نادرا بہت وڈی چور بازاری اے‘ اس ملک وچ کرپشن دے ڈھیر نیں:وفاقی وزیر داخلا شیخ رشید ……٭رویل خبر٭

کراچی (نمایندا رویل) وفاقی وزیر داخلا شیخ رشید نے کہیا اے کہ صوبا سندھ وچ نہ گورنر راج آ رہیا اے تے نہ ای اپریشن کرن جا رہے آں‘ کسے مشن اُتے نہیں آیا‘ امن و امان صوبے دا مسئلا اے‘ وزیراعظم دی ہدایت اُتے کراچی دے دور ے اُتے آیا آں‘ ایہو جہیا تاثر دِتا جا رہیا اے جویں سندھ سڑ رہیا اے۔ وزیراعظم عمران خان دی ہدایت اُتے وفاقی وزیر داخلا شیخ رشید احمد امن و امان دی صورتحال دا جایز الین لئی 2 دنا دورے اُتے کراچی پہنچ گئے نیں۔ کراچی پہنچن اُتے میڈیا نال گلبات کردیاں ہویاں وزیر داخلا نے کہیا کہ میں کسے مشن اُتے نہیں آں‘ امن و امان صوبے دے مائل اے تے اج دُپہر گورنر سندھ نال ملاقات کر کے نادرا دا دورا وی کراں گا۔ اوہناں دا کہنا سی کہ نادرا بہت وڈی چور بازاری اے‘ اس ملک وچ کرپشن دے ڈھیر نیں تے نویں چیئرمین دے نال رَل کے ایہناں دا صفایا کرنا اے۔ وزیر داخلا نے کہیا کہ میں وزیر اعلا مراد علی شاہ دا احترام کردا آں پر میں غیر ذمے دار نہیں آں تے وزیراعظم نُوں حقایق اُتے مبنی رپورٹ پیش کراں گا۔ اوہناں نے کہیا کہ ایہ جہڑا تُسیں کَہ رہے اوہ کہ گورنر راج آ رہیا اے یاں اسیں اپریشن کرن جا رہے آں تے ایہو جہیا کجھ نہیں اے‘ رینجرز تے ایف سی نال گل کر کے معاملے نُوں بہتر کراں گے تے ایسے لئی سویرے 10 وجے مل رہے آں پر حتمی فیصلا عمران خان دا اے۔ اِک ہور سوال دے جواب وچ اوہناں نے کہیا کہ عمران خان دے دور وچ وزارت داخلا ولوں کسے چھرے دی بندوق دا لائسنس وی جاری نہیں ہویا‘ ایہ ایہناں دے دور وچ جاری کیتے گئے۔ ایس موقع اُتے اوہناں نے یقین دہانی کروائی کہ اوہ کراچی توں منشیات دا خاتما کرن گے تے اینٹی نارکوٹکس فورس دے آگو نال گل کرن گے۔ شیخ رشید نے کہیا کہ میں عمران خان دی ٹیم دا اِک وزیر آں‘ وزیراعظم نے اسد عمر تے گورنر سندھ دے کہن اُتے مینوں حکم دِتا کہ میں کراچی جاواں تے اوہناں نُوں رپورٹ کراں‘ جہنے مینوں آرڈر دِتا اے میں اوہنوں رپورٹ جمع کراواں گا۔ اوہناں دا کہنا سی کہ امن و امان صوبے دا مسئلا اے‘ جو وزیر اعلا کہن گے‘ امن و امان دے قیام لئی سارے سندھ نُوں صاف کراں گے تے امن دا گہوارا بناواں گے۔ وزیر داخلا نے واضح کیتا کہ میں سندھ دے مسئلے دی گل کرن نہیں سگوں امن و امان اُتے گل کرن آیا آں نہ کسے دی وزارت وچ مداخلت کردا آں تے نہ ای کسے نُوں اپنی وزارت وچ دخل دین دینداآں۔