کامیاب جوان پروگرام دا ساڈا بنیادی مشن روزگار دی فراہمی اے: عثمان ڈار ……٭رویل خبر٭

اسلام آباد (نیوز ڈیسک) وزیراعظم دے معاون خصوصی برائے امور نوجوانان عثمان ڈار نے کہیا اے کہ نوجواناں نُوں فیصلا سازی تے سیاسی اختیارات تک رسائی ہووے گی جہدے نال اوہ پاکستان نُوں اگے لے کے جا سکدے نیں‘ کامیاب جوان پروگرام دا ساڈا بنیادی مشن روزگار دی فراہمی اے۔ پیر نُوں ایئر یونیورسٹی وچ منعقدا تقریب نال خطاب کردیاں ہویاں اوہناں نے کہیا کہ حکومت نوجواناں لئی روزگار دے بہتر موقع فراہم کرن دی کوشش کر رہی اے‘ پڑھے لکھے نوجواناں دی ترجیح روزگا ر حاصل کرنا ہوندی اے‘ حکومت نوجواناں نُوں فیصلا سازی وچ شامل کرنا چاہندی اے‘ ملک دی 68 فیصد ابادی نوجواناں اُتے مشتمل اے جو ملک دا سبھ توں وڈا اثاثا نیں تے ایہناں دیاں رضا کارانا خدمتاں وی بڑیاں اہم نیں‘ تعلیم‘ روزگار تے مختلف شعبیاں لئی ایہناں دیاں خدمتاں دا جایزا لیا جا رہیا اے۔ اوہناں نے کہیا کہ نوجواناں نُوں ملک دے سیاسی اختیارات تک رسائی ہووے گی تے ایس طرحاں ایہناں نُوں فیصلا سازی دے عمل وچ شامل کرن دا مطالبا پورا ہووے گا۔ اوہناں نے کہیا کہ تعلیم‘ روزگار تے شہری خدمتاں دے مجموعے دا ناں کامیاب نوجوان پروگرام اے۔ اوہناں نے کہیا کہ حکومت نُوں ایس سلسلے وچ جہڑے اقدامات کرنے نیں‘ اوہناں وچ ایہ جائزا لینا اے کہ کنی وڈی گنتی وچ روزگار دی فراہمی ہو سکدی اے۔ کامیاب جوان پروگرام وزیراعظم عمران خان دے وژن دے مطابق اے۔ اوہناں نے کہیا کہ یونیورسٹی وچ آن دا میرامقصد ایہ واضح کرنا اے کہ اعلا تعلیم یافتا نوجوان ای پاکستان نُوں اگے لے کے جا سکدے نیں تے دوجایں لئی وی روزگار پیدا کرسکدے نیں‘ کامیاب جوان پروگرام دا ساڈا بنیادی مشن روزگار دی فراہمی اے۔ اوہناں نے کہیا کہ پاکستان دے نوجواناں دا مائنڈ سیٹ کلیئر کرنا بہت ضروری اے‘ حکومت روزگار پیدا کر سکدی ا پر اینی وڈی گنتی وچ سرکاری نوکریاں نہیں دِتیاں جا سکدیاں۔ اوہناں نے کہیا کہ ہر سال تقریبن 20 لکھ نوجوان ڈگریاں لین دے بعد مارکیٹ وچ آ رہے نیں‘ حکومت ایہناں نُوں اینی وڈی گنتی وچ سرکاری محکمیاں روزگار نہیں دے سکدی پر حکومت نوجواناں لئی اِک سہولت کنندا دا کردار ادا کر سکدی اے‘ حکومت دا کم ایہو جہے حالات تے موقع پیدا کرنا اے جہدے نال روزگار پیدا کیتے جا سکن‘ معیشت نُوں مستحکم بنا کے روزگار پیدا کیتے جا سکدے نیں‘ میں ایس لئی یونیورسٹی دا دورا کر رہیا آں کہ اوہ سارے نوجوان جہڑے ڈگریاں لیندے نیں اوہناں دی کس طرحاں مدد ہو سکے۔ اوہناں نے کہیا کہ نوجواناں دی پہلے ای اِک لاین مارکیٹ وچ لگی اے تے نوجواناں نُوں روزگار ملنا خُش قسمتی ہووے گی تے ایسے وجھا توں نوجواناں دی وی خاہش اے کہ اوہ ہنر مندی دے نال اگے آن‘ کامیاب جوان پروگرام لئی ہنر مند ہونا ضروری اے‘ ایس سلسلے وچ سکل ٹریننگ دا اغاز کیتا گیا اے تے پہلی وار حکومت ولوں نوجواناں نُوں سکلز سرٹیفکیٹس دِتے گئے‘ ایہناں نوجواناں لئی دوویں راہ کھلے نیں‘ بھاویں تے روزگار حاصل کرن تے اپنا کاروبار وی شروع کر سکدے نیں جہدے لئی وزیراعظم دی روزگار ٹیم پہلے مرحلے وچ اِک سو ارب رُپئے رکھے نیں۔ اوہناں نے کہیا کہ 1 لکھ رُپئے توں ڈھائی کروڑ رُپئے تک سوکھیاں شرطاں اُتے وسائل تک رسائی ہووے گی‘ بھاویں ساڈے بینکاری نظام د ایہو جہیا مائنڈ سیٹ نہیں اے پر بینکاں ولوں نوجواناں نُوں سہولت فراہم کیتی جاوے گی جہناں نُوں شخصی ضمانت اُتے 20 لکھ رُپئے تک دا قرضا دِتا جاوے گا۔ اوہناں نے دَسیا کہ میر خاندان نے وی کاروبارول توجا دِتی تے چنگی کاروباری ساکھ دے کارن ساڈے کاروبار نے وسعت پائی‘ میں وی ڈگری لین دے بعد اپنے والد دے کاروبار وچ شمولیت اختیار کیتی تے ایس طرحاں اِک بزنس نال تقریبن ڈھائی ہزار لوک جُڑے نیں۔ اوہناں نے کہیا کہ وزیراعظم کامیاب جوان پروگرام دی ایمپلائمنٹ سکیم دی بدولت 10 ہزار نوجوان اپنا کاروبار شروع کر چکے نیں‘ جہناں وِچوں 7 ہزار نوجواناں نے پہلی وار اپنا کاروبار شروع کیتا اے جہناں نے زندگی وچ کدی اپنا اکاؤنٹ وی نہیں کھولیا سی‘ الحمداللہ اوہ اج اپنا کاروبار کر رہے نیں جہناں نُوں نہ صرف اپنے لئی روزگار مِلیا سگوں اوہ دوجیاں لئی وی روزگار پیدا کر رہے نیں‘ جے کوئی ریٹیل سٹور کھول رہیا اے اوہ وی اپنے لئی ہیلپر رکھ رہیا اے‘ اسیں اپنے کامیاب جوان پروگرام نُوں پبلک کرن جا رہے آں‘ ہر ضلع تے تحصیل وچ جائزا لواں گے کہ کنے لوک کاروبار کر رہے نیں تے سبھ ویکھن گے کہ قرضے لے کے کس طرحاں ایہ لوک روزگار دے موقع فراہم کردے نیں۔ اوہناں نے کہیا کہ سرٹیفکیٹس حاصل کرن والے پڑھیار کامیاب جوان پروگرام دا حصا بنن تے اوہ www.kamyabjawan.gov.pk اُتے وزٹ کر کے اپنے لئی معلومات حاصل کرن۔ اوہناں نے کہیاکہ وزیراعظم عمران خان دا مشن پڑھے لکھے نوجواناں لئی کامیاب پروگرام دی رسائی اے۔ اوہناں نے کہیا کہ نوجواناں نُوں نوکری دا متلاشی نہیں سگوں نوکریاں دین والا بننا چاہیدا اے۔ تقریب دوران وزیراعظم دے معاون خصوصی برائے امور نوجوانان عثمان ڈار نے نیشنل ووکیشنل اینڈ ٹیکنیکل ٹریننگ کمیشن دے چیئرمین سید جاوید حسن تے وائس چانسلر ائر یونیورسٹی ائرمارشل (ر) جاوید احمد نے ہنر مند پاکستان پروگرام وچ کامیاب ہون والے نوجواناں وچ سرٹیفکیٹس ونڈے۔