گورنر پنجاب ولوں پنجاب جانشینی آرڈیننس 2021 جاری ……٭رویل خبر٭

لاہور (نیوز ڈیسک) گورنر پنجاب ولوں پنجاب جانشینی آرڈیننس 2021 جاری کر دِتا گیا۔ آرڈیننس دے مطابق شہریاں نُوں جائیداد منقولا تے غیر منقولا لئی عدالت دے چکر نہیں لانے پین گے‘ وارث دے انتقال اُتے لواحقین نُوں صرف نادرا نُوں درخاست دینا پوے گی۔ نادرا دفتراں وچ جانشیناں دی سہولت لئی خصوصی کانٹر بنائے جان گے۔ نادرا درخاست وصولی اُتے 2 اخباراں وچ اشتہار جاری کرے گا‘ 14 دن وچ کسے نے اعتراض نہ کیتا تے جانشینی سرٹیفکیٹ جاری ہو جاوے گا۔ بائیو میٹرک تصدیق پاکستان یاں دنیا دے کسے وی شہر توں کیتی جا سکے گی‘ نادرا دا جانشینی سرٹیفکیٹ عدالتی فیصلا تصور ہووے گا۔ ایس توں وکھ گورنر پنجاب چودھری محمد سرور نے کہیا اے کہ اپوزیشن میٹنگز کردی رہ جاوے گی تے الیکشن 2023 آ جان گے۔ ملکی ترکی نُوں بریک لان دا مخالفین دا منصوبا کامیاب نہیں ہووے گا۔ انشاء اللہ اگلیاں عام چوناں وچ اوور سیز پاکستانی اپنا ووٹ کاسٹ کرن گے۔ اوور سیز پاکستانی ملک دا سرمایا نیں ایہناں دے مسئلیاں نُوں 100فیصد حل کیتا جاوے گا۔ ایہناں خیالاں دا اظہار گورنر پنجاب نے امریکا وچ رہن والے اوور سیز پاکستانیاں نال ملاقات دوران گلبات کردیاں ہویاں کیتا۔ ملاقات دے دوران اوور سیز پاکستانیاں نے تحریک انصاف دی حکومت ولوں اوور سیز پاکستانیاں دے مسئلیاں دے حل تے اوہناں نُوں ریلیف دین تے اوور سیز پاکستانیاں نُوں ووٹ دا حق دین د ے حکومتی فیصلے نُوں وی سلاہیا اے۔ گورنر پنجاب نے ہور کہیا کہ جدوں دی تحریک انصاف اقتدار وچ آئی اے‘ مخالفین ایہدے خاتمے دے دعوے کر رہے نیں پر حقیقت ایہ اے کہ وزیراعظم دی قیادت وچ حکومت متحد تے مستحکم اے سانوں اپوزیشن توں کوئی خطرا نہیں۔