حکومت بُہتے لوکاں نُوں بھرتی نہیں کرسکدی‘ نوجوان اپنے کاروبار ول توجا دین:وزیراعظم عمران خان ……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ حکومت بُہتے لوکاں نُوں بھرتی نہیں کرسکدی‘ نوجوان اپنے کاروبار ول توجا دین۔ اپنے اِک ویڈیو پیغام وچ وزیراعظم نے کہیا کہ نوجواناں دا مسئلا بیروزگاری اے‘ حکومت نُوں پنشن دا بہت مسئلا اے‘ زیادا تر ملکاں وچ لوک پرائیویٹ ملازمت یاں چھوٹے کاروبار کردے نیں۔ اوہناں دا کہنا سی کہ حکومت نوجواناں نُوں جدید ہنر سکھائے گی تاں جے ٹیکنالوجی دے شعبے وچ کم کر سکن۔ وزیراعظم نے کہیا کہ جہناں نوجواناں دے کول کاروباری آئیڈیاز نیں اوہ اپلائی کرن حکومت اوہناں نُوں قرضے دیوے گی۔ حکومت نوجواناں لئی 100 ارب رکھیا ہویا اے تے ہر سال ایہنوں ودھاواں گے۔ ساڈی کوشش اے کہ نوجواناں نُوں روزگار لے تے ایہ ملک نُوں وی اُٹھا سکن۔ وزیراعظم نے ہدایت کیتی کہ نوجوان حکومت دے ہنر پروگرام توں فایدا چُکن تے جدید ہنر سکھ کے ملک تے قوم دی ترقی وچ حصا پان۔ ایس توں وکھ وفاقی کابینا دے اجلاس بعد وزیر منصوبا بندی اسد عمر دے نال میڈیا نُوں بریفنگ دیندیاں ہویاں وزیر اطلاعات فواد چودھری نے کہیا کہ ملکی تواریخ وچ پہلی وار وفاقی کابینا دا اجلاس کاغذاں دے بغیر ہویا‘ پی ٹی آئی دے 3 سالا دور وچ وفاقی کابینا دے ریکارڈ 227 اجلاس ہوئے جد کہ ایس توں پہلاں ووٹ نُوں عزت دین والیاں ن لیگ دے دور وچ صرف 23 تے پیپلز پارٹی دے دور وچ 87 اجلاس ہوئے۔ اوہناں نے کہیا کہ وفاقی کابینا اجلاس وچ سی پیک منصوبے نال جڑے چینی شہریاں لئی خصوصی وزیا پروسیجر بنان دا فیصلا کیتا گیا اے‘ سی پیک نال جُڑے چینی شہریاں نُوں 48 گھنٹیاں وچ 2 سال دی مدت لئی ویزا جاری ہووے گا تے 30 دن وچ سیکیورٹی کلیئرنس ہووے گی‘ کابینا نے کنٹونمنٹ بورڈ وچ انتخاب کروان دا فیصلا کیتا اے تے ایہدے لئی شیڈول جاری کرن دی ہدایت جاری کر دِتی اے‘ ایہدے علاوا کابینا نے کرونا بارے سامان بوسنیا گھلن دا فیصلا وی کیتا اے۔ وزیر اطلاعات فواد چودھری نے کہیا کہ کابینا نے کالعدم قرار مِتھی جان والی جماعت تحریک لبیک پاکستان (ٹی ایل پی) دی نظرثانی اُتے مشتمل درخاست اُتے وزارت داخلا دے تحت کمیٹی بنان دی منظوری دے دِتی اے۔ انسداد دہشتگردی ایکٹ دے تحت ٹی ایل پی دی نظرثانی دی درخاست دا جایزا لیا گیا۔ وزیر اطلاعات نے کہیا کہ چیف ایگزیکٹو افسر پاکستان ہاؤسنگ اتھارٹی فاؤنڈیشن تعینات کرن دی سمری مؤخر کر دِتی اے۔ الیکشن کمیشن نُوں بیرون ملک پاکستانیاں نُوں ووٹ دے دھارے وچ لیان لئی اقدامات کرنے چاہیدے نیں‘ الیکشن کمیشن دی کارروائی دے منتظر آں‘ بیرون ملک پاکستانیاں نُوں ووٹ دا حق دینا تحریک انصاف دے ایجنڈے دا حصا اے۔ وزیر اطلاعات نے کہیا کہ وزیراعظم عمران خان نے مسئلا فلسطین نُوں عالمی سطح اُتے اجاگر کرن اُتے وزیر خارجا شاہ محمود قریشی دیاں کوششاں نُوں سلاہیا اے‘ مسئلا کشمیر اُتے ہون والی ٹورا کاری اُتے وزیر خارجا تے اوہناں دی ٹیم دی کمکاری دی وی تعریف کیتی گئی‘ کابینا افغان ٹرانزٹ ٹریڈ معاہدے وچ 6 مہینیاں دی توسیع دِتی اے۔ ایس موقع اُتے وفاقی وزیر منصوبا بندی اسد عمر نے کہیا کہ کرونا وباء دے دوران احساس پروگرام راہیں 200 ارب رُپئے ونڈے گئے نیں‘ ملکی معیشت وچ استحکام آ رہیا اے‘ سمارٹ لاک ڈاؤن پالیسی دی وجھا توں کرونا دے باوجود معیشت وچ بہتری آئی۔ معیشت دے نال لوکاں دے جان تے مال دی حفاظت ترجیح سی۔ وفاقی وزیر نے کہیا کہ کرونا نال نبڑن لئی پاکستان دی سمارٹ لاک ڈاؤن دی پالیسی دی دنیا نے تعریف کیتی۔ احساس کفالت پروگرام دے تحت پیسیاں دی ونڈ نال لوکاں دے کول پیسا آیا۔ اسد عمر نے کہیا کہ وزیراعظم نے کمزور طبقے لئی اقدامات کیتے۔ پاکستان دی ادھی ابادی زراعت نال جڑی اے۔ کپاہ دی فصل چنگی نہیں ہوئی‘ سبھ توں ودھ پیداوار کنک دی فصل دی ہوئی اے۔