ارسا دا پنجاب تے سندھ دے پانی وچ گھاٹ دا فیصلا ……٭رویل خبر٭

اسلام آباد (نیوز ڈیسک) ارسا نے پنجاب تے سندھ لئی پانی وچ ہور کمی کر دِتی جد کہ بلوچستان تے خیبر پختونخوا نُوں شارٹ فال توں استثنا دے دِتا گیا۔ اسلام آباد وچ پانی دے مسئلے اُتے انڈس ریور سسٹم اتھارٹی (ارسا) دا اہم اجلاس ہویا جہدے وچ صوبیاں دے حصیاں وچ ہور کٹوتی کر دِتی گئی۔ پنجاب تے سندھ نُوں پانی دی فراہمی وچ 32 فیصد کمی کر دِتی گئی۔ دوہاں صوبیاں نُوں پانی دیف راہمی وچ ایس توں پہلاں 23 فیصد کمی سی۔ اج توں پنجاب نُوں 83 ہزار تے سندھ نُوں 74 ہزار کیوسک پانی فراہم کیتا جاوے گا۔ آبی ذخائر وچ پانی دی کمی دا سلسلا بتدریج جاری اے۔ ارسا ولوں آبی ذخائر دے آنکڑے جاری کیتے گئے جہدے مطابق 24 گھنیاں وچ آبی ذخائر وچ 60 ہزار ایکڑ فٹ دی کمی ہو گئی تے اج پانی دا مجموعی ذخیرا 6 لکھ 72 ہزار ایکڑ فٹ رہ گیا اے۔ پچھلے دن آبی ذخائر وچ 7 لکھ 32 ہزار کیوسک پانی سی۔ 24 گھنٹیاں وچ تربیلا وچ 5 ہزار ایکڑ فٹ پانی گھٹ ہو گیا جہدے نتیجے وچ 71 ہزار توں گھٹ ہو کے 66 ہزار ایکڑ فٹ اُتے آ گیا اے۔ منگلا وچ پانی دے ذخیرے وچ 25 ہزار کیوسک دی کمی ریکارڈ کیتی گئی جد کہ چشما وچ پانی دے سٹوریج وچ 30 ہزار ایکڑ فٹ دی کمی ہوئی۔