سدھر اے کہ ہر شہری نُوں صحت کارڈ دی سہولت ملے: لیہ وچ صحت سہولت کارڈ دے اجرا دی تقریب نال وزیراعظم عمران خان دا خطاب……٭رویل خبر٭

لیہ (نمایندا رویل) وزیراعظم عمران خان نے کہیا اے کہ خاہش اے ہر شہری نُوں صحت کارڈ دی سہولت ملے‘ پنجاب تے خیبر و چ صحت دیاں مفت سہولتاں ملن گیاں‘ کمزور طبقے نُوں اُتے لیان لئی اقدامات کر رہے آں‘ لوکائی دی خدمت کیتی جاوے تے اللہ تعالیٰ خُش ہوندا اے۔ جدوں پاکستان قایم ہویا تے ایہنوں اسلامی فلاحی ریاست بننا سی پر اسیں کدی ایتھے فلاحی ریاست نہیں ویکھی۔ لیہ وچ صحت سہولت کارڈ دے اجرا دی تقریب نال وزیراعظم عمران خان دا خطاب کردیاں ہویاں کہنا سی کہ سرکاری ہسپتالاں وچ عام لوکائی لئی کوئی سہولت نہیں سی‘ چاہندا سی پنجاب دے ہر خاندان دے کول ہیلتھ کارڈ ہووے‘ پاکستان دنیا وچ تیزی دے نال ترقی کر رہیا سی‘ پاکستان نے اسلامی فلاحی ریاست بننا سی۔ اوہناں نے کہیا کہ برطانیا وچ ساریاں لئی اِک قانون اے‘ برطانیا دے شہریاں دا ہر سرکاری ہسپتال وچ مفت علاج ہوندا اے‘ برطانیا وچ روزگار ملن تک حکومت پیسے دیندی سی۔ پہلی وار فلاحی ریاست دا نظام برطانیا وچ ویکھیا‘ جدوں پاکستان قائم ہویا تے ایہنوں اسلامی فلاحی ریاست بننا سی پر اسیں کدی ایتھے فلاحی ریاست نہیں ویکھی۔ اوہناں نے دَسیا کہ جدوں میں 18 سال دی عمر وچ پہلی وار برطانیا گیا تے اوتھے 2 شیواں نظر آئیاں جو پاکستان وچ نہیں سن۔ پہلی شے قانون دی حکمرانی ویکھی‘ اوتھے کوئی شہزادا‘ شہزادی سنے کوئی وی قانون توں اُچا نہیں سی‘ دوجا پہلی وار فلاحی ریاست ویکھی جتھے کسے وی سرکاری ہسپتال وچ مفت علاج ہوندا سی۔ حالاں جے اوس ویلے پاکستان دنیا وچ اِک مقام رکھدا سی تے تیزی نال ترقی کر رہیا سی‘ دنیا وچ ساڈیاں مثالاں دِتیاں جاندیاں سن تے دنیا وچ کدھرے وی جان لئی پاکستانیاں نُوں ویزیاں دی لوڑ نہیں ہوندی سی۔ اوہناں دا کہنا سی کہ اوس ویلے میں پہلی وار سمجھیا کہ فلاحی ریاست ہوندی کیہ اے۔ اوہناں نے کہیا کہ برطانیا وچ کسے غریب بندے دے نال نا انصافی ہووے تے عدالت وچ جان اُتے اوہنوں انصاف ملدا اے‘ جے اوہدے کول پیسا نہیں تے اوہ سرکاری سکولاں وچ جاندا اے تے اوہدے بالاں نُوں مفت تعلیم ملدی تے اوہ تعلیم جہڑی اوہنوں ملک دا وزیراعظم بنا سکے جد کہ ساڈے سرکاری سکولاں وچ جہڑی تعلیم ملدی اے اودے نال کدی غریب دا بچا اگے نہیں آ سکدا۔ اوہناں نے ہور کہیا کہ جے کوئی بیروزگار ہوندا تے حکومت اوہنوں پیسے دیندی تے سبھ توں وڈی نعمت اوتھے مفت علاج سی۔ وزیراعظم نے کہیا کہ جے کسے غریب یاں سفید پوش دے گھر وچ بیماری ے علاج دا پیسا نہ ہووے تے صرف اوہ جاندا اے کہ اودا گھر کہڑے عذاب توں لنگھدا اے‘ شوکت خانم ہسپتال وی ایسے لئی بنایا کہ والدا دے علاج لئی گیا تے اوتھے کینسر دا روگی ملیا سی جہدے کول دوائی دے پیسے نہیں ہو پا رہے سن۔ اوہناں نے کہیا کہ اوس ویلے میں سوچیا کہ اللہ نے کدی ملک دا اقتدار دِتا تے سبھ توں پہلے لوکاں لئی ایہ کم کرنا اے کہ بیماری دی صورت وچ اوہناں نُوں پیسے دی فکر نہ ہوے‘ ایس لئی اج ہیلتھ انشورنس دا اعلان کرن میں اج لیہ آیا آں۔وزیراعظم نے صحت انصاف کار ڈ دی تقریب نال خطاب کردیاں ہویاں کہیا کہ ملک وچ ہُن تک ایہ ہوندا رہیا کہ مرکزی شہراں لاہور‘ اسلام آباد وچ بُہتا پیسا خرچ کیتا گیا جد کہ باقی دور دُراڈے علاقیاں وچ خرچ نہیں کیتا گیا‘ ایہدے نال نقصان ہویا کہ شہراں وچ ابادی وچ بہت تیزی نال وادھا ہویا تے مناسب انتظامات نہیں کیتے گئے جہدے نتیجے وچ سیوریج سسٹم تے صفائی ستھرائی دے مسئلے پیدا ہوئے‘ غریب علاقیاں وچ پانی دی صورتحال بہت خراب اے‘ ضروری اے کہ ترقی وچ سبھ علاقیاں نُوں شامل کیتا جاوے۔ عمران خان نے کہیا کہ حال ای وچ ڈی جی خان وچ ڈاکوواں نے غریب بندے اُتے بڑا ظلم کیتا اے‘ آئی جی پنجاب پولیس انعام غنی تے رینجرز نُوں اج ای فون کراں گا کہ ایہناں داکوواں دے خلاف سخت ایکشن لین‘ اوتھے پولیس چوکی بناواں گے‘ ہُن ایہناں ڈاکوواں نُوں برداشت نہیں کراں گے جہڑے اینے عرصے توں مقامی لوکاں نُوں ظلم کر رہے نیں‘ جاندیاں ای فوری طور اُتے رینجرز نُوں پولیس دی مدد کرن دا حکم دواں گا۔ وزیراعظم عمران خان نے کہیا کہ موجودا حکومت وچ قومی احتساب بیورو (نیب) دی کمکاری بہترین رہی۔ حکومت مجرماں دی کنڈ تھاپڑی نہیں کردی‘ مسلم لیگ ن تے تحریک انصاف دے ادوار وچ اینٹی کرپشن تے نیب دی کمکاری وچ واضح فرق اے۔