اپوزیشن ہُن ذہنی طور اُتے تیار اے کہ عمران خان اپنی مدت پوری کرے گا:شیخ رشید احمد……٭رویل خبر٭

راولپنڈی (نمایندا رویل) وفاقی وزیر داخلا شیخ رشید احمد نے کہیا اے کہ گلگت بلتستان دے بعد ازاد کشمیر دیاں چوناں وچ تحریک انصاف تواریخی کامیابی دے جھنڈے گڈھے گی‘ ساریاں سیاسی جماعتاں اوور سیز پاکستانیاں نُوں ووٹ دا حق دین لئی متفق نیں‘ بیرون ملک مقیم 1 کروڑ دے نیڑے تیڑے پاکستانی تحریک انصاف تے عمران خان دے ووٹر نیں‘ آندے 5 ورھے عمران خان دی قیادت وچ پی ٹی آئی حکومت قایم کرن و چ اوور سیز پاکستانیاں دا کلیدی کردار ہووے گا‘ 3 ورھیاں تک عمران خا نُوں ڈِگان دیاں گلاں کرن والی اپوزیشن ہُن ذہنی طور اُتے تیار اے کہ عمران خان اپنی مدت پوری کرے گا‘ چین تے امریکا تے یورپ سنے سارے ملکاں نال چنگے تعلقات رکھنا چاہندے آں‘ دہشتگردی خلاف پاکستان دی عظیم فوج نے اپنیاں جاناں ہتھیلی اُتے رکھ کے ملک وچ امن و امان دی فضاء نُوں بحال رکھیا اے‘ وزیراعظم عمران خان نے اپنے منصب دا اہم کردار ادا کردیاں ہویاں اپوزیشن ول ہتھ ودھایا اے۔ ایہناں خیالاں دا اظہار اوہناں نے راولپنڈی وچ ایل اے 34(ویلی4) توں تحریک انصاف دے امیدوار جاوید بٹ دی حمایت وچ منعقدا ظہرانے بعد میڈیا نا ل گلبات کردیاں ہویاں کیتا۔ اوہناں نے کہیا کہ عمران خان دی اقوام متحدا دی تقریر نُوں جس طرحاں قوم نے سلاہیا سی ایسے طرحاں کل دی تقریر نے پاکستانی قوم دی ترجمان‘ کشمیریاں دے جذبیاں دا اظہار کیتا اے‘ سارے کشمیریاں نُوں ایہو کہنا چاہندا آں کہ اوہ تحریک انصاف نُوں ووٹ دین‘ کشمیر دیاں چوناں وچ جہڑے امیدوار پاکستان تحریک انصاف دے حق وچ دستبردار ہون گے اوہناں دے گھراں وچ جا کے شکریا ادا کراں گا‘ پاکستانی سیاست وچ بہت وڈا فرق پین جا رہیا اے جو ملکی سالمیت لئی بہترین سیاست ہووے گی‘ حکومت تے اپوزیشن رَل کے اِک نویں راہ وچ چلن والی اے۔ اوہناں نے کہیا کہ ساری قوم نُوں ایہو کہندا سی کہ عمران خان کثرت رائے نال بجٹ پاس کرے گا‘ شہباز شریف تے مریم نواز دے بارے وچ جدوں کجھ کہندا سی تے میڈیا میرا مذاق اُڈاندا سی پر ہُن دوویں سیاست توں بہت دور جا چکے نیں کیوں جے ایہناں دوہاں و چ بہت وڈا خلاء آ چُکیا اے تے ایہناں دی سیاست وچ وی فرق اے۔اوہناں نے کہیا کہ چین امریکا تے یورپ سنے سارے ملکاں نال چنگے تعلقات چاہندے آں تے آئندا افغانستان وچ جہڑی سیاست ہون جا رہی اے جہدے وچ حکومت تے اپوزیشن اکٹھی ہووے گی تے دُعا اے کہ افغانستان وچ خانا جنگی دی کوئی صورت پیدا نہ ہووے تے جس طرحاں اسیں کسے ملک لئی اپنی دھرتی استعمال نہیں کرن دِتی اوسے طرحاں کسے دوجے ملک نُوں وی پاکستان دے خلاف اپنی دھرتی ورتن دی بلکل اجازت نہیں دینی چاہیدی۔ اوہناں نے کہیا اے کہ حکومت نُوں پروٹیکٹ کرن دی پوری پالیسی رکھدے آں تے پچھلے 20 سال توں دہشتگردی دے خلاف جنگ لڑ رہے آں‘ پاکستان دی عظیم فوج نے اپنیاں جاناں ہتھیلی اُتے رکھ کے پاکستان وچ امن و امان دی فضاء نُوں بحال رکھیا ہویا اے۔