حکومت بجٹ وچ بھار ے ٹیکس لا کے معاشی بھار پانا چاہندی اے:بلاول بھٹو زرداری ……٭رویل خبر٭

اسلام آباد (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے کہیا اے کہ بجٹ 2021 وچ گھٹ آمدنی والا طبقا عمران خان دے نشانے اُتے اے‘ پی ٹی آئی حکومت بجٹ وچ بھار ے ٹیکس لا کے معمولی تنخاہواں وصول کرن والیاں اُتے معاشی بھار پانا چاہندی اے تے پاکستان پیپلز پارٹی بجٹ وچ عام بندے نُوں معاشی طور اُتے مِدھن دی سازش نُوں ناکام بنائے گی۔ اپنے اِک بیان وچ چیئرمین پیپلز پارٹی بلاول دا کہنا سی کہ ایس پی آئی انڈکس دے تحت ملک وچ پہلے ای مہنگائی دی شرح 20 فیصد تک دی بلندی نُوں ہتھ لا رہی اے‘ جے بدترین مہنگائی دے دور وچ تنخاہ دار طبقے نُوں ٹیکساں وچ جکڑ دِتا گیا تے ایس توں وڈا کوئی ہور ظلم نہیں۔ اوہناں نے کہیا کہ عمران خان امیراں نُوں ایمنسٹی سکیماں دے کے تے غریباں توں ٹیکس وصول کر کے اپنی لوکائی دشمنی ثابت کر رہے نیں تے اوہ مہنگائی توں پریشان عام بندے اُتے پی ٹی آئی ایم ایف بجٹ وچ ارباں رُپئے دے ٹیکس لان دی منصوبا بندی نُوں رَد کردے نیں۔ پی ٹی آئی سرکار جس رفتار نال معاشی ترقی دے دعوے کر رہی اے‘ اوس توں ڈبل رفتار نال ملک وچ بیروزگاری ودھ رہی اے۔