کرونا وائرس نال ہور 23 بندے چلانا کر گئے جد کہ 735 نویں مثبت کیسز رپورٹ……٭رویل خبر٭

اسلام آباد (نیوز ڈیسک) ملک وچ کرونا وائرس نال ہور 23 بندے چلانا کر گئے جد کہ 735 نویں مثبت کیسز رپورٹ ہوئے نیں۔ نیشنل کمانڈ اینڈ اپریشن سینٹر ولوں جاری بیان دے مطابق پچھلے 24 گھنٹیاں دے دوران ملک وچ کرونا دی تشخیص لئی 41 ہزار 133 ٹیسٹ کیتے گئے جہناں وِچوں 735 بندیاں وچ کرونا وائرس دی تصدیق ہوئی۔ ایس طرحاں کرونا دے مثبت کیساں دی شرح 1.78 فیصد رہی۔ ملک وچ ہُن تک کرونا دے مصدقا مثبت کیساں دی گنتی 956,392 ہو گئی اے جہناں وِچوں 901,985 روگی شفا یاب ہو چکے نیں۔ پچھلے دن ایس وباء نے ہور 23 بندیاں دیاں زندگیاں نُوں نگل لیا۔ ایس طرحاں ملک وچ ہُن تک ایس وباء نال واصل بندیاں دی مجموعی گنتی 22 ہزار 254 ہو گئی اے۔ ملک وچ کرونا وائر س دے فعال کیساں دی گنتی وچ کمی آئی اے تے فعال کیساں دی گنتی 32 ہزار 153 ہو گئی اے جد کہ تقریبن 2 ہزار روگیاں دی حالت ماڑی اے۔دوجے پاسے وزارت صحت ولوں وڈی عید لئی نویاں ہدایتاں جاری کر دِتیاں گئیاں نیں۔ وزارت صحت ولوں جاری بیان وچ کہیا گیا اے کہ ایہ ہدایتاں جنور منڈی‘ عید دی نماز‘ قربان گاہواں بارے نیں جہناں دا مقصد شہریاں نُوں رہنمائی فراہم کرنا اے۔ وزارت صحت مطابق کرونا وائرس دی نویں قسم تیزی نال کھلر رہی اے تے ایہ کرونا دی نویں لہر دا کارن بن رہی اے‘ جنور منڈیاں وچ کرونا توں بچاء لئی ایس او پیز اُتے عملدرآمد کیتا جاوے‘ جنور منڈیاں وچ سماجی فاصلا یقینی بنایا جاوے‘ شہری عید الاضحی دے دوران صرف ضروری سفر کرن کیوں جے نویں کرونا لہر دا دھڑکُو موجود اے۔ گائیڈ لائنز دے مطابق سماجی فاصلے دا خیال رکھن‘ فیملی تقریبات تے عید اُے گلے ملن توں اجتناب کیتا جاوے‘ کرونا کھلار دا کارن بن سکدا اے‘ ہجوم والیاں تھاواں اُتے تے نماز عید دے دوران رَش نال کرونا وائرس کھلر سکدا اے‘ قربانی دے جنوراں دی آن لائن خریداری نُوں ترجیح دِتی جاوے تے جنور منڈیاں لئی کھلیاں تھاواں دا انتخاب کیتا جاوے۔ وزارت صحت توں جاری گائیڈ لائنز وچ کہیا گیا اے کہ ماسک دے بغیر لوکاں دے جنور منڈی داخلے اُتے پابندی لائی جاوے‘ منڈیاں دے داخلی‘ خارجی راہواں اُتے سینیٹائزر رکھے جان‘ جنور ویچن والیاں لئی ویکسین لازمی متھی جاوے‘ ویکسین دے بغیر جنور ویچن دا کاروبار نہیں کر سکن گے‘ خریدار ماسک پا کے منڈی جان‘ بخار‘ نزلا‘ زکام‘ کھنگ تے گلا خراب ہون والے بندے جنور منڈی نہ جان‘ خریدار‘ وپاری توں دو میٹر دا فاصلا رکھن۔