پہلے کرونا نے تاجراں دا معاشی قتل کیتا تے ہُن لیسکو اوہی کم دُہران وچ رُجھ گئی۔تاجراں ولوں رَوس وکھالا……٭رویل خبر٭

لاہور (نیوز ڈیسک) لیسکو ولوں ڈاڈھی گرمی دے موسم وچ وقفے وقفے توں کیتی جان والی غیر اعلانیا لوڈشیڈنگ دے پیش نظر اچھرا دی تاجر برادری سراپا احتجاج بن گئی۔ جہدے نتیجے وچ وچ تاجر برادری نے پچھلے دن لیسکو سنے وفاقی تے صوبائی حکومتاں دے خلاف احتجاج کردیاں ہویاں ڈاڈھی نعرے بازی کیتی۔ تاجراں دا کہنا سی کہ پہلے کرونا نے تاجراں دا معاشی قتل کیتا تے ہُن لیسکو اوہی کم دُہران وچ مصروف اے۔ اوہناں دا کہنا سی کہ حکمراناں نُوں ٹھنڈے کمریاں وچ بَہ کے غریب لوکائی نُوں درپیش مسئلیاں دے بارے وچ بلکل علم نہیں۔ اوہناں نے خبردار کیتا کہ جے لیسکو نے غیر اعلانیا لوڈشیڈنگ دا سلسلا ختم نہ کیتا تے آن والے دِناں وچ تاجر برادری شٹر ڈاؤن دے نال نال شہر دا پہیا جام کر سکدی اے۔دوجے پاسے وفاقی وزیر توانائی حماد اظہر نے خبردار کیتا اے کہ بجلی چوری والے علاقیاں وچ لوڈشیڈنگ ودھ سکدی اے۔ ٹوئٹر اُتے جاری بیان وچ حماد اظہر نے کہیا کہ پچھلے 48 گھنیاں وچ سسٹم وچ 1500 میگا واٹ بجلی شامل کیتی تے سسٹم وچ ہور بجلی شامل کر دِتی جاوے گی۔ اوہناں نے کہای کہ پچھلے 12 گھنٹیاں وچ کدھرے لوڈشیڈنگ نہیں ہوئی البتا بجلی چوری کرن والے علاقیاں وچ لوڈشیڈنگ ودھ سکدی اے جد کہ مقامی سطح اُتے ترسیلی نظام وچ بریک ڈاؤن اُتے وی بجلی معطل ہو سکدی اے۔ وزیر توانائی دا کہنا سی کہ ساریاں بجلی دیاں ونڈ کار کمپنیاں وچ غیر اعلانیا لوڈشیڈنگ صفر اے‘ البتا جہناں علاقیاں وچ بجلی بندش ہے اوتھے وجھا واجبات دی عدم ادائیگی اے تے سسٹم وچ تکنیکی مسئلیاں دے کارن بجلی بندس دا ساہمنا ہو سکدا اے۔