سٹیٹ بینک ولوں جاری آنکڑیاں دے مطابق  غیر ملکی قرضیاں دی مالیت وچ 3.2ارب ڈالر دا وادھا ……٭رویل خبر٭

کراچی (نیوز ڈیسک) پاکستان اُتے غیر ملکی قرضیاں دا بھار 116 ارب ڈالر توں ودھ گیا اے۔ سٹیٹ بینک ولوں جاری آنکڑیاں دے مطابق چالو مالی سال دے پہلے 9 مہینیاں دے دوران غیر ملکی قرضیاں دی مالیت وچ 3.2ارب ڈالر دا وادھا ہویا‘ دسمبر 2020 نُوں غیر ملکی قرضیاں دی مالیت 117 ارب 11 کروڑ ڈالر توں ودھ ہو چکی سی‘ چالو مالی سال دوجی تماہی دے مقابلے وچ تیجی تماہی دے دوران غیر ملکی قرضیاں وچ 80 کروڑ 60 لکھ ڈالر دی کمی واقع ہوئی۔ مرکزی بینک دے مطابق مارچ 2020 تک غیر ملکی قرضیاں دی مالیت109.9 ارب ڈالر ریکارڈ کیتی گئی سی‘ مارچ 2020 دے مقابلے وچ مارچ 2021 تک غیر ملکی قرضیاں دی مالیت وچ 6.38 ارب ڈالر دا وادھا ہویا۔ ایس توں وکھ سٹیٹ بینک آف پاکستان دی سماجی رابطے دی ویب سائٹ ٹویٹر اُتے پیغام وچ دَسیا گیا کہ پچھلے موسم گرما دے بعد توں کووڈ دی صورتحال وچ بہتری آئی اے۔ 9 مہینیاں دے جاری کھاتے 17 سال وچ پہلی وار مثبت رہے نیں۔ زرمبادلا زخائر 4 سال دی بلند ترین سطح اُتے نیں‘ مالی سال 2021 وچ شرح نمو 3 اعشاریا 94 فیصد رہن دی توقع اے۔ سٹیٹ بینک دے مطابق عالمی شہرت یافتا احساس پروگرام راہیں پسماندا بندیاں نُوں فایدا ہویا اے۔ مرکزی بینک نے 2 کھرب رُپئے دا ہدف شدا معاشی پیکج دِتا۔ شرح سود وچ کمی تے صنعتی قرضیاں دی ری شیڈولنگ کیتی گئی۔ ملازماں دیاں تنخاہواں تے سرمایا کاری لئی سکیم دِتی گئی۔ اودھر قومی اسمبلی نُوں دَسیا گیا اے کہ پاکستان انٹرنیشنل ائر لائنز نُوں پچھلے 3 ورھیاں وچ 88 ارب 61 کروڑ 80 لکھ رُپئے دا نقصان ہویا اے جد کہ جنوری 2019 توں پہلے 435 ارب 47 کروڑ 50 لکھ دا کسارا سی۔ اسد قیصر دی اگوائی وچ ہون والے قومی اسمبلی دے اجلاس وچ پارلیمانی سیکرٹری برائے سول ایوی ایشن جمیل احمد نے دَسیا کہ 6 انکوائریاں سنوائی ہیٹھ نیں نیب نُوں سارے ڈاکو منٹس فراہم کر دِتے گئے نیں‘ اِک انکوایری ایف آئی اے دے کول چل رہی اے‘ ایہناں انکوائریاں دے بارے وچ جو تفصیلات آن گیاں اوہ ایوان دے ساہمنے رکھیاں جان گیاں‘ ایوی ایشن نے سارے ڈاکومنٹس نیب نُوں فراہم کر دِتے تے اسیں نیب اُتے ایس حوالے توں کوئی دباء نہیں پا سکدے‘ پی آئی اے دا 90 فیصد بزنس ایجنٹ تے آن لائن کر رہے آں اسیں اپنے 15 دفاتر بند کر رہے آں تاں جے پی آئی اے دا بھار گھٹ ہووے۔