چِٹے کوٹ تے کالے کوٹ دی لڑائی ــــــ رویل کالم

دوویں ڈاکو تے نہیں نیں

بھاویں کوٹ کہڑے وی رنگ دے نیں۔اِک کوٹ چِٹا اے تے اِک کوٹ کالا ایہ دوویں کوٹ لوکائی وچ بڑے آدر نال ویکھے جاندے سن تے فیر ویکھدیاں ویکھدیاں حالات ایس دے اُلٹ ہونا شروع ہو گئے تے اجہے ہوئے کہ ہُن ایہناں بارے لوکائی وچ کوئی چنگی سوچ نہیں رہ گئی اے۔ ساڈے ایتھے بالاں نوں جے پُچھو کہ وڈے ہو کے کیہ بنو گے تاں اوہ ایہ ای کہندے نیں کہ وڈا ہو کے ڈاکٹر بننا اے؟ انج کیوں اے اِک تاں پیسا کماون دا چاہ ہوندا اے تے اِک ہور کہ سماج وچ اوس نوں مسیحا کہ کے سدّیا جاندا اے تے عزت تے مان دِتا جاندا اے۔اِک ہور دوجاخیال وی اے اوہدے واسطے ڈھیر پڑھائی دی وی لوڑ ہوندی اے تے فیر ڈاکٹراں دے وچ جو جو ہو رہیا اے اوہ ویکھو۔کدے اوہ گردے فروش بن گئے تے کدے ضمیر فروش۔پنجاب انسٹی ٹیوٹ آف کارڈیالوجی وچ جہڑا ہنگاما ہویا ایس قسم دا ہنگاما پوری دُنیا وچ نہ تاں کدھرے سُنیا گیا تے نہ ای انج ہوندا اے۔

وکیلاں نوں ڈبل گریجویٹ کہیا جاندا اے تے فیر ایہناں ڈاکٹراں نال کیہ ایسا کیتا کہ کارڈیالوجی ہسپتال وچ توڑ پھوڑ کرن دی نوبت آ گئی۔ ڈاکٹر تعداد وچ گھٹ سن جو مریضاں دے علاج وچ مصروف سن ۔ڈاکٹر علاج معالجے وچ مصروف سن تے وکیلاں دی ایس کارروائی نوں ویکھ کے اوہ وارڈاں چھڈ کے چلے گئے۔وکیلاں نے مریضاں نوں وی کُٹیا تے اوہناں دے نال آئے لوکاں نوں وی تشدد دا نشانا بنایا۔کئی تھاواں تے باقاعدا نوٹیفیکشن کڈھے گئے کہ ڈاکٹراں نوں بیٹھن لئی نہ تے کرسی دتی جائے گی تے نہ ای اوہناں نوں کوئی فاضل جج کیس سندیاں ہوئیاں کرسی تے بیٹھن لئی کہوے گا جے انج کیتا گیا تے کڑڑی کارروائی کیتی جاوے گی۔ عام بندا تاں اِک کے ایہ کہندا ہوندا سی کہ "عدالت کول جا کے فیصلا ہوئے گا" ایہ تاں سبھ کہندے سن پر جدوں عدالتاں وچ وکیلاں نوں ہتھ چھُٹ کر دتا جاوے کہ اوہ ججاں نوں مارنا شروع کر دین تاں عام بندے دا کیہ بنے گا؟

پنجاب انسٹی ٹیوٹ آف کارڈیالوجی دے اِک ڈاکٹر تے وکیل دا جھگڑا ہویا جس نوں سوشل میڈیا راہیں بیتے دیہاڑ وائرل کر دتا گیا ایس توں بعد اوہناں وکیلاں نے متا پکایا جو چڑھدے ورھے اپنی سیاسی دُکانداری کھولنا چاہندے نیں ایس لئی اوہناں نے اپنی طاقت وکھاون لئی جہڑا پاور شو کیتا اوس نے لوکائی وچ وکلا دی عزت اُکا ای مکا دِتی اے۔ینگ ڈاکٹر نے کل جہڑی ویڈیو بنا کے وائرل کیتی اوہدے وچ شعر سنا سنا کے وکیلاں نوں اشتعال دوایا اے وکیلاں نے سویرے ساڈے یارھاں وجے سوشل میڈیا تے لائیو آ کے ویڈیو وی بنائی تے ڈاکٹراں نوں للکاریا وی جس دے سٹِے وچ عام لوکائی سبھ توں ودھ متاثر ہو ئے۔ اک ہور وجھا ایہ وی ساہمنے آ رہی اے اوہ ایہ اے کہ وکیلاں دی چڑھدے ورھے الیکشن کمپین وی شروع ہو جانی اے کیوں جے چڑھدے ورھے دے پہلے مہینے ای وکیلاں

کجھ سیاسی مفاد حاصل کرن والے وکیل ایس موقعے نوں کیش کرانا چاہندا اے تاں جو اگلے الیکشن وچ نام کما سکن تے ووٹ حاصل کر سکن۔ جدوں ویڈیو نوں ویکھدے آں تے انج لگدا اے کہ ایہ اک انفرادی لڑائی سی جس نوں دوواں شعبیاں نوں بد ناں کرن لئی ورتیا جا رہیا اے۔

اصل وچ تاں ایہ ینگ لائرز تے ینگ ڈاکٹرز دی ودھ لڑ ائی اے جس نال اینی تباہی پیدا کیتی جا رہی اے انج کیوں ہویا ایہدے کئی کارن نیں جہناں وچوں میرٹ دی انہوند تے سرکار دا ایہناں شعبیاں ول سنجیدگی نال دھیان نہ دینا وی اے جس کر کے کالیاں بھیڈاں ایہناں وچ ودھدیاں جا رہیاں نیں۔

سینئر ڈاکٹر تے وکیل دُور نیں تے دُور بین لا کے بیٹھے نیں۔ اوہ کورٹ وچ لڑنا چاہندے نیں تے اوتھے ای اوہناں دا دفاع کرن گے۔ پنج ست سال وچ جو ڈاکٹراں تے وکیلاں دی کھیپ آئی اوہناں دا خاطر خاہ تربیت دا کوئی انتظام نہیں۔ پچھلے کئی ورھیاں توں چیک اینڈ بیلنس نہیں اے ایہناں دوواں شعبیاں نوں سنجیدا لین دی لوڑ اے تے حکومتاں نوں کدے وی ایس ول دھیان دین دی لوڑ اے۔

لا ء دی اوکھی پڑھائی توں مایوس لوک اجہے کالج لبھدے نیں جو صرف داخلے گھل دین ایسے طرحاں جو پڑھیار نمبراں دے سر تے داخلا نہیں سن لے سکدےاوہناں نے پنج ست لکھ دے کے سیٹ مُل لئی تے فیر ڈاکٹر بن کے پیسا کمان دی فیکٹری بنا لئی۔ایہناں شعبیاں تےاجہی روک لائی جاوے جتھے نویں تے تربیت یافتا کھیپ ساہمنے آوے۔کیوں جے ینگ ڈاکٹرز وی صرف پیسیاں نال ڈگریاں لے رہے نیں تے اوہناں دے پڑھے لکھے لوک جدوں ساہمنے آندے نیں تے بھگتنا لوکائی نوں پیندا اے۔ ایہ کالے کوٹ تے چٹے کوٹ دی لڑائی سی جو ودھدی ودھدی چٹیاں چادراں دے وچ چھے لوکاں نوں دفنا گئی ۔ہُن تازا خبر ایہ آ رہی اے کہ ڈاکٹر وی ہڑتال تے نیں تے وکیلاں نے کل دی ہڑتال دا اعلان کر دتا اے۔