kraamaat@gmail.com
+ +92 333-430-6384


اسیں صرف پیپلز پارٹی تے ایہدے جیالیاں نُوں جواب دہ آں: بلاول بھٹو زرداری ……٭رویل خبر٭


نمائندا رویل May 27, 2021


حیدر آباد (نیو ز ڈیسک) چیئرمین پاکستان پیپلز پارٹی بلاول بھٹو زرداری نے کہیا اے کہ شہبا ز شریف مسلم لیگ (ن) دے صدر تے قائد حزب اختلاف نیں‘ شہباز شریف جو کہن گے‘ اوہناں دے بیانیے تے مؤقف نُوں مسلم لیگ دی پالیسی سمجھاں گے تے ایہدے اُتے سیاست کراں گے‘ پی ڈی ایم بارے میرے مؤقف وچ کوئی تبدیلی نہیں آئی‘ اسیں نہ مریم شریف نُوں جواب دہ آں نہ میاں صاحب نُوں‘ اسیں پیپلز پارٹی تے ایہدے جیالیاں نُوں جواب دہ آں تے جیالیاں دے نال رَل کے سیاست کراں گے‘ پانی دے معاملے اُتے پاکستان وچ نا انصافی کیتی جا رہی اے‘ سندھ دے علاقیاں نُوں زراعت لئی پانی نہیں مِل رہیا‘ اسیں پی ٹی آئی۔ آئی ایم ایف بجٹ دی مخالفت کراں گے‘ ایہ بجٹ پاکستان دی معیشت تے غریب لوکائی دے مفاد وچ نہیں اے‘ وفاقی حکومت دی نالایقی تے نا اہلی دی وجھا توں پاکستان دی لوکائی مہنگائی دی سونامی وچ ڈُب رہی اے‘ اسیں اودوں تک چین نال نہیں بَہواں گے جدوں تک پاکستان دا بجٹ لوکائی دوست بجٹ نہ ہووے۔ ایہناں خیالاں دا اظہار اوہناں نے ضلع بدین دے تعلقا ماتلی دے پنڈ پھلکارا وچ بشیر احمد ہالیپوٹو دے انتقال اُتے نومنتخب رکن سندھ اسمبلی ڈاڈا محمد ہالیپوٹا تے شہزاد ہالیپوٹا نال تعزیت دے بعد پریس کانفرنس نال خطاب کردیاں ہویاں کیتا۔ بلاول نے کہیا کہ پی پی بدین دی لوکائی دی شکر گزار اے جہناں نے سانوں ضمنی چوناں وچ تواریخی کامیابی دلوائی‘ بدین دی لوکائی نے ماضی وچ شہید ذوالفقار علی بھٹو تے شہید محترما بے نظیر بھٹو دا ساتھ دِتا تے اج اوہ ای لوکائی ساڈے نال اے۔ بدین دی لوکائی نے ووٹ دی طاقت نال ایہ پیغام دِتا کہ پی پی پی ای اوہ کلّی جماعت اے جہڑی پاکستان دی غریب لوکائی دی نمایندا جماعت اے‘ جہڑی غربت‘ مہنگائی تے بیروزگاری دا مقابلا کر سکدی اے۔ ایہو وجھا اے کہ بدین دے ضمنی انتخابات وچ پیپلز پارٹی نے بھاری اکثریت نال کامیابی حاصل کیتی اے۔ اوہناں نے کہیا کہ پاکستان پیپلز پارٹی لوکائی دے نال رَل کے غریب دوست پالیسیز بنا کے لوکائی نُوں ریلیف مہیا کرے گی جد کہ نویں مؤثر معاشی منصوبے شروع کر کے غربت تے بیروزگاری دا خاتما کیتا جاوے گا۔ بلاول نے ہور کہیا کہ پاکستان وچ پانی دا مسئلا پرانا اے تے ماضی دیاں غلطیاں دیو جھا توں اسیں 3 دریا گوا دِتے۔ اِک پاسے بھارت ولو ں پانی دے معاملے وچ ساڈے نال نا انصافی کیتی جا رہی اے تے دوجا وفاقی حکومت ولوں وی سندھ نُوں ایہدے حصے دا پانی نہیں دِتا جا رہیا۔ ایس حوایل توں بدین‘ ٹھٹھا تے سجاول دی لوکائی نُوں پانی دی ڈاڈھی توڑ دا ساہمنا اے۔ اوہنا ں نے کہیا کہ 1991 وچ اوس ویلے دی سلیکٹڈ حکومت نے پانی دا اِک معاہدا طے کیتا سی جہدے وچ وی سندھ دے نال نا انصافی کیتی گئی سی پر اج ویلے دی حکومت اوس 1991 دے معاہدے اُتے وی عمل نہیں کر رہی تے اسیں جدوں وی پانی دے حقاں دی گل کردے آں تے وفاقی حکومت ساڈے نال لڑدی اے۔ پی ڈی ایم وچ دُبارا رلت دے حوالے توں کیتے گئے اِک سوال دے جواب وچ اوہناں نے کہیا کہ مولانا فضل الرحمان دے نال ساڈے چنگے تعلقات نیں پر پی پی پی اپنا اِک نظریا رکھدی اے جہدے توں اسیں ہٹنا نہیں چاہندے‘ اسیں چاہندے آں کہ ایس سلیکٹڈ تے نا اہل حکومت نُوں گھر گھلیے پر مسلم لیگ ن حکومت دی بجائے پاکستان پیپلز پارٹی نال لڑنا چاہندی اے تے اپنا شوق پورا کر لوے۔بلاول نے کہیا کہ وفاقی حکومت نُوں سندھ دے نال کوئی دلچسپی نہیں تے اوہ کہندے نیں کہ سند ھ ساڈا صوبا نہیں اے۔ اوہناں نے کہیا کہ امن امان پورے ملک دا مسئلا اے تے سندھ پولیس دے جوان باصلاحیت نیں تے اوہ سندھ وچ امن امان برقرار رکھن لئی اپنیاں ساریاں صلاحیتاں نُوں استعمال کردیاں ہویاں ریاستی قوانین دی خلاف ورزی کرن والیاں دے خلاف کارروائیاں وچ مصروف عمل نیں۔