حکومت ولوں نویں مالی ورھے لئی 8ہزار 487 ارب رُپئے دا وفاقی بجٹ پیش۔ورودھی پارٹی ولوں گو نیازی دے نعرے لائے‘ تے سیٹاں اُتے کھلو کے احتجاج کرن تے ڈیسک وجان لگے ……٭رویل خبر٭

اسلام آباد (نیوز ڈیسک) سپیکر اسد قیصر دی صدارت ہیٹھ قومی اسمبلی دا اجلاس‘ حکومت ولوں نویں مالی سال لئی 8ہزار 487 ارب رُپئے دا وفاقی بجٹ پیش‘کسارے دا تخمینا 3 ہزار 990 ارب رُپئے ‘ دفاعی لئی 1370 ارب رُپئے تے قرضیاں تے سود دی ادائیگی لئی 3 ہزار 60 ارب رُپئے مختص کیتے گئے نیں‘ گھٹ توں گھٹ تنخاہ 20 ہزار مقرر کیتی گئی اے‘ تنخاہ تے پنشن وچ 10 فیصد وادھا کیتا جاوے گا۔ وفاقی وزیر خزانا شوکت ترین نے بجٹ تقریر دا اغاز کیتا ای سی کہ اپوزیشن اراکین نے رؤلا پانا شروع کر دِتا تے ڈاڈھی نعرے بازی کیتی۔ اوہناں نے مُک گیا تیرا شو نیازی‘ گو نیازی‘ گو نیازی دے نعرے لائے‘ تے سیٹاں اُتے کھلو کے احتجاج کرن تے ڈیسک وجان لگے جہدی وجھا توں اینا رؤلا پیا کہ ایوان وچ کن پئی اواز سنائی نہیں دے رہی سی۔ صورتحال ایس قدر خراب ہوئی کہ اِک موقع اُتے تے سپیکر نُوں سوانی اپوزیشن ارکان نُوں حکومتی بینچز توں ہٹان لئی سارجنٹ ایٹ آرمز نوں سدنا پیا۔ اجلاس وچ وزیر خزانا شوکت ترین نے کہیا کہ کرونا دی وجھا توں معیشت د ے استحکام وچ ویلا لگا‘ پچھلی حکومت نے قرضے لے کے زرمبادلا دے ذخائر ودھائے‘ پر موجودا حکومت ملک نُوں ترقی دی راہ اُتے پان وچ کامیاب ہوئی اے‘ صنعت دی ترقی غیر معمولی رہی اے۔ وزیر خزانا نے بجٹ تقریر دے اغا ز وچ پی ٹی آئی حکومت نُوں ورثے وچ ملن والی خراب معاشی صورتحال تے قرضیاں تے کساریاں دا ذکر کیتا پر اوہناں نے کہیا کہ قبرستان وچ کھلو کے مردے اکھاڑن توں بہتر اے کہ باہر نکل کے قوم نُوں روشنی ول لے جایا جاوے۔ اوہناں نے کہای کہ معیشت دے استحکام دا مرحلا کافی حد تک مکمل ہو گیا اے تے ہُن ترقی تے استحکام ہدف ہووے گا۔ وزیر خزانا نے وفاقی بجٹ پیس کردیاں ہویاں کہیا کہ 3 منٹ توں ودھ جاری رہن والیاں موبائل فون کالز‘ انٹرنیٹ ڈیٹا دے استعمال‘ ایس ایم ایس اُتے فیڈرل ایکسائز ڈیوٹی لائی جا رہی اے جہدے نال ابادی دے وڈے حصے اُتے ٹیکس نافذ ہووے گا۔ وزیر خزانا نے کہیا کہ موبائل سروسز اُتے موجودا ود ہولڈنگ ٹیکس 12.5 توں گھٹ کر کے 10 فیصد کر دِتا جاوے گا تے کجھ عرصے بعد 8 فیصد کیتا جاوے گا۔ آئی ٹی سروس دی برآمدات نُوں زیرو ریٹنگ دی سہولت فراہم کر دِتی گئی ا۔ پھَلاں دے رَس اُتے فیڈرل ایکسائز ڈیوٹی ختم کر دِتی گئی۔ قرآن پاک دی چھپائی لئی معیاری کاغذ دی درآمد اُتے وی چھوٹ دے دِتی گئی اے۔ آپ تلف ہون والیاں سرنجاں تے آکسیجن سلنڈر اُتے ٹیکس چھوٹ دے دِتی گئی اے۔ وزیر خزانا نے دَسیا کہ آندے بجٹ وچ موبائل فون تے ٹائراں دی درآمد اُتے ریگولیٹری ڈیوٹی ودھائی جا رہی اے‘ برآمدات دے فروغ لئی خصوصی ایکسپورٹ سکیم متعارف کروائی جا رہی اے جہدے تحت ایس ایم ایز تے ہور شعبے ڈیوٹی فری درآمدات کر سکن گے جہدی معیاد وی 2 سال توں ودھا کے 5 سال کیتی جا رہی اے۔ وزیر خزانا نے کہیا کہ ہر شہری گھرانے نُوں کاروبار لئی 5 لکھ تک بلا سود قرضے دواں گے‘ ہر کاشت گھرانے نُوں ہر فصل دی کاشت لئی ڈیڈھ لکھ رُپئے بلا سود قرضے دواں گے۔ ایسے طرحاں ٹریکٹر تے مشینی امداد لئی 2 لکھ رُپئے تک بلا سود قرضے دواں گے۔ گھٹ لاگت گھراں دی اُساری لئی 20 لکھ رُپئے تک سستے قرضے‘ ہر گھرانے نُوں صحت کارڈ تے اِک بندے نُوں مفت تکنیکی تربیت دِتی جاوے گی۔ گھر خریدن یاں اُساری وچ مدد لئی 3 لکھ رُپئے سبسڈی دِتی جا رہی اے جہدے لئی بجٹ وچ 33 ارب رُپئے رکھے گئے نیں۔ احساس پروگرام لئی 260 ارب رُپئے تجویز کیتے گئے نیں۔ وزیر خزانا نے کہیا کہ الیکٹرک گڈیاں دی مقامی مینو فیکچرنگ لئی کِٹاں دی درآمد اُتے ٹیکس چھوٹ دِتی گئی اے۔ ایہناں گڈیاں لئی سیلز ٹیکس دی شرح وچ 17 فیصد توں 1 فیصد تک کمی کیتی اے۔ مقامی طور اُتے بنائی گئی 850 سی سی گڈیاں اُتے فیڈرل ایکسائز ڈیوٹی تے VAT ٹیکس ختم کر دِتا گیا۔ ایہناں اُتے سیلز ٹیکس دی شرح 17 توں گھٹ کر کے ساڈھے 12 فیصد کر دِتی گئی۔ آندے بجٹ وچ کتاباں‘ رسالیاں‘ زرعی رِچھاں تے 850 سی سی گڈیاں دے سی بی یو دی درآمد نُوں ود ہولڈنگ ٹیکس توں استثنا دِتا جا رہیا اے۔ وزیر خزانا نے کہیا کہ اخراجات وچ 14 فیصد دا وادھا کیتا گیا اے تے 7523 ارب رُپئے رہن دی توقع اے۔ آندے سال دا مجموعی بجٹ کسارا 6.3 فیصد ہووے گا جد کہ موجودا سال دا بجٹ کسارا 7.1 فیصد اے۔ شوکت ترین نے کہیا کہ آندے مالی سال لئی مجموعی ریونیو دا تخمینا 7909 ارب رُپئے اے تے ریونیو وچ وادھے دا ہدف 24 فیصد اے‘ ایف بی آر دا ہدف 24 فیصد گروتھ دے نال 5829 ارب رُپئے تجویز کیتا گیا اے تے نان ٹیکس ریونیو گروتھ دا ہدف 22 فیصد رکھیا گیا اے‘ وفاقی ٹیکساں وچ صوبیاں دا حصا 2704 ارب رُپئے توں ودھا کے 3411 ارب رُپئے کر دِتا اے‘ صوبیاں نُوں 707 ارب رُپئے وادھو دِتے جان گے۔ شوکت ترین نے ہور کہیا کہ وفاق کراچی دی بہتری لئی 98 ارب رُپئے دیوے گا۔ وزیر خزانا نے کہیا کہ پہلی جولائی توں سرکاری ملازماں دیاں تنخاہواں وچ 10 فیصد وادھا کیتا جا رہیا اے‘ ریٹائرڈ ملازماں دی پنشن وچ 10 فیصد وادھا کیتا جاوے گا‘ اردلی الاؤنس نُوں 14000 رُپئے مہینا وار توں ودھا کے ساڈھے 17 ہزار رُپئے مہینا وار کیتا جاوے گا‘ ایسے طرحاں گریڈ 1 توں 5 والے بندیاں اُتے مہنگائی دا بھار گھٹ کرن لئی گھٹ توں گھٹ اجرت ودھا کے 20 ہزار رُپئے مہینا وار کیتی جا رہی اے‘ تنخاہ دار طبقے اُتے کوئی نواں ٹیکس نہیں لایا جاوے گا۔ شوکت ترین نے کہیا کہ بجٹ وچ اخراجات جاریا 14 فیصد وادھے نال 6561 ارب توں ودھا کے 7523 ارب رُپئے کیتا جا رہیا اے‘ سبسڈیز لئی 682 ارب رُپئے رکھے جا رہے نیں‘ تھوک تے پرچون کاروباراں لئی پی او ایس مشیناں ایس ویلے 11 ہزار دُکاناں اُتے لگیاں نیں جہناں نُوں 2 سال وچ ودھا کے 5 لکھ ریٹیل دُکاناں وچ لایا جاوے گا جو ایف بی آر نال جُڑیاں ہون گیاں۔ حکومت ایہناں مشیناں دی تنصیب مفت کرے گی۔ وزیر خزانا مطابق کووڈ ایمرجنسی فنڈ لئی 100 ارب رُپئے مختص کرن دی تجویز اے۔ کرونا ویکسین دی درآمد اُتے 1.1 ارب ڈالر خرچ کیتے جان گے‘ جون 2022 تک 10 کروڑ لوکاں نُوں ویکسین لائی جاوے گی۔ سی پیک دے 13 ارب ڈالر دے 17 وڈے منصوبے مکمل کر لئے گئے تے 21 ارب ڈالر مالیت دے ہور 21 منصوبے جاری نیں‘ سٹریٹجک نوعیت دے 28 ارب ڈالر دے 26 منصوبے غور ہیٹھ نیں‘ بجٹ وچ کراچی لاہور موٹروے دی تکمیل ترجیحاں وچ شامل اے۔ نویں سال دا دفاعی بجٹ مجموعی قومی بجٹ دا 16 فیصد تے جی ڈی اپی دا 2.8 فیصد اے‘ جہدے وِچوں پاک آرمی دا دفاعی بجٹ ملکی بجٹ دا 7 فیصد اے۔ وزیر خزانا نے کہیا کہ آبی تحفظ نُوں یقینی بنان لئی 91 ارب رُپئے‘ داسو ہائیڈرو پاور پراجیکٹ دے پہلے مرحلے لئی 57 ارب رُپئے مختص کیتے گئے نیں‘ دیامیر بھاشا ڈیم لئی 23 ارب‘ مہمند ڈیم لئی 16 ارب مختص کیتے جا رہے نیں۔ جد کہ نیلم جہلم ہائیڈرو پراجیکٹ لئی 15 ارب رُپئے دی تجویز اے۔ وزیر خزانا نے دَسیا کہ بجلی دی ترسیل دے منصوبیاں لئی 118 ارب رُپئے رکھے گئے نیں‘ اسلام آباد تے لاہور وچ بجلی دی ٹرانسمیسن لائن لئی ساڈھے 7 ارب رُپئے تے داسو توں 2160 میگا واٹ بجلی پیدا کرن لئی ساڈھے 8 ارب رُپئے مختص کیتے گئے نیں۔ اوہناں نے کہیا کہ ری کلیمڈ تے استعمال شدا لیڈ بیٹریاں اُتے سیلز ٹیکس ود ہولڈنگ ٹیکس نافذ کیتا جا رہیا اے۔ وزیر خزانا نے کہیا کہ انسداد جنسی زیادتی فنڈ قائم کیتا جا رہیا اے جہدے لئی 100 ملین رُپئے‘ ہائر ایجوکیشن کمیشن لئی 66 ارب رُپئے تے ترقیاتی بجٹ لئی ہور 44 ارب رُپئے مختص کیتے گئے نیں جہدے وچ وادھا وی ہووے گا۔ پی آئی لئی 20 ارب‘ سٹیل ملز لئی 16 ارب رُپئے رکھے گئے نیں۔ آدم شماری لئی 5 ارب‘ مقامی حکومتاں دے الیکشن لئی 5 ارب مختص کیتے گئے نیں۔ وزیر خزانا نے کہیا کہ 10 ملین رُپئے تک سالانا ٹرن اوور والی گھریلو صنعت نُوں سیلز ٹیکس وچ رجسٹریشن توں استثنا دے دِتا گیا۔ سوتی دھاگے اُتے ریگولیٹری ڈیوٹی تے 5 فیصد کسٹمز ڈیوٹی نُوں وی ختم کر دِتا گیا‘ صنعتی معیشت نُوں ہور تقویت دین لئی چالو مالی سال ٹیکسٹائل بارے متعلقا شیواں دی 164 ٹیرف ہیڈنگز اُتے ایڈیشنل کسٹمز ڈیوٹی تے ریگولیٹری ڈیوٹی نُوں ختم کر دِتا گیا اے‘ 300 توں ودھ ایکٹیو فارما سیوٹیکل اجزاء نُوں کسٹمز ڈیوٹیز ادائیگی توں چھوٹ دے دِتی اے جد کہ آندے مالی سال لئی وفاقی ترقیاتی بجٹ نُوں 630 ارب رُپئے توں ودھا کے 900 ارب رُپئے مقرر کیتا گیا اے۔ ایہدے وچ وفاقی وزارتاں نُوں 672 ارب رُپئے دا ترقیاتی بجٹ ملے گا۔ تقریر دے اخیر اُتے وزیراعظم نے وزیر خزانا نُوں اوہناں دی سیٹ اُتے جا کے شاباشی دِتی۔ قومی اسمبلی اجلاس پیر دی شام 4 وجے تک ملتوی کر دِتا گیا۔