امریکا دے نال جنگ وچ شامل ہون دے بعد پاکستان نُوں دہشتگردی دا ساہمنا کرنا پیا: واشنگٹن پوسٹ  وچ وزیر اعظم دا مضمون……٭رویل خبر٭

واشنگٹن (نیوز ڈیسک) وزیراعظم عمران خان نے کہیا اے کہ جے امریکا نُوں افغانستان دے خلاف ہوائی اڈے دئیے تے پاکستان وچ اِک واری فیر دہشتگردی ودھے گی‘ امریکی ڈرون حملیاں نال جنگ تے نہیں جت سکے پر نفرت پیدا کر دِتی۔ امریکی اخبار واشنگٹن پوسٹ و چ لکھے گئے مضمون وچ وزیراعظم عمران خان نے کہیا اے کہ افغانستان وچ جنگاں دے دوران پاکستان نے بہت نقصان چُکیا‘ 70 ہزار توں ودھ پاکستانی واصل ہوئے‘ امریکا نے پاکستان نُوں 20 ارب ڈالر امداد فراہم کیتی جد کہ پاکستان دی معیشت نُوں 150 ارب ڈالر دا نقصان پہنچیا‘ امریکا دے نال جنگ وچ شامل ہون دے بعد پاکستان نُوں دہشتگردی دا ساہمنا کرنا پیا‘ امریکی کوششاں وچ شامل ہون دے بعد پاکستان نُوں اِک سنگی دی حیثیت نال نشانا بنایا گیا‘ امریکی ڈرون حملیاں نال جنگ تے نہیں جت سکے پر نفرت پیدا کر دِتی‘ امریکا نے افغان سرحد اُتے قبائلی علاقیاں وچ فوج گھلن لئی دباء پایا‘ شمالی وزیرستان وچ 10 لکھ بندے بے گھر ہوئے‘ جہدے نال ارباں ڈالر دا نقصان پہنچیا۔ اسیں پہلے ای بہت بھاری قیمت ادا کر دِتی‘ ہُن ہور برداشت نہیں کر سکدے۔ وزیراعظم نے لکھیا کہ افغان طالبان پورے ملک اُتے فتح حاصل نہیں کر سکدے‘ اسیں افغانستان دے کسے وی فوجی قبضے دی مخالفت کردے آں‘ ماضی وچ پاکستان نے متحارب افغان جماعتاں وِچوں چناؤ کر کے غلطی کیتی‘ اسیں غلطی توں سبق حاصل کیتا‘ ہُن اوتھے ساڈا کوئی پسندیدا گرُپ نہیں‘ افغانستان وچ کسے وی حکومت دے نال رَل کے کم کراں گے جہنوں لوکائی دا اعتماد حاصل ہووے۔ پاکستان امریکی فوجی انخلاء دے بعد افغانستان وچ ہور جھیڑے توں بچنا چاہندا اے‘ پاکستان افغانستان وچ امن لئی امریکا دا شراکت دار بنن نُوں تیار اے۔ اسیں خانا جنگی نہیں مذاکرات نال امن چاہندے آں‘ جے ہور خانا جنگی ہوئی تے اسیں سارے نالے توں تھلے چلے جاواں گے۔ وزیراعظم نے لکھیا کہ امریکا تے پاکستان دے افغانستان وچ سانجھے مفادات نیں‘ دوویں ملک چاہندے نیں افغانستان دہشتگرداں دی آماجگاہ نہیں بنے۔ تواریخ نے ثابت کیتا کہ افغانستان نُوں کدی وی باہروں قابو نہیں کیتا جا سکدا‘ جے امریکا طاقتور فوج دے نال افغانستان وچ 20 سال وچ نہیں جِت سکیا‘ تے ساڈے ملک توں اڈیاں دے نال کویں جتے گا‘ جے امریکا نُوں افغانستان خلاف اڈے دِتے تے پاکستان فیر دہشتگرداں دا ہدف بنے گا۔ امید کردے آں کہ افغان سرکار وی مذاکرات وچ بُہتی نرمی د ا مظاہرا کرے گی‘ خطے وچ امن تے ترقی لئی اِک نواں علاقائی معاہدا وی ہو سکدا اے‘ افغانستان دے گوانڈھی وعدا کرن گے کہ اوہ اپنی دھرتی نُوں افغانستان دے خلاف استعمال نہیں ہون دین گے۔