زنانیاں دی تعلیم دین اسلام وچ۔۔۔۔رویل لیکھ

"نساء"مطلب زنانی (عورت) نوں آکھیا جاندا اے۔ انج تعلیم نسواں توں مراد زنانیاں دی تعلیم.

جے اسیں تواریخ ول جھات پائیے تاں پتا لگدا اے پئی جدوں رب نے حضرت آدم نوں تخلیق کیتا تاں اوہناں نوں کجھ علم سکھایا تے فرشتیاں تے وڈیائی دتی جویں قرآن دی سورۃ بقرہ وچ آؤندا اے:

"اللہ نے آدم نوں ساریاں شیواں دے ناں سکھائے فراوہناں شیواں نوں فرشتیاں تے پیش کیتا تے فرمایا جے تسیں سچے اوہ تے ایہناں شیواں دے ناں دسو"(بقرہ 31)

انج ویکھیے تاں پتا لگدا اے پئی سکھن سکھاؤن دا کم اودوں ای شروع ہو گیا سی. انج انساناں نوں فرشتیاں اتے وڈیائی دتی گئی فر حضرت آدم دی روح نوں سکون دین لئی اوہناں دا جوڑا بنایا تے بی بی حوا نوں تخلیق کیتا انج کائنات نوں مکمل کیتا. زنانی نال ای ایس دنیا اندر ساریاں خوبصورتیاں نیں، زنانی نال ای ہردم حیاتی اے. زنانی دے رب نے ایس دنیا اندر وکھو وکھ روپ بنائے جے بیوی اے تے سکون اے جے بھین اے تے نعمت اے جے دھی اے تے رحمت اے تے جے ماں تے رب نے اوہدے قدماں وچ ای جنت رکھ دتی. رب نے ایناں رشتیاں نوں مضبوط تے سوہنا بنایا تے گھر دے سکون لئی رب نیں مرد تے زنانی نوں برابر دا مقام دتا. ایس لئی زنانی نوں ہر تھاں عزت دتی گئی. اسلام آؤن توں پہلاں جہدے گھر دھی جمدی اوہنوں زندہ درگور کیتا جاندا. زنانی نوں جُتی سمجھیا جاندا. تے جدوں اسلام آیا تے اللہ دے آخری پیغمبر نے نہ صرف زنانیاں نوں عزت دتی سگوں نال ای فرمایا:

" جہدے گھر تن دھیاں ہوون فر اوہ اوہناں دی چنگی پرورش کرے اوہناں نوں پڑھائے لکھائے تے فیر اوہناں دا ویاہ کرے تے جنت وچ اوہ انج میرے نال ہووے گا جویں دو انگلاں"

جے گل کرئیے علم دی تاں اوہ اک اجہیاخزانا اے جہنوں حاصل کرنا مرد تے زنانی ہر کسے اتے فرض اےجویں حدیث وچ آؤندا اے:

"علم حاصل کرنا ہر مرد تے زنانی تے فرض اے"

انج ای رب نے قرآن وچ علم دے وادھے لئی وی دعا دسی.

"اے میرے رب میرے علم وچ وادھا کر"(طہ 114(

علم ایہو جہی دولت اے جہڑی ونڈن نال ودھدی اے.اللہ دے نبی نے مرداں دے نال نال زنانیاں دی تعلیم نوں حاصل کرن تے خاص حکم دتا ناصرف حکم دتا سگوں اک دن زنانیاں واسطےمخصوص وی کیتا سی تاں جے اوہناں نوں ہر مسئلے بارے پتا ہووے. آپ اپنیاں بیویاں نال وی دین بارے گلاں باتاں کردے فر اوہ دوجیاں زنانیاں نوں دسدیاں. انج ای ساڈے سبھ دی ماں حضرت عائشہ رضی اللہ عنہا زنانیاں وچوں سبھ توں زیادہ علم رکھن والے سی. آپ دے وصال توں بعد جدوں کسے صحابی نوں کوئی گل پچھنی ہوندی تاں اوہ ماں حضرت عائشہ رضی اللہ عنہا کول آؤندے تے اوہناں توں سکھدے۔

تعلیم اوہ زیور اے جہدے نال زنانیاں اپنا مقدر سوار سکدیاں نیں.جے ویکھیا جاوے تے زنانیاں دی تعلیم حاصل کرنا بہت ضروری اے کیوں جے اوہنے اک نسل دی پرورش کرنی ہوندی اے. جویں نپولین آکھیا سی۔

" تسیں مینوں پڑھی لکھی ماں دیو میں تہانوں پڑھی لکھی ماں دیاں گا. "

ایس گل تے جے گوہ کرییے تاں پتا لگدا اے اک ماں پڑھی لکھی نال اک پوری قوم سور سکدی اے. اسلام وچ زنانیاں دی تعلیم تے بڑا زرور دتا گیا. ایس بارے قرآن وچ آؤندا اے

"فرمادیو کیہ علم والے تے جہڑے علم نہیں رکھدے اوہ برابر ہوسکدے نیں. (الزمر 9)

ایہدے توں پتا لگدا اے پئی اسلام وچ صرف مرد نوں ای نہیں وڈیائی دتی گئی سگوں علم والیاں دی گل کیتی گئی بھاویں اوہ مرد اے یا زنانی. ساڈے نبی نے ناصرف اپنیاں دِھیاں بھیناں دی تعلیم تے زور دتا گیا سگوں لونڈیاں دی تعلیم بارے وی آکھیا تے فرمایا:

"جہدے کول کوئی لونڈی ہووے فر اوہنوں مؤدب بناوے فر اوہنوں تعلیم دواوے فیر اوہنوں آزاد کرائے تے فر اوہدے نال نکاح وی کرے تاں اوہدے لئی دوہرا اجر اے".(نسائی)

ساڈے نبی نے تے سانوں لونڈیاں واسطے حکم دتا تے فر اوہ دھی دی تعلیم بارے کویں منع کر سکدے نیں تے آپ نے فرق کیتے بغیر فرمایا:

"تہاڈے وچوں چنگا اوہ ای اے جہڑا قرآن پڑھے تے پڑھائے"(بخاری)

نبی دی حیاتی ساڈے لئی اک مکمل نمونہ اے ایہدے بارے قرآن وچ ایویں آؤندا اے.

"درحقیقت تہاڈے واسطے رسول دی حیاتی وچ مکمل نمونا اے ہر اوس بندے واسطے جہڑا رب تے آخرت دے دیہاڑے دی امید رکھدا اے تے اللہ دا ذکر کثرت نال کردا اے." (احزاب 21)

تے جدوں ساڈے نبی دے حیاتی ساڈے لئی نمونااے اوہناں اپنیاں زنانیاں نوں تعلیم دتی تے زنانیاں دی تعلیم واسطے زور دتا تے فر اسیں لوک ایس گل تو کویں منکر ہوسکدے.

کجھ لوک کالجاں یونیرسٹیاں وچ کڑیاں تے منڈیاں دا اکٹھا پڑھن نوں بھیڑا جاندے نیں تے کجھ لوک ایس وجھا توں کڑیاں نوں گھر بٹھا لیندے نیں جے اسیں قرآن نوں پڑھیے تاں سانوں ایس گل دا وی حکم دتا گیا.

"تسیں مومن مرداں تے زنانیاں نوں فرمادیوکہ اپنیاں نظراں نیویاں رکھن تے اپنیاں شرمگاہواں دی حفاظت کرن ایہ اوہناں لئی بڑی پاکی دی گل اے. بے شک اللہ سبھ جاندا اے جو اوہ کر رہے نیں".(النور30)

ایہناں سبھ گلاں نوں مکھ رکھدیاں ہویاں اسیں ایہ ای کہہ سکنےآں جویں اج دا دور سائنس تے ٹیکنالوجی دا اےتے اوہ لوک ای ترقی کر سکدے نیں جہڑے پڑھے لکھے نیں تے جے آبادی وچ زنانیاں بہتیاں نیں تے ان پڑھ نیں تے اوہ قوم کدے وی ترقی نہیں کر سکدی جے زنانی پڑھی لکھی ہووے گی تاں اوہ ماحول مطابق حیاتی گزار سکدی اے تےملک دی ترقی وچ اپنا کردار ادا کر سکدی اے. اپنی آؤن والی نسل نوں چنگی پرورش دے سکدی اے اپنیاں گھروکی ذمے داریاں نوں چنگی طرحاں پوریاں کر سکدی اے. معاشی طور تے اپنے گھر والیاں دی مدد کر سکدی اے۔ گل کیہ اے ہر تھاں تے اپنا آپ منوا سکدی اے زنانی۔

٭٭٭٭٭