پاکستان خطے وچ پائیدار امن دا چاہیوان اے:وزیراعظم عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ پاکستان خطے وچ پائیدار امن دا چاہیوان اے‘ افغانستان وچ امن دے قیام نال پورے خطے نُوں فایدا ہووے گا‘ کشمیر دی صورتحال اُتے عالمی برادری نُوں اپنیاں ذمے داریاں پوریاں کرنیاں چاہیدیاں نیں‘ دہشتگردی دے خاتمے تے داخلی سلامتی نُوں یقینی بنان لئی افواج پاکستان تے انٹیلی جنس اداریاں نے ہمیشا قومی مفادات نُوں ساہمنے رکھدیاں ہویاں دشمن دے عزائم نُوں ناکام بنایا۔ پیر والے دن قومی سلامتی تے علاقائی امور دے حوالے توں آئی ایس آئی ہیڈ کوارٹر وچ اِک اعلا سطح دا اجلاس ہویا جہدی صدارت وزیراعظم عمران خان نے کیتی‘ اجلاس وچ وفاقی وزراء شاہ محمو قریشی‘ شیخ رشید‘ فواد چودھری‘ مشیر قومی سلامتی معید یوسف‘ 3 ہتھیار بند فوجاں دے آگوواں نے رلت کیتی۔ وسیلیاں دے مطابق ڈی جی آئی ایس آئی فیض حمید نے خطے دی سلامتی دی صورتحال خاص طور اُتے افغانستان تے افغان امن عمل اُتے تفصیلی بریفنگ دِتی تے ایہدے وچ پاکستان دے کردار دے نال نال امریکی فوجاں دے انخلاء بارے ہون والی ٹورا کاری بارے اگاہ کیتا۔ وزیر خارجا شاہ محمود قریشی نے اپنے حالیا دورا امریکا تے خارجا امور اُتے اجلاس نُوں اعتماد وچ لیا جد کہ رلتیاں نے داخلی امور اُتے مشاورت کیتی۔ اجلاس دے بعد آرمی چیف‘ وزیراعظم تے وزراء نے وکھرے ہو کے وی اہم قومی تے داخلی سلامتی بارے امور اُتے مشاورت کیتی تے دُپہرا دا کھانا وی نال کھادا۔ وسیلیاں دا کہنا اے کہ اجلاس نال خطاب کردیاں ہویاں وزیراعظم دا کہنا سی کہ پاکستان خطے وچ پائیدار امن دا چاہیوان اے تے افغانستان وچ امن دے قیام لئی اپنا بھرواں کردار ادا کر رہیا اے‘ افغان امن عمل دا فایدا پورے خطے نُوں ہووے گا تے اوہ امید کردے نیں کہ فریقین ایس حوالے توں اپنی کمٹمنٹ پوری کرن گے۔ اوہناں نے مقبوضا کشمیر دی موجودا صورتحال اُتے تشویش دا اظہار کردیاں ہویاں کہیا کہ عالمی برادری نُوں کشمیر دے حوالے توں اپنیاں ذمے داریاں پوریاں کرنیاں چاہیدیاں نیں تے کشمیری لوکائی نُوں حق خُد ارادیت دین بارے اقوام متحدا دیاں قرار داداں اُتے عملدرآمد ہونا چاہیدا اے‘ وزیراعظم نے دہشتگردی دے خاتمے تے داخلی سلامتی نُوں یقینی بنان بارے آئی ایس آئی دے کردار دی تعریف کیتی تے کہیا کہ افواج پاکستان تے انٹیلی جنس اداریاں نے ہمیشا قومی مفادا نُوں ساہمنے رکھدیاں ہویاں دشمن دے نہ صرف سارے عزائم ناکام بنائے سگوں سلامتی نُوں وی یقینی بنایا۔