کرونا دے وار جاری ہور142جاناں لے گیا، پڑھیاراں دے امتحان کینسل، 30 لکھ ویکسین خریدی، تِن کروڑ ویکسین لئی معاہدے  کیتے نیں:اسد عمر……٭رویل خبر٭

اسلام آباد (نیوز ڈیسک) پاکستان سنے پوری دنیا وچ کرونا دی تیجی لہر دے وار جاری‘ کرونا ویایرس نال 142 بندے چلانا کر گئے‘وزارت تعلیم نے پورے ملک وچ 15 جون تک سارے امتحانات ملتوی کرن دا اعلان کر دِتا۔ وزیراعظم دے معاون خصوصی برائے صحت ڈاکٹر فیصل سلطان دے نال پریس کانفرنس کردیاں ہویاں وفاقی وزیر تعلیم شفقت محمود نے کہیا کہ 18 اپریل نُوں اسیں این سی او سی دا جہڑا آخری اجلاسکیتا سی اوہدے وچ فیصلا کیتا گیا سی کہ امتحانات دا سلسلا جاری رکھیا جاوے گا پر ایہدے بعد توں 27 اپریل تک بیماری وچ بہت تیزی نال وادھا ہویا اے اسیں شاید اِک ایہو جہی صورتحال ودھ رہے آں جتھے سانوں بُہتے انفیکشن دے حامل علاقیاں و چ لاک ڈاؤن کرنا پوے‘ ایس لئی اسد عمر دی صدارت ہیٹھ ہون والے این سی او سی دے اجلاس وچ ایہ متفقا فیصلا کیتا گیا اے کہ 15 جون تک کوئی امتحان نہیں ہون گے۔ شفقت محمو د نے کہیا کہ اج توں لے کے 15ج ون تک کوئی امتحان نہیں ہووے گا تے 9 ویں توں 12 ویں جماعت دے جہناں امتحانات نُوں مئی دے آخر وچ شروع ہونا سی‘ اوہناں نُوں ہور ملتوی کر دتا گیا اے تے 15 جون تک کوئی امتحان نہیں ہووے گا۔ اوہناں نے کہیا کہ اسیں حالات دا جایزا لیند ے رہواں گے تے مئی دے ادھ یاں تیجے ہفتے وچ بیماری دا جایزا لے کے فیصلا کیتا جاوے گا کہ ایہناں امتحانات نُوں ہور اگے لے کے جانا اے یاں ایہناں دا اغاز کرنا اے‘ جے 15 جون دے بعد امتحانات ہوندے نیں تے ایہ جولائی توں اگست تک لمے ہو سکدے نیں۔ اوہناں نے کہیا کہ او لیول دے امتحان وی منسوخ کر دِتے گئے نیں جہڑے ہُن اکتوبر‘ نومبر وچ ہون گے تے ایس طرحاں اے ایس دیامتحان وی ہُن اکتوبر نومبر وچ ہون گے۔ جہڑے بچے پاکستان دیاں جامعات وچ جانا چاہندے نیں اوہناں لئی اسیں ایس گل نُوں یقینی بناواں گے کہ جنوری تک ایڈمیشن ہوندے رہن تاں جے بچیاں نُوں ایڈمیشن تے یونیورسٹی جان وچ کوئی مسئلا نہ ہووے۔ ایہ سبھ کرن دے باوجود بچیاں دا اِک ایہو جہیا طبقا رہ جاندا اے‘ جہڑا مختلف مجبوریاں دی وجھا توں جے اوہ ہُن امتحان نہیں دیندے تے فیر اوہناں دا سال ضایع ہوندا اے تے ایہد ے اُتے بہت غور و فکر دے بعد فیصلا کیتا گیا اے کہ اے ٹو اوہ کجھ بچے جہناں دی کوئی مجبوری اے کہ ستمبر توں اگے امتحان نہیں دے سکدے‘ تے اوہناں دی سہولت لئی متفقا طور اُتے فیصلا کیتا گیا اے کہ ایہناں نفُژ چحری ڈیٹ شیٹ جاری ہوئی اے اوہدے مطابق امتحان دین دی سہولت فراہم کیتی جاوے تاں جے ایہناں دا سال ضایع نہ ہووے۔ اوہناں دا کہنا سی کہ پیر دے بعد کسے وی تھاں اُتے 50 توں ودھ لوک نہیں ہون گے‘ ایس لئی اسیں درخاست کیتی اے کہ سکول نُوں وینیو بنایا جاوے یاں موجودا وینیو وچ گنتی گھٹ کر کے 50 تک لیاندی جاوے۔ جتھے وی امتحان ہون گے اوتھے 50 توں ودھ بچے نہیں ہون گیتے ایہدے باہر قانون نافذ کرن والے ادارے تعینات کیتے جان گے تاں جے مجمع اکٹھا نہ ہووے۔ اوہناں نے کہیا کہ ایہ مشکل ویلا اے تے مشکل ویلے وچ کوئی وی فیصلا سوکھا نہیں ہوندا ایس لئی یقینن بہت سارے ماپیاں نُوں تسلی ہووے گی کہ بچے کووڈ 19- دے ایہناں دناں وچ امتحانات لئی نہیں جان گے جد کہ جہناں بچیاں دی مجبوری اے‘ اوہناں لئی وی بندوبست اے‘ ایس لئی اسیں بچیاں دے مستقبل دی خاطر ایہ فیصلا کیتا اے۔ وزیراعظم دے معاون خصوصی صحت ڈاکٹر فیصل سلطان نے خبردار کیتا اے کہ جے کرونا دے کیسز وچ ہور وادھا ویکھن وچ آیا تے ایس او پیز اُتے عملدرآمد وچ بہتری نہیں آئی تے باقی کجھ شہراں وچ لاک ڈاؤن لایا جا سکدا اے۔ اوہناں نے کہیا کہ این سی او سی دے تحت سارے شہراں دا ڈیٹا موصول ہوندا اے جہدے وچ ایس او پیز اُتے عملدرآمد بارے معلومات ہوندیاں نیں‘ وصول ہون والے آنکڑیاں توں وی پتا لگدا اے کہ متعلقا شہر یاں علاقے وچ ہیلتھ کیئر سینٹر اُتے کِنا دباء اے۔ اوہناں نے کہیا کہ این سی او سی دے فیصلیاں تے ایہناں دے طریقا کار اُتے بھروسا رکھو‘ غیر معمولی گنتی وچ ڈیٹا موجود ہون تے ایہدے تجزیے دی بنیاد اُتے فیصلے کیتے جاندے نیں۔ اسیں یومیا بنیادی اُتے طبی مراکز دی استعداد کار بتدریج ودھاندے جا رہے آں تاں جے کیسز دی ودھدی گنتی نُوں طبی سہولتاں مِل سکن۔ بھارت وچ کرونا وایرس دے روگیاں لئی میڈیکل آکسیجن دی سپلائی بارے گل کردیاں ہویاں اوہناں نے دَسیا کہ ایس ضمن وچ این سی او سی دے تحت ای اِک کمیٹی موجود اے۔ اوہناں دا کہنا سی کہ ذکر کیتی کمیٹی سارے امور دا غور نال جایزا لے رہی اے جد کہ ملکی سطح اُتے میڈیکل آکسیجن نُوں پورا کرن دی وی تیاری کر رہی اے۔ ڈاکٹر فیصل سلطان نے دَسیا کہ آکسیجن پلانٹ دا باقاعدگی نال معاینا ہو رہیا اے تے جے طلب وچ غیر معمولی وادھا ہویا تے نان کمرشل انڈسٹری توں آکسیجن دے حصول دا طریقا وی ساڈے کول موجود اے جد کہ میڈیکل آکسیجن دی درآمد لئی گلبات جاری اے۔ اوہناں نے کہیا کہ ویکسین دی فراہمی بلا تعطل تے انتہائی شفاف طریقے نال جاری اے۔ اوہناں نے ایس تاثر نُوں رَد کر دِتا جہدے وچ کہیا گیا سی کہ حکومت عطیا یاں تحفے وچ آئی ویکسین اُتے انحصار کر رہی اے۔ اوہناں نے وضاحت کیتی کہ اسیں پہلے ای 3 ویکسین مینو فیکچرنگ کمپنی توں ویکسین خرید رہے آں‘ 30 مارچ توں ہُن تک 30 لکھ ویکسین خریدی جا چکی اے جد کہ ہور 3 کروڑ ویکسین دے حصو ل لئی معاہدے کر لئے نیں اِک معاہدا ٹیکنالوجی بارے اے جہدے تحت ویکسین دی بھرائی ملک وچ ہووے گی۔ معاون خصوصی صحت نے کہیا کہ ایہدے اُلٹ چین ولوں 17 لکھ ویکسین بطور تحفا موصول ہوئیاں س۔ اوہناں نے کہیا کہ ایہ تاثر دینا کہ پاکستان صرف عطیا کردا ویکسین اُتے انحصار کر رہیا اے‘ ایہ گمراہ کن اے۔ ا ودھر وزارت داخلا نے عید الفطر دے دوران بین الصوبائی تے انٹرا سٹی ٹرانسپورٹ اُتے پابندی لان دا اعلان کر دِتا اے تے ایس حوالے توں نوٹیفکیشن وی جاری کر دِتا اے‘ ترجمان وزارت داخلا مطابق نیشنل کمانڈ اینڈ اپریشن سینٹر دے اجلاس وچ اہم فیصلیاں دی منظوری دِتی گئی جہدی روشنی وچ شب قدر‘ جمعتہ المبارک‘ نماز عید تے اعتکاف لئی ایس او پیز نہ صرف ویلے سر جاری ہون گے سگوں عملدرآمد نُوں یقینی بنایا جاوے گا۔عید دیاں چھٹیاں دے دوران تے ایہدے بعد وی 16 مئی تک ٹور ازم اُتے مکمل پابندی ہووے گی۔ ساریاں سیاسی تھاواں‘ پبلک پارک‘ ہوٹل بند رہن گے۔ بین الصوبائی انٹر سٹی ٹرانسپورٹ عید دے دناں وچ نہیں چلے گی‘ پر مقامی بندے خصوصن گلگت بلتستان دے لوکاں نُوں سفر دی اجازت ہووے گی۔ ہوٹلز‘ ریسٹورنٹس‘ شاپنگ مال تے ٹرانسپورٹ بند کر دِتی جاوے گی‘ مری گلیات‘ سوات‘ کالام‘ سی ویو‘ ساحل سمندر دے علاقے تے شمالی علاقا جاتاُتے وی سیاح نہیں جا سکن گے۔ عید الفطر دے دوران بجلی دی بلا تعطل فراہمی نُوں یقینی بنایا جاوے گا‘ گلگت بلتستان دے لوکاں نُوں واپس جان دی اجازت ہووے گی‘ متععلقا ٹاسک دے حوالے توں وزارت دخلا وقتن فوقتن نوٹیفکیشن جاری کردی رہوے گی۔