ترک لوک کہانی"درویش"/لکھاری: حسنو یلدز(ترجما: عدیل محمود کاشر)ـــــ رویل

بہت سمیاں پہلے دی گل اے کہ اِک درویش تے اِک بُڈھی اماں رہندے ہوندے سن۔ درویش ہر دیہاڑ بڈھی اماں تے گھر جاندا تے آکھدا سی "وڈی اماں! سبھ کردے نیں، اپنے آپ نال کردے نیں، اپنے آپ نال ہی کردے نیں۔

" وڈی اماں ایس درویش توں بالھی تنگ پے گئی سی۔ "میں ایس درویش تو تنگ آں! کاش میں ایندے کولوں بچ جاواں!"

کہندی ہوندی سی۔ اِک دن وڈی اماں نے ولاواں والی روٹی بنائی تے اوس وچ زہر پا دتا سی۔ "میں ایس درویش نوں کھواواں گی تے فیر اوہنوں پتا لگےگا" " وڈی اماں نے آکھیا۔ اوس دن درویش فیر آ گیا سی:

"میں آ گیا وڈی اماں۔ سبھ کردے نیں، اپنے آپ نال کردے نیں، اپنے آپ نال ای بس کردے نیں"کہندا رہیا۔ وڈی اماں نے زہروالی روٹی درویش نوں دے دتی۔ درویش فیر جاندے ہوئے کہیا " وڈی اماں سبھ کردے نیں، اپنے آپ نال کردے نیں، اپنے آپ نال ای کردے نیں" کہہ کے چلا گیا۔ ٹُردیاں ٹُردیاں اِک ایسی تھاں اپڑ گیا سی جتھے فوج دے سپاہی لتھدے سن۔ وڈی اماں دا پتر وی فوج وچ سی۔ اتے او ہ چھٹی تے گھر آ گیا سی۔ اوس نوں بالھی بھکھ تنگ کر رہی سی جویں اوس دے ڈِھڈ وچ چوہے دھمال پا رہے ہون۔سامنیوں ایک درویش دے ہتھ وچ کجھ شے پھڑے آوندیا ں ہویاں و یکھیاتے آکھیا:

"چاچا درویش ایہ کیہ اے؟" مینوں بالھی بھکھ لگی اے، تیرے ہتھ وچ جہڑی روٹی اے مینوں دے دے"" منت کیتی۔ درویش نے وی اوہ زہر والی روٹی دے دِتی۔ نوجوان نے روٹی کھادی تے اوس دی طبیعت خراب ہونا شروع ہو گئی۔ اوہ بڑی مشکل نال گھر اپڑیا۔

وڈی اماں اپنے پتردی اے حالت ویکھدی ہویاں بولی "کیہ ہویاا ی میرے پت نوں، تینوں کیہ ہویا" کہندے ہوئیاں سینا پٹِنا شروع کر دتا۔

پتر دسن لگا" مینوں بالھی بھکھ لگی سی، سامنیوں اک درویش آ رہیا سی۔میں اوس دے ہتھ وچ جہڑی روٹی سی اوہ منگی سی۔ اوس نے وی دے دتی سی۔ میں اوس نوں کھا لیا سی۔ ایویں لگدا اے کہ روٹی وچ زہر سی۔ میری جان نکلدی پئی اے۔"

اوس دی ماں بولی: "ہائے میرے سوہنے لعل! او ہ روٹی میں ای پکائی سی، درویش نوں زہر دینا چاہندی ساں۔ ہائے، ایہ کیہ ہو گیا۔کہندی ہوئی تدبیراں کرنیاں شروع کر دتیا ں۔ اوس دے پتر نے اوہدے ہتھاں وچ ای ساہ چھڈ دتا سی۔ وڈی اماں نے اپنے گوڈیاں تے ہتھ مارنے تے سر دے والاں نوں پُٹنا شروع کر دتا سی۔

درویش نے جو آکھیا سی، کیہ اوہ سچ نہیں سی؟ درویش اوہنوں کہیا: "وڈی اماں! سبھ کردے نیں، اپنے آپ نال کردے نیں، اپنے آپ نال ای کردے نیں"

نہیں سی آ کھیا؟ وڈی اماں نے وی اپنے پیراں تے آپے کلہاڑی ماری سی۔ کہندے نیں ابو جاہل وی اپنے کڈھے ہوئے کھوہ وچ ڈگ پیا سی۔ وڈی اماں نے وی اپنے آپ نوں آپے ای کھوہ وچ سُٹ دِتا سی۔