نوّے(90) دن وچ سبھ ٹھیک کرن دین والے عمران خان اج 33 مہینے تے 11 دن لنگھن دے بعد وی کجھ نہ کر سکے: بلاول بھٹو زرداری……٭رویل خبر٭

اسلام آباد (بیورو رپورٹ) پاکستان پیپلز پارٹی دے چیئرمین بلاول بھٹو زرداری نے کہیا اے کہ 90 دن وچ سبھ ٹھیک کرن دین والے عمران خان اج 33 مہینے تے 11 دن لنگھن دے بعد وی کجھ نہ کر سکے تے اگلے 813 دناں وچ وی اوہ کجھ نہیں کر سکن گے۔ اپنے اِک بیان وچ بلاول نے کہیا کہ 3 سالا اقتدار نے عمران خان نُوں بُری طرحاں بے نقاب کر دِتا اے‘ لوکائی سمجھ چکی اے کہ ایہناں نُوں تبدیلی دے ناں اُتے دھوکھا دین دی کوشش کیتی گئی‘ سائیکل ولے وزیراعظم دے قصے سنا کے عمران خان نے لوکائی دیاں اکھاں وچ مٹی پان دی کوشش کیتی تے ملک دا مستقبل داء اُتے لا دِتا۔ بلاول نے کہیا کہ 3 سالاں وچ تیجا مشیر خزانا لے آئے‘ ایف بی آر دے چار تے بورڈ آف انوسٹمنٹ دے 3 چیئرمین بدل دِتے پر عمران خان معیشت وچ سدھار نہیں لیا سکے‘ 3 سالاں وچ چوتھا سیکریٹری تجارت وی بدل دِتا پر عمران خان لوکائی دی تقدیر بدلن وچ ناکام ہو گئے۔ بلاول ن کہیا کہ وزیراعظم صاحب! ملکی معیشت کسے نُوں ہٹان یاں لان نال بہتر نہیں ہوندی سگوں قائدانا صلاحیتاں نال ملک اگے ودھدا اے‘ عمران خان دے ٹیم ورک دا ایہ المیااے کہ معاشی ٹیم اِک دن فیصلا کردی اے تے اگلے دن کابینا اوس فیصلے نُوں رَد کر دیند ی اے۔بلاول نے کہیا کہ پاکستان پیپلز پارٹی ملک دی اوہ کلی جماعت اے جہدیاں معاسی پالیسیاں لوکائی دوست نیں‘ مستقبل وچ نوجواناں نُوں جے کوئی روزگار فراہم کر سکدا اے تے اوہ صرف پاکستان پیپلز پارٹی اے‘ اج ویلے نے ثابت کر دِتا کہ پاکستان پیپلز پارٹی دیاں معاشی تے زرعی پالیسیاں ملک دے بہترین مفاد وچ رہیاں نیں۔