عام بندے دی آمدنی وچ بہتری آ ئی‘ پیداواری سیکٹر دی صلاحیت وچ وی وادھا ہو رہیا اے: وفاقی وزیر منصوبا بندی اسد عمر ……٭رویل خبر٭

اسلام آباد (نیوز ڈیسک) وفاقی وزیر منصوبا بندی اسد عمر نے کہیا اے کہ پاکستان وچ معاشی استحکام آ چُکیا اے تے ویلے دے نال معاشی ترقی دی رفتار تیز ہو رہی اے‘ تعمیراتی شعبے وچ جہڑی تیزی آئی اے اودے توں بہت لوکاں نُوں فایدا پہنچے گا‘ تعمیراتی شعبا چلن نال ایہدے نال جُڑیاں 40 انڈسٹریاں وی چلن گیاں‘ تعمیراتی شعبے وچ تیزی نال روزگار دے موقعے وی پیدا ہون گے۔ اوہناں نے ایہناں خیالاں دا اظہار پچھلی سام ایف پی سی سی آئی دے نائب صدر تے پچھلے چیئرمین آباد عارف یوسف جیو اولوں اسلام آباد وچ کونسل آف اکنامک اینڈ انرجی جرنلسٹ (سیج) کراچی دے عہدیداراں تے ممبران دے اعزاز چ منعقدا تقریب نال خطاب کردیاں ہویاں کیتا۔ اسد عمر نے ہور کہیا کہ ملکی معیشت لئی فیصلے لوکائی اُتے براہ راست اثر انداز ہوندے نیں‘ معاشی فیصلیاں نُوں درست طریقے نال اگاہی دین نال بہت فایدا ہووے گا‘ اسیں کونسل آف اکنامک اینڈ انرجی جرنلسٹ دے قیام نُوں ویلکم کردے آں‘ میڈیا دی رائے حکومتی فیصلیاں اُتے اثر انداز ہوندی اے‘ سچ دا قیام موجودا دور وچ ویلے دی ضرورت اے‘ ایہدے نال اداریاں نُوں سہولت ملے گی‘ اسیں سیج نُوں بھرویں سپورٹ کراں گے۔ اسد عمر نے ہور کہیا کہ پاکستان معاشی ترقی ول گامزن ہو گیا اے‘ آن والے ویلے وچ ہور بہتری نظر آئے گی۔ اوہناں نے کہیا کہ الیکشن جتن لئی مصنوعی معاشی نمو پائیدار نہیں ہوندی تے پی ٹی آئی حکومت ایہ روش نہیں اپنائے گی۔ اوہناں نے کہیا کہ عام بندے دی آمدنی وچ بہتری آ رہی اے‘ پیداواری سیکٹر دی صلاحیت وچ وی وادھا ہو رہیا اے‘ تعمیراتی شعبے نُوں ترقی دین‘ معیشت نُوں مستحکم کرن تے ملکی پالیسی سازی وچ اباد بہت اہم کردار دا کر رہیا اے۔