kraamaat@gmail.com
+ +92 333-430-6384


سپیکر قومی اسمبلی نے صرف اواز دے ووٹ اُتے ای بجٹ منظور کر لیا: بلاول بھٹو زرداری……٭رویل خبر٭


نمائندا رویل June 30, 2021


اسلام آباد (نیوز ڈیسک) چیئرمین پیپلز پارٹی بلاول بھٹو زرداری نے کہیا اے کہ سپیکر قومی اسمبلی نے صرف اواز دے ووٹ اُتے ای بجٹ منظور کر لیا‘ ایہ غیر قانونی عمل اے۔ اسلام آباد وچ سندھ ہاؤس وچ پریس کانفرنس کردیاں ہویاں بلاول بھٹو زرداری نے کہیا کہ جدوں اسیں اواز دے ووٹ نُوں چیلنج کیتا تے ایہدے اُتے سپیکر قومی اسمبلی اسد قیصر نُوں گنتی کروانی چاہیدی سی پر سپیکر نے انج نہیں کیتا جہدے نال سارا عمل غیر قانونی ہو گیا‘ سپیکر نُوں فورن ایہدا جواب دینا پوے گا‘ جے حکومت دا بجٹ اینا چنگا اے تے اوہ کیوں لُک رہی اے‘ ایہ اسمبلی وی دھاندلی اُتے بنائی گئی تے ہُن بجٹ وی‘ ایہ آئی ایم ایف دا بجٹ اے‘ ایہنوں غلط طریقے نال پاس کروایا گیا۔ چیئرمین پی پی نے کہیا کہ اج پیپلز پارٹی دے سارے اراکین ایوا وچ موجود سن‘ سارے اپوزیشن اراکین نُوں وی موجود ہونا چاہیدا سی‘ شہباز شریف نال وعدا کیتا سی پیپلز پارٹی دے سارے اراکین موجود ہون گے‘ اسیں وعدا پورا کیتا‘ مؤثر اپوزیشن اوس ویلے ہوندی اے جدوں اپوزیشن لیڈر ایوان وچ موجود ہون‘ سانوں سپیکر قومی اسمبلی دے خلاف تحریک عدم اعتماد لیانی چاہیدی اے‘ قائد حزب اختلاف اُتے جے حکومتی بنچز حملا کرن گے تے اسیں برداشت نہیں کر سکدے‘ پتا نہیں ن لیگ والے کویں کر رہے نیں۔ بلاول بھٹو نے حکومت توں مطالبا کیتا کہ افغانستان دی صورتحال اُتے اعتماد وچ لیا جاوے تے قومی سلامتی دے فورم نُوں استعمال کتیا جاوے گا‘ شہباز شریف انتخابی اصلاحات لئی اے پی سی بلا رہے یں ایہدے وچ اپنا وفد گھلاں گے۔ اوہناں نے کہیا کہ نیب چیئرمین دے اثاثیاں دی وضاحت ہونی چاہیدی اے‘ نیب دے ہر افسر دے اثاثیاں نُوں ساہمنے لیاندا جاوے‘ چیئرمین نیب نُوں رضا کارانا اپنی تعیناتی دے دن توں اج تک دے اثاثے ساہمنے لیانے چاہیدے نیں ورنا اسیں قانون سازی لیاواں گے۔