تِن ورھیاں وچ دیس دی معاشی حالت تباہ، امن  دے دعوے ہوا، پی ڈی ایم نُوں بھرویں عوامی قوت نال متحرک کیتا جاوے گا: مولانا فضل الرحمان……٭رویل خبر٭

اسلام آباد (نیوز ڈیسک) پی ڈی ایم آگو مولانا فضل الرحمان نے کہیا اے کہ صرف سیاستدان ملک نہیں چلاندے‘ سیاستدان‘ بیورو کریسی تے اسٹیبلشمنٹ رَل کے چلاندے نیں‘ موجودا خرابیاں دور کرن لئی اسٹیبلشمنٹ نال ڈائیلاگ دا ہامی آں‘ پی ڈی ایم نُوں بھرویں عوامی قوت نال متحرک کیتا جاوے گا‘ 29 مئی نُوں پی ڈی ایم دا اگوائی اجلاس ہووے گا‘ پیپلز پارٹی تے اے این پی نُوں نہیں سدیا جاوے گا۔ پی ڈی ایم قیادت ای بَہ کے دوہاں جماعتاں بارے فیصلا کرے گی‘ پاکستان دی دھرتی تے فضاواں کسے دے خلاف استعمال کرن دی اجازت نہ دِتی جاوے‘ پیپلز پارٹی دی قیادت حالے میچیور نہیں اے کہ سیاستداناں دے پروٹوکول نُوں فالو کر سکے۔ ملک گیر سطح اُتے مدارس کنونشن سدے جان گے۔ ایہناں خیالاں دا اظہار اوہناں نے منگل نُوں جے یو آئی (ف) دی مرکزی مجلس شوریٰ دے اجلا س دے بعد میڈیا نال گلبات کردیاں ہویاں کیتا۔ مولانا فضل الرحمان نے کہیا کہ مرکزی مجلس شوریٰ دا اجلاس اسلام آباد وچ دو دن جاری رہیا۔ اجلاس وچ اہم قومی مسئلے غور ہیٹھ آئے۔ پی ڈی ایم نُوں بھرویں عوامی قوت نال متحرک کیتا جاوے گا۔ 29 مئی نُوں پی ڈی ایم دا اگوائی اجلاس سد لیاگیا۔ جمعیت پی ڈی ایم دے اجلاس وچ اپنیاں تجویزاں دیوے گی۔ ساریاں جماعتاں دی مشاورت دے بعد متفقا لائحے عمل طے کیتا جاوے گا۔ اوہناں نے کہیا کہ ملک اُتے دھاندلی دی پیداوار تے ناجایز حکومت مسلط اے۔ 3 سال وچ حکومت نے ملک دی معاشی حالت تباہ کر دِتی۔ 3 سال وچ ملک نُوں دیوالیا کر دِتا اے۔ غریب لوکائی اُتے مہنگائی دا پہاڑ سُٹ کے اوہناں دا لَک توڑ دِتا گیا اے۔ معیشت جمود دا شکار اے‘ نا اہلی دے کارن کسے بہتری دی توقع نہیں۔ مولانا فضل الرحمان نے کہیا کہ سوچے سمجھے نظریے دے تحت مغرب دی ننگی تہذیب فروغ دے کے معاشرے د ے حسن اُتے بدنما داغ لایا گیا۔ امن دے قیام دے دعوے ہوا ہو گئے‘ آئے دن دہشتگردی نال لوکاں دیاں جاناں جا رہیاں نیں۔ فاٹا وچ نواں نظام ناکام ثابت ہویا‘ اوتھوں بدامنی پور ے ملک وچ رَچ رہی اے۔ قبائل دے وچکار ہتھیار بند لڑائیاں نے عام بندے دا سکون کھوہ لیا اے۔ جے یو آئی وقف املاک ایکٹ نُوں قرآن و سنت دے منافی متھدیاں ہویاں رَد کردی اے۔ متروکا وقف قانون نُوں واپس لے کے شرعی حیثیت دے تعین لئی اسلامی نظریاتی کونسل گھلیا جاوے۔ نویں بورڈ ز دی منظوری دے کے مدرسیاں نے نظم و نصب نُوں توڑن دی بھونڈی کوشش کیتی۔ اوہناں نے کہیا کہ حکومت مدرسیاں دے نویں بورڈز راہیں مدرسیاں دے نظام نُوں تباہ کرنا چاہندی اے۔ جے یو آئی نال جُڑیا کوئی مدرسا کسے سرکاری بورڈ وچ رلت اختیار نہیں کرے گا۔ جے یو آئی وفاق المدارس العربیا نُوں مضبوط کرے گی۔ اسٹیبلشمنٹ دی کنڈ تھاپڑی وچ بنائے گئے بورڈ ماڈل مدرسا بورڈ دی طرز اُتے ناکام بناواں گے۔ ملک گیر سطح اُتے مدارس کنونشن سدے جان گے۔ اِک سوال اُتے مولانا فضل الرحمان نے کہیا امریکا نُوں ہوائی اڈے دین ملکی ازادی لئی خطرا اے۔ ایہو جہیا فیصلا 2001 وچ وی کیتا گیا سی تاں جے امریکا افغانستان وچ طالبان خلاف استعمال کر سکے۔ پاکستان دی دھرتی افغانستان خلاف استعمال ہونا ملک نُوں جنگ وچ سُٹن وانگوں اے۔ اوہناں نے کہیا کہ ایجنٹاں راہیں پاپولر نعرے لائے جاندے نیں۔ پہلے ای کہیا سی عمران خان ڈرون حملیاں دی مخالفت دا ڈراما کر رہیا اے۔ طالبان نے دوحا معاہدے وچ غیر ملکی فوجاں دا انخلاء منوا لیا سی۔ پہلے وی ریاستی سطح اُتے فریق بن کے جنگ دے شعلے اپنے ملک لیاندے جہڑے اج تک بھجائے نہیں جا سکے۔ دُبارا پاکستانی ہوائی اڈے دینا ملکی مفاددے خلاف تے جنگ نُوں دعوت دینا اے۔ ساڈی دھرتی تے فضاواں کسے خلاف استعمال کرن دی منظوری نہ دِتی جاوے۔ القاعدا ساری زندگی امریکا دے مفاد لئی زندا ہوندا رہوے گا‘ ایہ ڈرامے ہُن نہیں چلن گے ایہ سیاست ہُن پرانی ہو چکی۔ پرامن ماحول وچ ای معیشت نُوں ترقی دِتی جا سکدی اے۔ افغانستان توں نکل کے پاکستان وچ امریکا نُوں اڈے دِتے جا جا رہے نیں۔ پاکستان دی دھرتی تے فضاواں کسے دے خلاف استعمال کرن د اجازت نہ دِتی جاوے۔ کیہ القاعدا امریکا دے مفاد لئی زندا ہو جاندا اے؟۔ اِک ہور سوال اُتے مولانا فضل الرحمان نے کہیا کہ پیپلز پارٹی تے اے این پی نُوں کہیا اے کہ تُسیں پی ڈی ایم دی توہین کیتی اے۔ ایس توہین دا ازالا کرنا پوے گا۔ تحریک اصول دی بنیاد اُتے چلدی اے۔ پیپلز پارٹی تے اے این پی دیاں گلاں میڈیا وچ کھلاریاں گئیاں۔ پی ڈی ایم اگوائی اجلاس وچ پیپلز پارٹی تے اے این پی نُوں نہیں سدیا جاوے گا۔ پی ڈی ایم قیادت ای بَہ کے دوہاں جماعتاں بارے فیصلا کرے گی۔ پیپلز پارٹی تے اے این پی نُوں اگوائی اجلاس وچ سدن دی فی الحال کوئی تجویز نہیں اے۔ اوہناں نے کہیا کہ اسٹیبلشمنٹ نال مفاہمت یاں مزاحمت دا عنوان ای غلط اے۔ ساریاں نُوں آئین نے جہڑی حد دِتی اے اوہناں نُوں اوہدے وچ رہنا چاہیدا اے۔ فوج نے وی آئین دے تحت حلف چُکیا اے۔ سیاستدان صرف ملک نہیں چلاندے۔ سیاستدان‘ بیورو کریسی تے اسٹیبلشمنٹ رَل کے ملک چلاندے نیں۔ جہڑیاں خرابیاں ایہناں دی مداخلت دی وجا توں سیاست وچ آئیاں نیں اوہدے لئی مشاورت وچ کوئی قباحت نہیں اے۔ موجودا خرابیاں دور کرن لئی اسٹیبلشمنٹ نال ڈائیلاگ دا ہامی آں۔ اِک ہور سوال دے جواب وچ اوہناں نے کہیا کہ ضمنی الیکشن وچ واضح ہو گیا کہ اسٹیبلشمنٹ کردار ادا کرے تے رزلٹ کیہ ہوندا اے تے نہ کرے تے کیہ ہوندا اے۔ پیپلز پارٹی دی قیادت حالے میچیور نہیں اے کہ سیاستداناں دے پروٹوکول نُوں فالو کر سکے۔