پچھلے 24 گھنٹیاں وچ 3 ہزار 341 روگی کرونا توں صحت یاب، 83 بندے جان دی بازی ہار گئے……٭رویل خبر٭

اسلام آباد (نیوز ڈیسک) پورے ملک وچ ہور 1 ہزار 893 بندے کرونا وباء دا شکار ہو گئے جد کہ ہور 83 بندے جان دی بازی ہار گئے۔ این سی او سی ولوں جاری کردا آنکڑیاں دے مطابق پچھلے 24 گھنٹیاں وچ 3 ہزار 341 روگی کرونا توں صحت یاب وی ہوئے نیں جہدے بعد صحت یاب ہون والے روگیاں دی گنتی 856,005 ہو گئی اے۔دوجے پاسے خیبر ٹیچنگ ہسپتال دے ای این ٹی ڈاکٹر نے غیر معیاری آکسیجن سلنڈر دے استعمال نال بلیک فنگس کھلرن دے دھڑکُو اُتے بورڈ آف گورنر نُوں خط لکھ دِتا۔ خط وچ کہیا گیا اے کہ پچھلے 2 مہینیاں وچ 12 روگیاں دی سائی نس سرجری کیتی گئی جہناں وِچوں 2 روگی کرونا توں صحت یاب ہون دے دوران بلیک فنگس دا شکار ہوئے‘ صفائی نہ ہون پاروں بلیک فنگس سلنڈرز دی تَہ وچ پایا گیا۔ ای این ٹی ڈاکٹر نے زور دِتا کہ سلنڈرز وچ آکسیجن بھرن دے دوران احتیاط ورتی جاوے‘ کرونا دی صورتحال وچ بلیک فنگس دے روگی ساہمنے آ رہے نیں‘ جے سلنڈر ز دی صفائی بہتر طور اُتے نہ کیتی جاوے تے بلیک فنگس دے سپورز (زردانے) اوہناں تَہ وچ بَہ جاندے نیں۔ خط وچ کہیا گیا کہ روگیاں لئی آکسیجن دا جہڑا انتظام کیتا جاوے تے گیس پانی دے چیمبر توں لنگھان لئی وی پانی دی صفائی ضروری اے‘ کیوں کہ جے پانی دی صفائی نہ ہووے تے سپورز بنن دا دھڑکو ہوندا اے‘ اودھر سیکرٹری صحت امتیاز حسین شاہ نے کہیا اے کہ سارے ہسپتالاں دی انتظامیا نُوں روگیاں دے زیر استعمال سلنڈرز دی صفائی دے احکامات جاری کیتے گئے نیں‘ صوبے وچ بھارتی وائرس دا کوئی کیس ساہمنے نہیں آیا‘ 5 نمونے ٹیسٹ لئی اسلام آباد گھلے گئے نیں جہناں دے نتیجے حالے موصول نہیں ہوئے نیں۔