عمران خان نے امیراں لئی وکھرا تے غریباں لئی اِک وکھرا پاکستان بنا دِتا: بلاول بھٹو زرداری ……٭رویل خبر٭

اسلام آباد (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے نویں پاکستان وچ امیراں تے غریباں لئی وکھرے وکھرے قانون ہون اُتے سخت تنقید کردیاں ہویاں کہیا اے کہ 2 نہیں اِک پاکستان دا نعرا لان والے عمران خان نے امیراں لئی وکھرا تے غریباں لئی اِک وکھرا پاکستان بنا دِتا‘ نویں پاکستان دیاں ایمنسٹی سکیماں وچ ٹیکس چوراں لئی ریلیف اے تے ٹیکس دین والے تنخاہ دار طبقے لئی مہنگائی اے‘ کیہ مزدوراں تے کساناں توں سبسڈی کھوہ کے صرف امیر طبقے نُوں نوازنا عمران خان دی تبدیلی اے‘ عمران خان دے معاشی اقدامات دا فایدا صرف تے صرف ملک دے مخصوص سرمایا دار خانداناں نُوں ہو رہیا اے‘ عمران خان اِک ہتھ توں اپنے سرمایا دار دوستاں نُوں بے نامی جائیداداں نُوں قانونی کر کے ایمنسٹی دیندے نیں تے دوجے ہتھ نال مہنگی بجلی دا آرڈیننس جاری کر دیندے نیں۔ بلاول نے کہیا کہ نویں پاکستان وچ سرمایا دار تے صنعت کار صارفین توں ٹیکس وصول کر کے آپ ایمنسٹی سکیماں توں فایدا چُک رہے نیں۔ مسلم لیگ ن نے 135 امیر خانداناں نُوں اپنے دور حکومت وچ 43 ارب رُپئے تک دی ایمنسٹی دِتی‘ پی ٹی آئی حکومت نے 56 امیر خانداناں نُوں 20 ارب رُ/ئے توں ودھ دی ایمنسٹی دِتی۔ بلاول نے کہیا کہ امیراں نُوں ٹیکس نیٹ وچ لیان دا دعوا کر کے ایمنسٹی سکیماں دین والے دَسن کہ عام بندے لئی ایہناں نے کیہ کیتا؟ انکم ٹیکس دے دایرے وچ وی نہ آن والے 8 کروڑ توں ودھ عام پاکتانی موبائل فون اُتے 12.5 فیصد تک پیشگی انکم ٹیکس ادا کرن اُتے مجبور نیں‘ پی ٹی آئی حکومت وچ امیر بندا ٹیکس دی چھوٹ توں فایدا چُک رہیا اے تے عام بندا مختلف مد وچ ٹیکس دین دے بعد وی ٹیکس چور کہواندا اے‘ پاکستان وچ غیر مساوی معاشی پالیسیاں دی بدولت امیر تے غریب وچ خلیج گوڑھی ہوندی جا رہی اے۔