کرونا نال ہور 67 روگی واصل،وزارت صحت ولوں دیس وچ جنوبی افریقی کرونا وایرس دی تصدیق کر دتی……٭رویل خبر٭

اسلام آباد (نیوز ڈیسک) پورے ملک وچ کرونا دے کارن ہور 67 بندے واصل ہو گئے جد کہ فعال کیساں دی گنتی وچ کمی واقع ہوئی اے ایہدے علاوا ملک وچ کرونا دے 2 ہزار 482مثبت کیسز رپورٹ ہوئے نیں‘ ایس طرحاں پاکستان وچ کرونا دے مصدقا روگیاں دی گنتی 913,784 ہو گئی اے۔ سرکاری آنکڑیاں مطابق ایس ویلے پورے ملک وچ کرونا دے فعال روگیاں دی گنتی 58 ہزار 611 اے جد کہ 4 ہزار توں ودھ روگیاں دی حالت ماڑی اے۔ پچھلے 24 گھنٹیاں دے دوران پورے ملک وچ کرونا نال ہور 67 روگی واصل ہو گئے نیں جہدے بعد ہُن ایس وباء نال واصل ہون والے روگیاں دی گنتی مجموعی طور اُتے 20 ہزار 607 ہو گئی اے۔ این سی او سی دے مطابق کرونا توں 1 دن وچ 2 ہزار 822 روگی صحت یاب ہوئے جہدے بعد صحت یاب ہون والے روگیاں دی گنتی 834,566 ہو گئی اے۔ دوجے پاسے وزیراعظم عمران خان دے پچھلے معاون خصوصی برائے صحت ڈاکٹر ظفر مرزا نے کرونا ویکسین لان دے بعد 2 سال وچ مرن دی افواہ نُوں بلکل جھوٹھ مِتھ دِتا اے۔ ڈاکٹر ظفر مرزا دا کہنا سی کہ اوہناں نے آپ ایس خبر دی تحقیق کیتی اے۔اوہناں نے دَسیا کہ کرونا ویکسین لان دے بعد 2س ال وچ مرن دی افواہ جہڑے بندے دے ناں نال چل رہی اے اوہناں نے آپ ای ایہدی تردید کر دِتی اے۔ پچھلے معاون خصوصی برائے صحت دا کہنا سی کہ ایمرجنسی دی صورتحال وچ ایس طرحاں دیاں منفی خبراں چھیتی وائرل ہو جاندیاں نیں۔ ڈاکٹر ظفر مرزا دا کہنا سی کہ حکومت نُوں وی ایس بارے وچ واضح رد عمل دینا چاہیدا اے۔ اوہناں نے لوکائی توں درخاست کیتی کہ افواہاں نُوں اگے نہ ودھان تے خدا دا واسطا ویکسین لازمی لگوان۔ ایس توں وکھ وزارت صحت نے پاکستان وچ بھارتی تے جنوبی افریقی کرونا وائرس دی موجودگی دی تصدیق کر دِتی اے۔ اسلام آباد توں جاری ہون والے بیان وچ وزارت صحت ولوں کہیا گیا اے کہ نیشنل انسٹیٹیوٹ آف ہیلتھ (این آئی ایچ) وچ بھارتی تے جنوبی افریقا کرونا وائرس دی تصدیق ہوئی اے‘ جنوبی افریقی ویرئینٹ دے 7 کیسز تے اِک بھارتی ویرئینٹ دا کیس پایا گیا اے۔ وزارت صحت مطابق ایہناں کیساں دی تصدیق مئی دے پہلے 3 ہفتیاں دے دوران این آئی ایچ وچ اکٹھے کیتے گئے کرونا کیسز دے نمونیاں وچ ہوئی‘ ایہناں کیساں دی اسالم آباد وچ کنٹیکٹ ٹریسنگ کیتی جا رہی اے‘ کنٹکٹ ٹریسنگ قائدیاں ضابطیاں دی تحت کیتی جا رہی اے۔