جوہی چاولا فائیو جی ٹیکنالوجی خلاف میدان وچ آ گئے ……٭رویل خبر٭

ممبئی (نیوز ڈیسک) بھارتی اداکارا جوہی چاولا نے اپنے ملک وچ فائیو جی ٹیکنالوجی دے استعمال دے خلاف مقدما درج کروا دِتا۔ بھارتی میڈیا رپورٹاں مطابق ٹیکنالوجی دی ریس وچ بھارت وی دنیا دے نال کھلون دی کوشش کر رہیا اے تے ایہو جہے حالات وچ جتھے ترقی یافتا ملکاں وچ فائیو جی دی ٹیسٹنگ شروع ہو گئی اے اوتھے بھارت نے وی ملک و چ فائیو جی ٹیکنالوجی استعمال کرن دا فیصلا کیتا اے پر بھارتی اداکارا جوہی چاولا ایس فیصلے دے خلا ف عدالت پہنچ گئے۔ بالی ووڈ اداکارا جوہی چاولا دا شمار اوہناں کجھ فنکاراں وچ ہوند ااے جو ودھ تو ں ودھ رُکھ لان سنے ماحول دوست اقدامات اُتے زور دیندے نیں‘ ایس لئی اداکارا اپنے ملک وچ فائیو جی ٹیکنالوجی دے استعمال توں خُش وکھائی نہیں دیندے تے اوہناں نے ایس ٹیکنالوجی دے استعمال نُوں روکن لئی عدالت دا بوہا کھٹکھٹایا اے۔ اِک انٹرویو وچ اداکارا جوہی چاولا نے کہیا کہ میں بھارت دی ترقی یاں فیر ملک وچ ٹیکنالوجی دے استعمال وچ ترقی دے خلاف نہیں سگوں میں تے آپ جدید ٹیکنالوجی نُوں استعمال کرن دے حق وچ آں تے میرے سنے سارے لوک ایہدے توں فایدا چُکدے نیں پر کجھ شیواں اُتے اعتراض اے۔