اپوزیشن نُوں مذاکرات دی دعوت، انتخابی اصلاحات جمہوریت دا مستقبل اے:عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے انتخابی اصلاحات لئی اپوزیشن نُوں مذاکرات دی دعوت دے دِتی۔ وزیراعظم عمران خان نے قومی اسمبلی دے اجلاس وچ خیالاں دا اظہار کردیاں ہویاں بجٹ دی منظور ی اُتے پار ٹی تے اتحادیاں دا شکریا اد اکیتا جد کہ اپوزیشن نُوں انتخابی اصلاحات لئی دعوت ی دِتی۔ اوہناں نے کہیا کہ انتخابی اصلاحات جمہوریت دا مستقبل اے‘ ایس ملک وچ 1970 دے بعد ساریاں چوناں متنازع ہوئیاں‘ سینیٹ تے ضمنی چوناں وچ وی جھیڑے ساہمنے آئے‘ 2013 دے الیکشن وچ 4 حلقے کھولن دی درخاست دِتی‘ ڈھائی ورھے بعد چاراں حلقیاں وچ دھاندلی نکلی‘ اصلاحات نہیں کراں گے تے ہر الیکشن وچ انج ہووے گا۔ عمران خان نے کہیا کہ 2018 دے الیکشن وچ اپوزیشن نے پہلے دن ای کہیا کہ چوناں ٹھیک نہیں ہوئیاں پر ایہ نہیں دَسیا کہ کویں ٹھیک نہیں ہوئیاں‘ صاف شفاف الیکشن دا اِک ای طریقا اے‘ اوہ ای وی ایم اے‘ الیکٹرانک ووٹنگ مشین نال چوناں وچ شفافیت آئے گی‘ جے اپوزیشن دے کول کوئی ہور تجویز ہے تے اسیں سنن نُوں تیار آں‘ ایہ حکومت تے اپوزیش دی گل نہیں سگوں جمہوری مستقبل دا مسئلا اے‘ ویلا آ گیا اے کہ الیکشن لڑیے تے کسے نُوں فکر نہ ہووے کہ دھاندلی نال ہڑا دِتا جاوے گا‘ ایہو جہے الیکشن ہونے چاہیدے نیں جہناں دے نتیجے ہارن والے وی منن‘ جے اسیں الیکشن اصلاحات نہ کیتے تے اگے وی دھاندلی دے الزامات لگدے رہن گے۔ وزیراعظم نے ہور کہیا کہ پاکستان ہُن فلاحی ریاست ول جا رہیا اے‘ جدوں وزیراعظم پیسا چوری کر کے باہر گھلدا اے تے ملک تباہی ول جاندا اے جد کہ اوہ معاشر اُتے جاندا اے جتھے قانون دی حکمرانی ہوندی اے‘ ملک پٹواری دی نہیں وزیراعظم تے وزیراں دی کرپشن نال تباہ ہوندا اے‘ پچھلے دن سندھ دے ایم این اے نُوں نیب پھڑن گیا تے لوکاں نے نیب دے اہلکاراں نُوں ماریا‘ پہلی وار نیب وڈے وڈے لوکاں اُتے ہتھ پا رہیا اے ایس لئی رؤلا پا رہے نیں کہ ہُن نیب بُرا ہو گیا۔ 10 سال ایہ حکومت وچ رہے پر کیوں قانون تبدیل نہیں کیتا۔ عمران خان نے کہیا کہ لاہور وچ سرکاری زمین توں قبضا چھڈوایا گیا تے کہیا گیا ظلم ہو رہیا اے‘ ماضی وچ جدوں ایہناں اُتے ہتھ نہیں پایا جاندا سی تے سبھ چُپ سن‘ اِک مہذب ملک ایس طرحاں نہیں چل سکدا جدوں تک وڈے کرپٹ لوکاں نُوں نہیں پھڑیا جاندا‘ قانون دی حکمرانی اِک معاشرے دی بنیاد اے‘ اج سپریم کورٹ تے لاہور ہائیکورٹ سبھ ازاد اے‘ اسیں کسے جج نُوں فون نہیں کردے‘ طاقتور لوکاں نُوں جدوں تک قانون ہیٹھ نہیں لیاواں گے ملک ترقی نہیں کرسکدا۔ وزیراعظم عمران خان نے کہیا کہ لا الہ الا اللہ غیرت دیندا اے تے کوئی ملک غیرت دے بغیر نہیں اُٹھدا‘ جہڑا اللہ دے ساہمنے جھُکدا اے اوہ کسے سپر پاور دے ساہمنے نہیں جھُکے گا‘ اسیں امریکا دی فرنٹ لائن سٹیٹ بنن دا فیصلا کیتا جہدے نال زندگی وچ سبھ توں ودھ ذلت محسوس ہوئی‘ امریکا دی جنگ وچ شامل ہو کے بہت وڈی حماقت کیتی‘ امریکا نے جو کہیا اوہ اسیں کردے رہے‘ میں کہیا اسیں دوجیاں دی جنگ دا حصا کیوں بنیے‘ اسیں اپنے لوکاں دیاں جاناں دیاں قربانیاں دوجے ملک لئی کیوں دیے‘ جدوں کہیا کہ افغان مسئلے دا فوجی حل نہیں تے مینوں طالبان خان کہیا گیا۔ عمران خان نے ہور کہیا کہ امریکا ڈرون حملے پاکستان دیاں حکومتاں دی اجازت نال کردا رہیا جہنوں ساڈیاں حکومتاں لُکاندیاں رہیاں‘ 30 سال توں لندن وچ ساڈا دہشتگرد بیٹھا اے‘ ایہنوں مارن لئی کیہ برطانیا سانوں اجازت دیوے گا کہ پاکستان لندن وچ ڈرون حملا کرے؟ کدی نہیں‘ تے فیر اسیں کیوں اجازت دیندے رہے‘ دنیا نے نہیں اسیں آپ اپنے آپ نُوں ذلیل کیتا‘ ایہدے توں اسیں اِک سبق سکھیا اے کہ کدی ایس قوم نے کسے لئی کسے خوف توں اپنی خُد مختاری اُتے سمجھوتا نہیں کرنا‘ میں امریکا نُوں فوجی اڈے دین توں صاف انکار کر دِتا اے۔ اوہناں نے کہیا کہ میرے توں پُچھیا گیا کہ کیہ پاکستان امریکا نُوں اڈے دیوے گا؟ میں ایہناں نُوں کہنا چاہندا آں کہ 70 ہزار لوک جنگ وچ ساڈے مارے گئے‘ کیہ امریکا نے ایس قربانی دی کدی تعریف کیتی‘ اوہنے پُٹھا ساڈے اُتے دوغلے پن دا الزام لا دِتا تے سانوں بُرا بھلا کہیا۔ اسیں ہُن کدی خوف تو ں قومی سلامتی اُتے کمپرو مائز نہیں کراں گے۔ اوہناں نے کہیا کہ افغانستان توں فوجاں دے انخلاء دا مشکل ویلا آ رہیا اے‘ شکر اے امریکا نُوں سمجھ آ گئی اے کہ افغانستان دا مسئلا جنگ نال نہیں سگوں گلبات نال حل ہووے گا۔ اسیں افغاناں نُوں جاندے آں‘ اوہ ساڈے بھرا نیں‘ سانوں اوہناں دی تواریخ دا پتا اے‘ افغانستان نے کدی دوجیاں دی مداخلت نُوں قبول نہیں کیتا۔ اوہناں نے کہیا کہ پاکستان دی حکومت اجازت دے کے ڈرون حملیاں دی مذمت کردی سی‘ امریکی سینیٹر ایڈمرل مولن نے کارلن لیون نُوں کہیا کہ پاکستان حکومت دی اجازت نال ڈرون حملے کردے آں‘ ایڈمرل نے کہیا کہ پاکستان دی حکومت اپنی لوکائی نال سچ نہیں بولدی۔