پچھلے 24 گھنٹیاں دے دوران کرونا دے مثبت کیساں دی شرح 2.02 فیصد،901 بندیاں وچ وائرس دی تصدیق: نیشنل کمانڈ اینڈ اپریشن سینٹر……٭رویل خبر٭

اسلام آباد (نیوز ڈیسک) ملک وچ کرونا توں متاثرا بندیاں وِچوں صحتیاب ہون والیاں دی گنتی 9 لکھ توں ٹَپ گئی جد کہ فعال روگیاں دی گنتی ہُن وی 32 ہزار 241 اے۔ نیشنل کمانڈ اینڈ اپریشن سینٹر ولوں جاری آنکڑیاں دے مطابق پورے ملک وچ پچھلے دن کرونا دے 44 ہزار 544 ٹیسٹ کیتے گئے جہناں وِچوں 901 بندیاں وچ وائرس دی تصدیق ہوئی‘ ایس طرحاں ملک وچ پچھلے 24 گھنٹیاں دے دوران کرونا دے مثبت کیساں دی شرح 2.02 فیصد رہی۔ وسیلیاں مطابق ملک وچ کرونا توں 9 لکھ 291 بندے صحت یاب ہو چکے نیں۔ کرونا وباء نال ہور 23 بندے انتقال کر گئے نیں جہدے بعد ایس وباء نال لقما اجل بنن والے مصدقا روگیاں دی گنتی 22 ہزار 211 ہو گئی اے۔ ملکو چ ایس ویلے کرونا دے 32 ہزار 241 فعال کیسز نیں جہڑے اپنے گھراں یاں مختلف ہسپتالاں وچ علاج ہیٹھ نیں‘ فعال روگیاں وِچوں 1 ہزار 941 دی حالت ماڑی اے۔ دوجے پاسے بلوچستان وچ کرونا کیسز وچ وادھا ویکھن وچ آ رہیا جہدے کار ن حکومت نے سخت اقدامات دا فیصلا کیتا اے۔ ایس توں وکھ ملک وچ کرونا توں بچاء دی ویکسی نیشن دا عمل وی جاری اے۔ پچھلے دن ملک وچ 2 لکھ 90ہزار 577 بندیاں نُوں ویکسین لائی گئی‘ 2 لکھ 50 ہزار 696 نُوں پہلی جد کہ 39 ہزار 881 نُوں دوجی خوراک دِتی گئی‘ ایس طرحاں ہُن تک 1 کروڑ 19 لکھ 78 ہزار 339 نُوں پہلی جد کہ 28 لکھ 15 ہزار 454 نُوں دوویں خوراکاں لائیاں جا چُکیاں نیں۔