kraamaat@gmail.com
+ +92 333-430-6384


چالو ورھے بغیر امتحان کسے پڑھیار نُوں پروموٹ نہیں کیتا جاوے گا، استاداں‘ نگران عملے دی ویکسینیشن نُوں یقینی بناواں گے: وفاقی وزیر تعلیم  شفقت محمود……٭رویل خبر٭


نمائندا رویل May 25, 2021


اسلام آباد (نیوز ڈیسک) بین الصوبائی وزراء تعلیم کمیٹی دا 29 واں اجلاس وفاقی وزیر تعلیم تے پیشا وارانا تربیت شفقت محمود دی صدارت ہیٹھ ہویا۔ اجلاس وچ سارے صوبائی وزراء تعلیم بشمول ازاد کشمیر تے گلگت بلتستان تے متعلقا سیکرٹریز نے رلت کیتی۔ ایگزیکٹو ڈائریکٹر ہائر ایجوکیشن ڈاکٹر شائستہ‘ ڈی جی ایف جی ای آئی کینٹ اینڈ گیریژن میجر جنرل اصغر تے سیکرٹری آئی بی سی سی وی اجلاس وچ موجود سن۔ چیئرمین فیڈرل بورڈ قیصر عالم تے چیئرپرسن پیر ضیا بتول نے وی اجلاس وچ رلت کیتی۔ بین الاصوبائی وزراء تعلیم کمیٹی نے پورے ملک وچ امتحانات دے انعقاد لئی سارے ممکنا آپشنز دا تفصیلی جائزا لیا تے فیصلا کیتا کہ امتحانات 20 جون دے بعد شروع کیتے جان گے پر تاریخ دا اعلان متعلقا صوبے آپ کرن گے۔ گرمیاں دیاں چھٹیاں دے حوالے توں بین الصوبائی وزراء تعلیم کمیٹی نے فیصلا کیتا کہ اوہ محدود گنتی وچ ہون گیاں۔ چیئرمین بین الصوبائی وزراء تعلیم کمیٹی شفقت محمود نے ساریاں وفاقی اکائیاں نُوں استاداں‘ نگراں عملے تے ہور انتظامی سٹاف دی ویلے سر ویکسینیشن نُوں یقینی بنان اُتے زور دِتا۔ جہناں دے کول ویکسینیشن سرٹیفکیٹ نہیں ہووے گا اوہ انویجیلیشن لئی نہیں سدے جان گے۔سانجھے مفاداتی کونسل دے فیصلیاں دی روشنی وچ این سی ایچ ڈی تے بیکس دے سٹاف دی 30 جون دے بعد صوبیاں نُوں منتقلی دے معاملے اُتے وی کمیٹی وچ وچار وٹاندرا کیتا گیا۔ چیئرمین کمیٹی شفقت محمود نے کہیا کہ ایس ضمن وچ صوبے چھیتی نوٹیفکیشن جاری کرن۔ بین الصوبائی وزرا تعلیم کمیٹی وچ نیشنل ایجوکیشن اسیسمنٹ فریم ورک نُوں وی صوبیاں دے نال شیئر کیتا گیا تے ایہدی اصولی منظوری دے دِتی گئی۔ اجلاس وچ آپسی مشورے نال حکومت نے فیصلا کیتا کہ چالو سال بغیر امتحان کسے پڑھیار نُوں پروموٹ نہیں کیتا جاوے گا‘ سگوں ساریاں کلاساں دے امتحانات ہر صورت ہون گے۔ اعلامیے وچ دَسیا گیا اے کہ پہلے دسویں تے 12 ویں جماعت دے امتحانات ہون گے‘ دسویں تے 12 ویں جماعت دے امتحانات جون دے تیجے ہفتے وچ لئے جان گے۔ رزلٹ وچ دیر ہون دی صورت وچ جامعات پروویژنل سرٹیفکیٹ دی بنیاد اُتے داخلے دین گیاں۔ موسم گرما دیاں چھٹیاں گھٹ ہون گیاں جہدا فیصلا صوبے کرن گے۔