کشمیر دے فیصلے کشمیری لوکائی نہیں سگوں کٹھ پتلی کر رہے نیں‘ کٹھ پتلی وزیراعظم دی ڈکٹیشن اُتے نہیں  چلنا: بلاول بھٹو زرداری……٭رویل خبر٭

ہجیرا‘ تتا پانی (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے کہیا اے کہ عمران خان کشمیر دا سفیر بندے بندے ہُن کلبھوشن یادیو دا وکیل بن چُکیا اے‘ کشمیر دے فیصلے کشمیری لوکائی نہیں سگوں کٹھ پتلی کر رہے نیں‘ کٹھ پتلی وزیراعظم دی ڈکٹیشن اُتے نہیں چلاں گے‘ عمران خان لوکائی توں روٹی‘ کپڑا تے مکان کھوہ رہیا اے‘ پیپلز پارٹی نے ہمیشا لوکائی دا ساتھ دِتا‘ جیالے اپنی محنت تے جدوجہد نُوں جاری رکھن‘ ازاد کشمیر دی لوکائی 25 جلائی نُوں تیر اُتے ٹھپے لا کے پی پی پی دے اُمیدواراں نُوں کامیاب کروائے‘ مہنگائی دے سونامی نُوں نساؤ‘ لوکائی ساڈے نال اے‘ کوئی طاقت پیپلز پارٹی دا راہ نہیں روک سکدی‘ لوکائی تے جیالیاں دے جوش و خروس تے جذبے نے واضح کر دِتا کہ پیپلز پارٹی الیکشن جِت رہی اے‘ ازاد کشمیر دا آندا دا وزیراعظم جیالا ہووے گا۔ ایہناں خیالاں دا اظہار اوہناں نے ہفتے نُوں ازاد کشمیر چوناں دی مہم دے سلسلے وچ تتا پانی تے ہجیرا دے مقام اُتے جلسیاں نال خطاب دے دوران کیتا۔ بلاول بھٹو زرداری نے کہیا کہ پیپلز پارٹی تے کشمیریاں دے رشتا 3 نسلاں دا اے‘ تُسیں ذوالفقار علی بھٹو تے بے نظیر بھٹو دا ساتھ دِتا تے اوہناں نے تہاڈا ساتھ دِتا‘ پیپلز پارٹی نے ازاد کشمیر وچ جمہوریت تے پارلیمانی نظام دی بنیاد رکھی‘ ازاد کشمیر دی لوکائی عمران خان دی مہنگائی تے بیروزگاری دا مقابلا کر رہی اے۔ بلاول نے کہیا کہ مقبوضا کشمیر وچ حملا ہوندا اے تے عمران خان کہندا اے میں کیہ کراں‘ مقبوضا کشمیر وچ مودی سرکار ظلم کر رہی اے۔ کٹھ پتلی نے کشمیر ہائی وے دا ناں سری نگری ہائی وے رکھ دِتا‘ ایہ اوہناں دا جواب اے۔ کشمیریاں دے نال اکسُرتا دا اظہار جمعے والے دن وی صرف اِک ہفتا کیتا‘ ایس کٹھ پتلی نے کشمیر دا سودا کر لیا اے‘ کشمیر دے فیصلے لوکائی نہیں سگوں کٹھ پتلی کر رہے نیں‘ کٹھ پتلی وزیراعظم دی ڈکٹیشن اُتے نہیں چلاں گے‘ کشمیر دا سفیر بندے بندے عمران خان ہُن کلبھوشن یادیو دا وکیل بن چُکیا اے‘ کلبھوشن یادیو نُوں این آر ا و دین لئی آرڈیننس لیاندا گیا‘ کلبھوشن نے آرڈیننس دا فایدا نہیں لیا تے پارلیمان وچ آ گئے‘ عمران خان نے صرف کلبھوشن نُوں این آر او دِتا‘ جے عمران خان نے کلبھوشن نُوں این آر او دینا اے تے اسیں اودا ساتھ نہیں دواں گے۔ چیئرمین پیپلز پارٹی دا کہنا اے کہ ساڈا نعرا رائے شماری دا اے‘ کشمیر بارے فیصلے صرف کشمیری لوکائی کرن گے‘ کشمیر دی لوکائی پاکستان پیپلز پارٹی دا وزیراعظم منتخب کرے گی۔ چیئرمین پاکستان پیپلز پارٹی نے ہور کہیا کہ اسیں چ اہندے آں کہ کشمیر دے فیصلے کشمیر دی لوکائی ای کرے‘ انشاء اللہ کشمیر دے فیصلے کشمیر دی لوکائی ای کرے گی کوئی ہور ایہناں دا فیصلا نہیں کر سکدا‘ ساڈا پہلے دن دا موقف قائد لوکائی ذوالفقار علی بھٹو شہید دا لایا نعرا ”ساڈا نعرا سبھ تے بھاری‘ رائے شماری‘ رائے شماری سی‘ اج وی اوسے موقف اُتے قایم آں‘ باقی جماعتاں دی پالیسی مختلف ہو سکدی اے‘ پر پیپلز پارٹی دی اِک ای پالیسی اے تے ایسے پالیسی نُو ہمیشا آن رکھاں گے۔ اوہناں نے کہیا کہ 5 اگست 2019 نُوں جدوں مودی نے مقبوضا کشمیر اُتے تواریخی حملا کیتا تے بزدل عمران خان نے جہڑا مؤقف اختیار کیتا اوہ تواریخ دا کمزور ترین موقف اے‘ کٹھ پتلی دا کہنا سی کہ اسیں ہر جمعے نُوں سرحد اُتے کھلو جاواں گے‘ کشمیر ہائی وے دا ناں اج توں سرینگر ہائی وے ہووے گا‘ قائد لوکائی ذوالفقار علی بھٹو شہید نے کشمیر اُتے اِک دلیرانا موقف اختیار کیتا تے کشمیریاں دی اواز نُوں بھرویں انداز وچ بلند کردے رہے‘ مقبوضا کشمیر دی لوکائی مودی دے ظلم تے ستم دا مقابلا کر رہی اے جد کہ ازاد کشمیر دی لوکائی نا اہل‘ ناکام ترین کٹھ پتلی حکمران عمران خان دیاں بیوقوف حرکتاں دا مقابلا رہی اے‘ ایتھوں دی لوکائی مہنگائی دی سونامی وچ ڈُب کے مر رہی اے‘ غربت تے بیروزگاری آخری حداں نُوں ہتھ لا رہی اے‘ پیپلز پارٹی نے اپنے دور اقتدار وچ لوکائی نوں ریلیف دین لئی تواریخی اقدامات کیتے‘ ملازماں دیاں تنخاہواں وچ 120 فیصد‘ پنشنراں دی پنشن وچ 100 فیصد جد کہ سپاہیاں دیاں تنخاہواں وچ 170 فیصد وادھا کیتا‘ ایہدے بعد ن لیگ تے پی ٹی آئی دیاں حکومتاں نے کیہ کجھ کیتا‘ ایس مشکل دور وچ ایہو جہی حکومت دی ضرورت ضرورت اے جہڑی لوکائی دا ساتھ دیوے‘ عوام دی نظر قائد لوکائی ذوالفقار علی بھٹو شہید دی جماعت پیپلز پارٹی اُتے اے‘ لوکائی نُوں عمران خان وانگوں بلککل لاوارث نہیں چھڈاں گے۔ بلاول نے کہیا کہ پی پی پی دی بنیاد ای کشمیر کاز اُتے رکھی گئی سی۔ قائد لوکائی ذوالفقار علی بھٹو شہید‘ محترما بے نظیر بھٹو شہید‘ آصف علی زرداری توں اج تک اسیں کشمیریاں دے شانا بشانا کھلوتے آں‘ انشاء اللہ اگے وی کشمیریاں دے نال کھلوتے رہواں گے‘ اسیں قائد لوکائی ذوالفقار علی بھٹو شہید توں سکھیا اے کہ جے کشمیر تے کشمیری لوکائی لئی 1000 سال تک سانوں لڑنا پوے تے اسیں ایہدے لئی تیار آں‘ اسیں محترما بے نظیر بھٹو شہید توں سکیھا اے کہ جتھے ساڈے کشمیری بھراواں تے بھیناں دا پسینا ڈِگے گا اوتھے ساڈا خون ڈِگے گا‘ قائد لوکائی ذوالفقار علی بھٹو شہید‘ محترما بے نظیر بھٹو شہید دے مشن دے مطابق جدوجہد جاری رکھاں گے۔