھنڈ دا سی‘ ایہدے وچ کجھ نہیں مِلیا تے ہور کیسز کھول دِتے‘ ارکان نے وزیراعظم نال گلبات کردیاں ہویاں مطالبا کیتا کہ شہزاد اکبر تے اوہناں دی ٹیم نُوں ایس معاملے تو وکھرا کر کے کمیشن توں تحقیقات کرواؤ۔ ارکان نے استدعا کیتی کہ جسٹس ساحر علی‘ تصدق جیلانی تے ناصر الملک دی اگوائی وچ کمیشن بنایا جاوے۔ ایہدے اُتے وزیراعظم عمران خان نے کہیا مینوں چنگا لگا کہ تُسیں اپنے اعتراضات دَسّے۔ وزیراعظم عمران خان نے سوال کیتا تہانوں ساریاں لوکاں نُوں میرے اُتے اعتماد اے؟۔ میری واضح پالیسی اے کہ احتساب دے دوران مخالفین دے نال وی زیادتی نہ ہووے‘ وزیراعظم دا کہنا سی کہ جہانگیر ترین میرے ذاتی دوست تے پارٹی دے اہم آگو نیں‘ انصاف دا تقاضا اے کہ اسیں سارے قانون دے ساہمنے جوابدہ ہوئیے‘ اسیں میرٹ تے انصاف دے مقصد لئی اقتدار وچ آئے آں‘ کھنڈ دی قیمت وچ اچانک اینا وادھا ہویا کہ اسیں پُچھیے وی نہیں؟۔ تُسیں لوک یقین رکھو کسے دے نال نا انصافی نہیں ہووے گی۔ قانون دی اُچیرتا دے بغیر کوئی معاشراترقی نہیں کر سکدا‘ وزیراعظم عمران خان نے کہیا کہ انصاف دا تقاضا اے کہ ساریاں نُوں صفائی دا پورا موقع ملے۔ شہزاد اکبر نُوں کسے نال ذاتی دشمنی نہیں‘ اوہ میرٹ اُتے کم کرر ہے نیں۔ وزیراعظم نال ملاقات بعد میڈیا نال گلبات کردیاں ہویاں راجا ریاض نے کہیا کہ وزیراعظم عمران خان نال چنگے ماحول وچ گلبات ہوئی۔ وزیراعظم دے ساہمنے اپنے دھڑکو تے شکایتاں رکھیاں نیں۔ وزیراعظم دے مشکور آں ساڈیاں گلاں سُنیاں۔ ملاقات وچ وزیراعظم نے ہر صورت انصاف دا یقین دوایا اے کہ کسے نال نا انصافی نہیں ہون دواں گا سوال ای پیدا نہیں ہوندا کہ کسے دے نال نا انصافی ہووے۔ اوہناں نے ہور کہیا کہ شہزاد اکبر دا معاملا وزیراعظم دے علم وچ لیاندا گیا جہدے اُتے وزیراعظم نے کہیا کہ شہزاد اکبر دا معاملا میرے اُتے چھڈ دو‘ میں جہانگیر ترین کیس دی آپ مانیٹرنگ کراں گا۔ اِک سوال دے جواب وچ راجا ریاض نے کہیا کہ وزیراعظم نے مینوں مخاطب کردیاں ہویاں کہ تُسیں میرے سنگی او میں ساریاں دی گل نُوں سناں گا کسے نال نا انصافی نہیں ہووے گی۔ اوہناں نے کہیا کہ وزیراعظم عمران خان دے نال آں۔ جہانگیر ترین دی ہر تاریخ اُتے اوہناں دے نال عدالت جاواں گے‘ امید اے جہانگیر ترین نال انصاف ہووے گا۔ وزیراعظم نے یقین دوایا جہانگیر ترین نُوں انصاف ملیگا‘ ایف آئی اے تحقیقاتی ٹیم اُتے اسلام آباد توں کوئی دباء نہیں پایا جاوے گا۔ ایس موقع اُتے طاہر رندھاوا نے کہیا کہ ادھا تِتر ادھا بٹیر شاہ محمود قریشی آپ اے۔ اساں ازاد 11 امیدواراں دی وجھا توں اج شاہ محمود قریشی وزیر خارجا اے۔ محمود قریشی دے بیان دی مذمت کردے آں۔ محمود قریشی اپنی زبان ٹھیک کرن‘ ہر تھاں شاہ محمود قریشی دا محاسبا کراں گے۔