حکومتی دعوے  فراڈ تے قوم نال سنگین دھوکھے بازی اے:مریم اورنگزیب……٭رویل خبر٭

اسلام آباد (نیوز ڈیسک) پاکستان مسلم لیگ (ن) دی ترجمان مریم اورنگزیب نے شرح نمو دے حکومتی دعوے نُوں فراڈ تے قوم نال سنگین دھوکھے بازی متھ دِتا۔ اپنے اِک بیان وچ ترجمان ن لیگ دا کہنا اے کہ محکما شماریات دے چیف سٹیٹیشن دا عہدا خالی رکھ کے آنکڑیاں دے نال ہیرا پھیری قوم تے ملک دے نال سنگین دھوکھا تے فراڈ اے‘ جہناں آنکڑیاں نُوں سٹیٹ بینک تے محکما خزانا قبول نہ کرے‘ اوہناں دی کوئی حیثیت نہیں۔ عمران خان پاکستان دی معیشت نال خطرناک کھیڈ کھیڈ رہے نیں‘ عمران صاحب ایہ رنگ روڈ منصوبے دی ری الائنمنٹ نہیں‘ پاکستان دی معیشت نال خطرناک کھیڈ نہ کھیڈو۔ اوہناں نے کہیا کہ عوام معیشت دی تباہی دا انداز ا بیروزگاری‘ مہنگائی‘ آٹا کھنڈ‘ بجلی گیس دوائی دیاں قیمتاں توں لا سکدی اے‘ لوکائی معیشت دی تباہی دا اندازا سبزیاں‘ پھَل‘ گوشت‘ مرغی‘ آنڈے تے تیل دیاں قیمتاں نال لا سکدی اے‘ حکومت پہلے جھوٹھ بولدی اے‘ فیر یوٹرن لیندی اے‘ فیر جھوٹھ اُتے جھوٹھ بولدی اے‘ 11 جون نُوں حکومت دا ایہ فراڈ اِک واری فیر کھُل کے قوم دے ساہمنے آ جاوے گا۔ 3.94 فیصد گروتھ ریٹ دا دعوا قوم دے نال کھلی جعل سازی تے فراڈ اے‘ مُکن والے سال وچ سرمایا کاری دے لحاظ نال جی ڈی پی وچ 15.2 فیصد کمی ہوئی‘ نیشنل اکاؤنٹس کمیٹی نے سرمایا کاری دے لحاظ نال جی ڈی پی وچ کمی دی تصدیق کیتی اے‘ حکومت تیجے سال وچ وی سرمایا کاری دے لحاظ نال جی ڈی پی دا ہدف حاصل کرن وچ ناکام رہی۔ ادارا شماریات نے فی کس آمدن دے حوالے توں ابادی دے غلط آنکڑے استعمال کیتے۔ ادارا شماریات نے چھیویں آدم شماری دے حتمی جاری کردا نتیجیاں نُوں استعمال نہیں کیتا‘ 2017 وچ چھیویں آدم شماری دے حتمی نتیجے وچ کل آبادی 20 کروڑ 76 لکھ 80 ہزار وکھائی گئی اے‘ 22 کروڑ 83 لکھ 50 ہزار دی اصل ابادی دی بجائے 21 کروڑ 10 لکھ دا غلط عدد وکھایا گیا اے۔ عمران صاحب سنے کرائے دے ترجمان پہلے جھوٹھ بولدے نیں‘ فیر جھوٹھ بولدے نیں تے فیر یوٹرن لین اُتے ہلکان ہوندے نیں۔