مشکل دور لنگھ چُکیا , ہُن ترقی‘ معیشت ودھان تے نوکریاں دین دا ویلا اے: وزیراعظم عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ جمہوریت دے دعویدار فوج نُوں کَہ رہے نیں حکومت ڈِگا دوو‘ ایہ سارے مافیاز اپنے مفاد دی خاطر کجھ وی کرن نُوں تیار نیں‘ حکومت آئی تے پہلے ہفتے ای کَہ دِتا کہ حکومت ناکام ہو گئی‘ مشکل دور لنگھ چُکیا اے تے ہُن ترقی‘ معیشت ودھان تے نوکریاں دین دا ویلا اے۔ وزیراعظم عمران خان نے لودھراں توں ملتان شاہراہ دی اپ گریڈیشن تے بحالی منصوبے دی افتتاحی تقریب نال خطاب کردیاں ہویاں کہیا کہ جویں ای اسیں حکومت وچ آئے تے کہیا گیا کتھے اے نواں پاکستان؟ پر اسیں ڈھائی سال صبر نال لنگھایا‘ میڈیا نے وی تاثر دتا کہ بٹن آن کر کے نواں پاکستان بن جاوے گا جد کہ اپوزیشن نے وی این آر او لئی ڈراما کیتا تے تنقید کیتی‘ ایہ میرے‘ ٹیم لئی تے لوکائی لئی سبق اے کہ معاشرے وچ تبدیلی جدوجہد نال آندی اے۔ اوہناں نے کہیا کہ 1947 دے بعد ملک دا نظام بدلن تے مافیا توں اپنے آپ نُوں ازاد کراون لئی بہت وڈی جدوجہد چل رہی اے‘ ہر تھاں مافیا اے جہڑ ا چاہندا اے کہ حکومت ناکام ہووے تاں جے اوہ فایدا چُک سکن‘ ایس ویلے پاکستان دی سبھ توں اہم جدوجہد ہو رہی اے تے ایہ قانون دی حکمرانی دی جدوجہد اے‘ معاشرا ایسے نال بدلدا اے جدوں طاقتور قانون ہیٹھ آندا اے‘ ایہدے نال خشحالی آندی اے‘ دنیا وچ کوئی وی ملک ویکھ لوو‘ اوتھے کوئی قبضا مافیا‘ کھنڈ مافیا یاں سیاسی مافیا نہیں‘۔ وزیراعظم نے اپوزیشن نُوں سخت ہتھی لیندیاں ہویاں کہیا کہ ایہ کہندے نیں این آر او دوو ورنا حکومت ڈِگا دواں گے‘ اپنے آپ نُوں جمہوری کَہن والے فوج نُوں کَہ رہے نیں حکومت ڈِگا دوو‘ ایہناں دا مقصد اپنے مفادات دا تحفظ کرنا اے تے ایہدی خاطر حکومت ڈِگان لئی کجھ وی کرن نُوں تیار نیں کیوں جے ایہناں دے باہر ارباں ڈالر پئے نیں‘ ایہناں نُوں ڈر اے ایہ پیسے واپس آ جان گے‘ ایہناں دیاں چوریاں ساہمنے آ رہیاں نیں ایس لئی ایہناں دی کوشش اے حکومت نُوں کسے نہ کسے طرحاں ڈِگاؤ۔ عمران خان دا کہنا سی کہ بھرت وچ ویکھو اج کیہ حالات نیں‘ بھارت دی حکومت نے جہڑے فیصلے کیتے اوہناں دا کیہ حال ہو گیا‘ ایس ویلے اوہناں دا مائنس 7 گروتھ ریٹ اے تے ساڈا 4 فیصد اُتے چلا گیا اے‘ جدوں کرونا آیا تے بھارت دے مقابلے وچ پاکستان دے حالت بہت بُرے سن۔ اوہناں دا ہور کہنا سی کہ ساڈی حکومت دا پہلا سال استحکام وچ لنگھیا تے دوجے سال کرونا آیا‘ ایہدے توں لوکاں تے معیشت نُوں بچان دی کوشش کیتی‘ اج اسیں جتھے کھلوتے آں میرا ایمان اے کہ سبھ توں مشکل ویلے توں نکل گئے آں‘ ہُن جہڑا ویلا آ رہیا اے ایہ ملک دی ترقی دا سفر اے‘ اسیں سبھ کجھ آن والیاں نسلاں لئی کر رہے آں جو کسے نے نہیں کیتا‘ سبھ نے الیکشن نُوں ساہمنے رکھ کے کم کیتے‘ ہُن جہڑا بُرا ویلا سی اوہ نکل گیا‘ ہُن ترقی‘ معیشت ودھان‘ دولت وچ وادھا تے نوجواناں نُوں نوکریاں دین دا ویلا اے‘ اسیں آئی ایم ایف دی وجھا توں وی پریشر وچ ساں تے بیروزگاری سی پر آن والے دناں وچ قوم نُوں خشخبریاں دواں گا۔