رنبیر کپور نے ہُن تک ویاہ نہ کرن دی وجھا دَس دِتی ……٭رویل خبر٭

ممبئی (نیوز ڈیسک) فلم ”روک سٹار“ دے ہیرو رنبیر کپور نے ہُن تک ویاہ نہ کرن دی وجھا دَس دِتی۔ انڈیا میڈیا رپورٹاں مطابق اداکارا نے کہیا اے کہ اوہناں نے 20 سال دی عمر توں ای ویاہ کرن دے بارے وچ سوچ وچار شروع کر دِتی سی پر اوہناں دے نیڑلے سنگی نے اوہناں نُوں اِنج کرن توں روکیا۔ رپورٹاں مطابق رنبیر کپور نے فلم ”یہ جوانی ہے دیوانی“ دے ٹریلر لانچ ہون دے بعد توں ویاہ تے ہون والے بالاں دے بارے سوچنا شروع کر دِتا سی پر جدوں اوہناں نے اپنے دوست فلمساز ایان مکر جی نُوں ایس بارے وچ دسیا تے ایان نے ویاہ نہ کرن دا مشورا دِتا۔ ایان مکر جی نے اداکار نُوں کہیا کہ ’ایس ویلے اسیں ایہو جہے موڑ اُتے آں جتھے سانوں ویاہ دے بارے وچ بُہتا نہیں سوچنا چاہیدا اے‘ اِک وار پیار ہو جاے تے فیر ویاہ تے ایہدے بعد بچے ہو ای جاندے نیں‘ ایہ اِک قدرتی عمل اے‘۔ رنبیر کپور ایس مشورے اُتے ایان مکر جی دا شکریا ادا کردے نیں کہ ایان نے اوہناں نُوں صحیح مشورا دِتا۔