ملک وچ کرونا نال ہور 92 روگی زندگی دی بازی ہار گئے:نیشنل کمانڈ اینڈ اپریشن سینٹر……٭رویل خبر٭

اسلام آباد (نیوز ڈیسک) ملک وچ پچھلے دن کرونا دے ہور 2 ہزار 253 نویں روگی ساہمنے آئے نیں جد کہ 92 روگی انتقال کر گئے۔ نیشنل کمانڈ اینڈ اپریشن سینٹر ولوں جاری آنکڑیاں دے مطابق پچھلے دن پورے ملک وچ مجموعی طور اُتے 46 ہزار 726 کرونا ٹیسٹ کیتے گئے جد کہ 2 ہزار 253 بندیاں وچ ایس وائرس دی تشخیص ہوئی‘ ایس طرحاں ملک وچ کرونا مثبت کیسز دی مجموعی شرح 4.82 فیصد رہی۔ ملک وچ کرونا دے مصدقا روگیاں دی گنتی 9 لکھ 5 ہزار 852 ہو چکی اے جہناں وِچوں 8 لکھ 23 ہزار 157 روگیاں نے ایس وباء نُوں شکست دے دِتی اے۔ این سی او سی دے مطابق پچھلے دن ملک وچ کرونا نال ہور 92 روگی زندگی دی بازی ہار گئے جہنا ں وِچوں 45 روگی مختلف ہسپتالاں دے وینٹی لیٹرز اُتے سن‘ پچھلے دن پنجاب وچ کرونا دے 51‘ خیبر وچ 20‘ سندھ وچ 16 تے اسلام آباد وچ 1 روگی واصل ہویا۔ایس توں وکھ صوبا پنجاب وچ کرونا وائرس دے کیسز وچ کمی نُوں ویکھدیاں ہویاں لاہور سنے باقی سارے ضلعیاں وچ اگلے مہینے 7 جون توں سارے سکولاں نُوں کھولن دا فیصلا کر لیا گیا اے۔ ایس اہم فیصلے دی اطلاع صوبائی وزیر تعلیم مراد راس نے سماجی رابطیاں دی ویب سائٹ ٹویٹر راہیں اِک بیان وچ دِتی۔ اوہناں نے دَسیا کہ لاہور سنے باقی ضلعیاں وچ تعلیمی ادارے کھولن دے حوالے توں نیشنل کمانڈ اینڈ اپریشن سینٹر (این سی او سی) وچ مشاورت ہوئی۔ صوبائی وزیر تعلیم نے کہیا کہ ایس مشاورت دے بعد فیصلا کیتا گیا کہ 7 جون توں باقی ضلعیاں وچ وی سارے سرکاری تے پرائیویٹ سکول کھول دِتے جان گے۔ مہربانی کر کے گورنمنٹ دے ایس او پیز اُتے عملدرآمد کیتا جاوے۔