سوشل میڈیا اتے سوانیاں دے کارے۔۔۔۔۔٭رویل لیکھ٭

سوشل میڈیا اتے سوانیاں دے کارے۔۔۔۔۔٭رویل لیکھ٭

نبیلہ مُغل

سوشل میڈیاں توں مراد اوہ ویب سائٹس تے ایپلی کیشنز نیں جہڑیاں لوکاں نوں اپنے ول کھچدیاں نیں. بڑے لوک سمارٹ فوناں دے ذریعے نال سوشل میڈیا ورتدے نیں پر ایہ کم کمپیوٹراں توں شروع ہویا. سوشل میڈیا ورتن والیاں نوں اپنیاں تصویراں تے ویڈیو گھلن دی اجازت دیندا اے.

سوشل میڈیاں جویں فیسبک 'انسٹاگرام'وٹس ایپ'ٹویٹر تے ٹک ٹاک ورگے ایپ شامل نیں. ایہناں دے لوک اکاؤنٹ بناکے ورتنا شروع کردے نیں لوکی اک دوجے نوں اپنیاں تصویراں تے ویڈیوتے ہور مواد وی گھلدے نیں. سوشل میڈیا دیاں وڈیاں مثالاں انج نیں

سوشل نیٹ ورک جہدے وچ لوک اپنے خیال 'اپنے کم کاج بارے اک دوجے نال رابطہ کردے نیں. ایہدے وچ فیسبک تے ٹویٹر شامل نیں جہڑے کہ پیشا ور نیں.

دوجامیڈیا نیٹ ورک اے ایہدے وچ لوک اپنے خیال تے نظریہ دا تبادلاکردے نیں. میڈیا نیٹ ورک وچ فوٹو تے ویڈیو ورگے مواد گھلدے نیں. ایہدے وچ انسٹاگرام تے یو ٹیوب نیں. جویں یو ٹیوب ورتن والا بندہ اپنے چینل تے ویڈیو بناکے اپ لوڈ کردا اے لوکی فر اوس ویڈیو نوں ویکھدے نیں تے "پسند "کردے نیں اوس توں بعد اوہدے چینل نوں سبسکرائب وی کردے نیں تاں جے آؤن والیاں ویڈیو ویکھیاں جاسکن.

اج دے دور وچ انٹرنیٹ تے سوشل میڈیاں دے فایدیاں توں انکار تے نہیں کیتا جاسکدا.سوشل میڈیا راہیں پینڈے مک گئے نیں. ہزاراں میل دور بیٹھے لوک اپنے مسئلے حل کر سکدے نیں. گوہ گوچری گل تاں اے ہے کجھ سالاں وچ ای سوشل میڈیا بڑی ترقی کیتی اے. بڑے لوک ایس نوں ورتدے نیں تے دن بدن ودھدے جاندے نیں.

سوشل میڈیا دے ورتارے نیں ہر بندے اتے اپنا اثر پایا اے. بندے 'سوانیاں'نکے بال ہر کوئی ایہنوں ورتدا اے. جویں ایس نوں بندے ورتدے نیں انج ای ایس نوں سوانیاں وی ورتدیاں نیں. جویں ہر شے نوں ورتن دے دو ای اثر ہوندے نیں مثبت تے منفی. ایس لئی اسیں ویکھنے آں کہ سوانیاں ایس نوں مثبت کویں ورتدیاں نیں.

سوانیاں وی سوشل میڈیا نوں بڑی تعداد وچ ورتدیاں نیں. کجھ سوانیاں اپنے گھردیاں دا ساتھ دیون لئی کاروبار کردیاں نیں تے سوشل میڈیا راہیں ایس دی مشہوری کردے نیں.کجھ سوانیاں پارلرچلاندیاں نیں تے اپنی مشہوری کرن لئی سوشل میڈیا ورتدیاں نیں. کجھ سوانیاں بوتیک چلاندیاں نیں تے اپنے کپڑیاں دی مشہوری ایہدے راہیں کردیاں نیں.

کجھ سوانیاں نیں یوٹیوب چینل بنائے نیں جہدے وچ کھانا پکانا 'میک اپ'گھراں نوں سجانا'کپڑے سیناتے ایہدے توں وکھ ہر کم بارے دسیا جاندا اے. ایس دے ذریعے اوہ پیسے کماندیاں نیں.

اج کل تے آن لائن پڑھایا جارہیا اے بھاویں سکول دا ہووے کالج دا ہووے تے بھاویں قرآن دا ہووے سوانیاں فیسبک تے گروپ یوٹیوب تے چینل بنائے ہوئے نیں تے بالاں دے نال نال وڈیاں نوں وی پڑھاندیاں نیں.

ہن اسیں ویکھنے آں سوانیاں سوشل میڈیا نوں منفی طریقے نال کویں ورتدیاں نیں. سبھ تو پہلاں تاں سوانیاں جعلی اکاؤنٹ بنائے ہوئے نیں انج تاں کئی منڈیاں وی کڑیا ں دے ناں توں اکاؤنٹ بنائے نیں پر سوانیاں وی ایس کم وچ پیچھے نہیں. فرض کرو جے 1000 سوانیاں نیں تے 1800اکاؤنٹ نیں. کجھ تاں ایس نوں اپنی پچھان لکاؤن واسطے ورتدیاں ں نیں کجھ اپنے گھردیاں توں چوری چھپے ورتدیاں نیں. ایہدا مقصد غیر اخلاقی طریقے نال سوشل میڈیا نوں ورتنا اے. ایہدی وجھا توں سوانیاں ذہنی بیمار ہوجاندیاں نیں .سوشل میڈیاں دے کارن ای سارے مسئلے ساڈے معاشرے وچ بن گئے نیں. سوشل میڈیا نوں سارا سارا دن ورتن نال گھراں دے گھر برباد ہوگئے نیں. لگ بھگ 80% طلاقاں دی وجھا سوشل میڈیا اے. کیوں جے بندے سوانیاں تے شک کردے نیں تے سوانیاں بندیاں تے شک کردیاں نیں. سوانیاں سمجھدیاں نیں بندے سارا دن اوہناں نوں ٹائم نہیں دیندے تے بال بچیاں توں دور نیں ایس وجھا تو سوانیاں اکلاپے دا شکار ہوجاندیاں نیں. ایس وجھا توں گھراں دی تباہی ہوجاندی اے.

جتھے سوانیاں اپنے کاروبار واسطے کڑیاں دیاں تصویراں سوشل میڈیا تے لاندیاں نیں اوہدی وجھا توں لوکی اوہناں نوں غیر اخلاقی ورتدے نیں فیر بلیک میل کردے نیں. کجھ سوانیاں تے کاروبار دی مشہوری لئی تصویراں لاندے نیں تے کجھ سوانیاں تے اپنیاں غیر اخلاقی تصویراں لاندیاں نیں جہدے نال اوہ لوکاں دی توجہ اپنے ول کھچدیاں نیں لوک اوہناں تصویراں تے گندے کمینٹ کردے نیں تے کجھ حوس دے مارے ہوئے ان باکس وچ رابطہ شروع کردے نیں جہدے نتیجے وچ اوہ سوانیاں پیسیاں دا مطالبا کردیاں نیں جہنوں اوہناں اپنی کمائی دا ذریعا بنایا ہویا اے. لوک اپنی حوس پوری کرن لئی ہر بھیڑا کم کردے نیں تے ایہ بھل جاندے نیں کہ اوہناں دی حیاتی تے ایہدا کیہ اثر ہوئے گا.

اجکل تے سوانیاں ساری ساری رات جاگدیاں نیں تے غیر اخلاقی تصویراں تے ویڈیو بناکے اپ لوڈکردیاں نیں تے اپنے آپ دی نمائش کردیاں نیں جہدی وجھا توں ہر دوجا بندہ غلط کاری وچ رجھیا ہویا اے کجھ تے ایہ سمجھدیاں نیں پئی اوہنا دے گھر والے کوئی نہیں ایس لئی ہر ویلے لوکاں نال تے وکھو وکھ گروپاں وچ گل کردیاں نیں تے انج اپنا ویلا لنگھاؤندیاں نیں. انج ای کئی بندے وہ نویاں نویا کڑیاں نال گل کر کے اپنا ویلا لنگھاؤندے نیں جہدی وجھا توں اپنے بال بچیاں تے گھردی نوں کنڈ کر چھڈدے نیں تے ایس وجھا توں ذہنی ڈیپریشن دا شکار ہوجاندے نیں.ایس وجھا توں کئی سوانیاں تے ہر ویلے ٹوہ وچ لگیا رہندیاں نیں.

کئی سوانیاں تے اداکاراں دیاں غیر اخلاقی تصویراں لاکے بندیاں دی توجہ اپنے ول کردیا نیں. اوہناں دا مقصد تے "ڈنگ ٹپاؤ" ای ہوندا اے کجھ سوانیاں تے غربت دی وجھا توں اپنیاں خواہشاں پوریا کرن لئی ایہ کم کردیاں نیں. تے کجھ اپنیاں سہیلیاں دی ویکھو وکھائی ایس کم تے لگ جاندیاں نیں. کجھ تے اپنی حوس پوری کرن لئی ملاقاتاں وی کرن لگ پیندیاں نیں تے اخیر جہدا نتیجا بھیڑا ہوندا اے بندے چپ چپیتے اوہناں دیاں غیر اخلاقی تصویراں تے ویڈیو بناکے بلیک میل کرن لگ پیندے نیں تے اخیر فر اوہ اپنی حیاتی اپنے ہتھیں مکالیندیاں نیں.

سوشل میڈیا تے ہر ویلے گندیاں تصویراں تے ویڈو ویکھن نال لوک اپنی ذہنی تے جسمانی صحت خراب کر لیندے نیں. کجھ تے بے حیائی پیدا کردے پئے نیں. جہدی وجھا توں جہڑیاں سوانیاں نیک باپردہ نیں اوہناں عزت وی مجروح ہوندی پئی اے. ہن تے ہر بندہ ہر سوانی نوں گندیا ں نظراں نال ای ویکھدا اے. جد کہ ایہ گل غلط اے کیوں جے پنجے انگلاں برابر نہیں .

جتھے لوک سوشل میڈیا نو غلط ورتدے نیں اوتھے ای بڑے لوکی ایہنوں چنگے کماں واسطے وی ورتدے نیں. جتھے برائی عام اے اوتھے ای کجھ گمنامی وچ نیک کم کردے نیں. تے جے اسیں لوک سوشل میڈیا نوں چنگے کماں واسطے ورتاں گے تے فیدہ ہوئے گاتے جےاسیں ایس نوں غلط ورتاں گے تے ساڈا وی تے آؤن آلیاں نسلاں دا وی نقصان اے.

٭٭٭٭٭