سمجھ نہیں آ رہی لوکاں ویاہ کیوں کرنا اے؟: ملالا یوسفزئی……٭رویل خبر٭

لندن (نیوز ڈیسک) پڑھیارناں دی تعلیم بارے اواز اُچی کرن والی گھٹ عمر ترین نوبل انعام یافتا ملالا یوسفزئی نے کہیا اے کہ کسے نُوں اپنی زندگی وچ رکھن لئی ویاہ دے کاغذاں اُتے دستخط کرن دی کیہ ضرورت اے؟‘ مینوں حالے تک سمجھ نہیں آ رہی کہ لوکاں ویاہ کیوں کرنا ہوندا اے‘ جے تُسیں اپنی زندگی وچ کسے دے نال رہنا چاہندے او تے نکاح نامے اُتے دستخط کرن دی کیہ ضرورت اے؟ صرف پارٹنر بن کے کیوں نہیں رہ سکدے؟۔ ایہناں خیالاں دا اظہار ملالا نے برطانوی فیشن میگزین ووگ نُوں دِتے گئے انٹرویو دوران کیتا۔ ملالا نے ہور کہیا کہ ایس گل دا یقین کرنا مشکل اے کہ تُسیں جہڑے بندے دا انتخاب کردے او اوہ اعتماد جوگ اے‘ خاص طور اُتے کسے نال تعلقات دے بارے وچ سوچنا بہت مشکل اے۔