ساڈی پارٹی دے بوہے ہر محب وطن لئی کھلے نیں:سپیکر پنجاب اسمبلی چودھری پرویز الٰہی……٭رویل خبر٭

لاہور (نمایندا رویل) سپیکر پنجاب اسمبلی چودھری پرویز الٰہی تے وفاقی وزیر ہاؤسنگ طارق بشیر چیما نال این اے 163 وہاڑی دیاں معروف سیاسی شخصیات ایوب بندیشا‘ زاہد بندیشا‘ اویس بندیشا تے پیر یعقوب کھگا نے ملاقات کیتی تے پاکستان مسلم لیگ وچ رلت دا اعلان کیتا۔ ایس موقع اُتے غضنفر الیاس بندیشا‘ پیر ہارون شاہ کھگا تے پیر زمان شاہ کھگا وی موجود سن۔ چودھری پرویز الٰہی نے کہیا کہ جمہوریت نُوں پروان چڑھان لئی حوصلا تے برداشت دی سیاست نُوں فروغ دین دی ضرورت اے‘ ساڈی پارٹی دے بوہے ہر محب وطن لئی کھلے نیں‘ ہر جماعت دی اپنی اپنی سیاست تے مقصد ہوندا اے‘ ساڈی سیاست دا مقصد پاکستان دی ترقی تے لوکائی دی فلاح اے۔ چودھری پرویز الٰہی نے کہیا کہ ساریاں جماعتاں دی مہربانی اے کہ سینیٹ الیکشن وچ اوہناں نے میری گل من لئی تے رزلٹ سبھ دے ساہمنے اے۔ اوہناں نے کہیا کہ ساریاں جماعتاں دا پنجاب اسمبلی دی کارروائی وچ سوہنے انداز وچ حصا لین تے بھرواں تعاعون کرن اُتے مشکور آں۔طارق بشیر چیما نے کہیا کہ چودھری پرویز الٰہی دیاں کاوشاں نال پہلی وار سینیٹ الیکسن وچ پنجاب وچ کسے دا ریٹ نہیں لگا‘ اللہ دا شکر اے کہ ہر جماعت نُوں اودا حق مِلیا۔ ایوب بندیشا نے شکریا ادا کردیاں ہویاں کہیا کہ چودھری پرویز الٰہی دیاں بطور وزیر اعلا خدمتاں اج وی لوکاں نُوں یاد نیں۔