سکولاں وچ گرمائی چُھٹیاں دا اعلان……٭رویل خبر٭

لاہور (نیوز ڈیسک) تعلیمی اداریاں وچ گرمیاں دیاں چھٹیاں دا اعلان۔ تفصیلات دے مطابق صوبا پنجاب دے وزیر تعلیم مراد راس نے پہلی جولائی توں پورے صوبے دے سکولاں وچ اِک مہینے دیاں چھٹیاں دا اعلان کر دِتا۔ مراد راس نے سماجی رابطیاں دی ویب سائٹ ٹوئٹر اُتے اپنے پیغام وچ کہیا کہ پنجاب دے سکولاں وچ گرمیاں دیاں چھٹیاں دا اغاز پہلی جولائی توں ہووے گا تے پہلی اگست تک سکول بند رہن گے۔ اوہناں نے ماپیاں تے بچیاں توں درخاست کیتی اے کہ اوہ ایہناں چھٹیاں وچ حکومت دے جاری کردا ایس او پیز اُتے عمل کرن۔ وسیلیاں مطابق خیبر پختونخوا سرکار نے وی گرمی دی شدت ودھن دے کارن سکولاں وچ گرمیاں دیاں چھٹیاں دا فیصلا کیتا اے۔ محکما ابتدائی تے ثانوی تعلیم خیبر پختونخوا نے گرمیاں دیاں چھٹیاں دا اعلامیا جاری کر دِتا اے۔ اعلامیے مطابق پورے صوبے دے سارے نجی تے سرکاری تعلیمی ادارے پہلی جولائی توں 11 جولائی تک بند رہن گے۔ ایس فیصلے دا اطلاق کیڈٹ کالجز‘ ماڈل سکولز‘ مدرسیاں تے ساریاں اکیڈمیاں اُتے ہووے گا۔ایس توں وکھ وفاقی تعلیمی اداریاں وچ چھٹیاں دا اعلان کر دِتا گیا اے جتھے 18 جولائی توں پہلی اگست تک چھٹیاں ہون گیاں۔