نظم / صغیر تبسم ـــــ رویل

اساں پانی پنج دریاواں دے

ساڈے اندر چھلاں یار دیاں

آ چپ دے جندرے توڑ کے

کجھ گلاں کرئیے پیار دیاں

اساں پانی پنج دریاواں دے

اساں کندھاں چیر کے لنگھ جانا

اساں گنجھل مار کے سوچاں نوں

کتِے سولی اتے ٹنگ جانا

اساں پانی پنج دریاواں دے

ساڈے اندر مہک گلاباں دی

ساڈی مٹی سچل نشیاں دی

مت دیے مار شراباں دی

اساں پانی پنج دریاواں دے

ساڈے اندر مست نشانیاں

اساں مر نہیں سکدے دھرتی تے

ساڈے اندر عشق کہانیاں۔۔۔۔۔۔۔!