ڈی جی سپورٹس پنجاب دا ہاکی دی بحالی لئی وڈا اعلان……٭رویل خبر٭

لاہور (نیوز ڈیسک) ڈائریکٹر جنرل سپورٹس پنجاب عدنان ارشد اولکھ نے ہاکی دی بحالی تے ودھا لئی وڈّا اعلا ن کیتا اے‘ نواں ٹیلنٹ لبھن تے کھڈاریاں دی تربیت لئی انڈر 16‘ انڈر 18 تے انڈر 21 انٹر ڈویژن بوائز ہاکی چیمپئن شپ منعقد کروان دا فیصلا کیتا اے۔ تفصیلات دے مطابق ڈائریکٹر جنرل سپورٹس پنجاب عدنان ارشد اولکھ دی صدارت ہیٹھ پیر والے دن نیشنل ہاکی سٹیڈیم وچ اہم اجلاس ہویا‘ اجلاس وچ پاکستان ہاکی فیڈریشن دے سیکرٹری آصف باجوا‘ اولمپیئن انجم سعید‘ ڈائریکٹر ایڈمن جاوید چوہان‘ ڈائریکٹر سپورٹس محمد عبدالحفیظ بھٹی‘ ڈپٹی ڈائریکٹر رؤف باجوا رلتی سن‘ اجلاس و چ قومی کھیڈ ہاکی دی بحالی تے ترقی دے حوالے توں تفصیلی جایزا لیا گیا۔ اجلاس نال خطاب کردیاں ہویاں ڈائریکٹر جنرل سپورٹس پنجاب عدنان ارشد اولکھ نے کہیا کہ سپورٹس بورڈ پنجاب ہاکی دے ودھا تے ترقی لئی ہمیشا اقدامات کردا رہیا اے جہدے چنگے نتیجے ساہمنے آئے نیں‘ ہاکی ساڈا قومی کھیڈ اے ایہدی بحالی لئی ہر حد تک جاواں گے تے سارے وسائل استعمال وچ لیاواں گے‘ ایس سلسلے وچ مختلف کیٹیگریز دی انٹر ڈویژن ہاکی چیمپئن شپ منعقد کروان دا فیصلا کیتا اے‘ اگست وچ انڈر 16‘ 25 دسمبر توں انڈر 18 تے 23 مارچ 2022 نُوں انڈر 21 انٹر ڈویژن بوائز ہاکی چیمپئن شپ کروائی جاوے گی‘ ایہناں چیمپئن شپس نُوں سالانا کیلنڈر دا حصا بنایا جا رہیا اے تے ہر سال باقاعدگی نال کروایا جاوے گا‘ ڈائریکٹر جنرل سپورٹس پنجاب عدنان ارشد اولکھ نے کہیا کہ اگست وچ ہون والی انڈر 16 بوائز ہاکی چیمپئن شپ لئی ہر ضلع دے ہاکی دے کلباں دے مقابلے کراواں گے تے باصلاحیت کھڈاریاں اُتے مشتمل ٹیم دا انتخاب کیتا جاوے گا‘ مقابلیاں وچ پاکستان ہاکی فیڈریشن دے تصدیق شدا کلب حصا لے سکن گے‘ 20 جولائی تک ہر ڈسٹرکٹ اُتے ڈویژن دیاں ٹیماں باقاعدا مقابلے کروا کے بنائیاں جان گیاں‘ منتخب ٹیماں دا کیمپ ہر ڈویژن وچ اِک ہفتے لئی لایا جاوے گا‘ پاکستان ہاکی فیڈریشن چیمپئن شپ دے انعقاد وچ تعاون کرے گی‘ پاکستان ہاکی فیڈریشن دے کوچز کھڈاریاں نُوں تربیت دین گے‘ چیمپئن شپ نال نویں کھڈاری ساہمنے آن گے‘ نوجواناں نُوں تربیت دے کے قومی سطح دے کھڈاری تیار کراں گے۔ سیکرٹری پاکستان ہاکی فیڈریشن آصف باجوا نے ڈائریکٹر جنرل سپورٹس پنجاب عدنان ارشد اولکھ دے اقدامات نُوں سلاہندیاں ہویاں کہیا کہ سپورٹس بورڈ پنجاب ایہناں دی قیادت وچ ہاکی دی بحالی لئی بہترین اقدامات کر رہیا اے جہدے نال ہاکی دے کھیڈ نُوں اِک واری فیر مقبول بنان وچ مدد ملے گی‘ پاکستان ہاکی فیڈریشن سپورٹس بورڈ پنجاب نال مکمل تعاون کرے گا‘ سپورٹس بورڈ پنجاب ہاکی دے ودھا لئی بھرویں اقدامات کر رہیا اے۔