ڈاڈھی گرمی وچ بجلی دی بدترین لوڈشیڈنگ نال لوکاں دی زندگی اجیرن،شارٹ فال 6 ہزار میگا واٹ تک اپڑ گیا……٭رویل خبر٭

لاہور(نیوز ڈیسک) صوبائی راجدھانی لاہور سنے مختلف شہراں وچ بجلی دا بحران بدستور جاری اے۔ پورے ملک وچ بجلی دی غیر اعلانیا8 توں 10 گھنٹیاں دی بندش نال معمولات زندگی متاثر ہون لگے نیں جد کہ بجلی دا شارٹ فال 6 ہزار میگا واٹ تک اپڑ گیا اے۔ وسیلیاں مطابق ملک وچ بجلی دی مجموعی پیداوار 19 ہزار میگا واٹ اے جد کہ طلب 25 ہزار میگا واٹ اے۔ پن بجلی وسیلیاں نال 4 ہزار میگا واٹ بجلی پیدا کیتی جا رہی اے۔ سرکاری تھرمل پاور پلانٹ 2 ہزار میگا واٹ بجلی پیدا کر رہے نیں۔ وسیلیاں مطابق آئی پی پیز توں پیداوار 13 ہزار میگا واٹ اے۔ آئیسکو نُوں 500 میگا واٹ بجلی دے شارٹ فال دا ساہمنا اے۔ آئیسکو نُوں بجلی دی فراہمی 1700 میگا واٹ جد کہ طلب 2200 میگا واٹ اے۔ شارٹ فال دے کارن پورے ملک وچ 8 توں 10 گھنٹے بجلی دی لوڈشیڈنگ کیتی جا رہی اے۔ ڈاڈھی گرمی وچ بجلی دی بدترین لوڈشیڈنگ نال لوکاں دی زندگی اجیرن ہو گئی اے‘ مختلف علاقیاں وچ بجلی دی بندش پارو ں پانی نایاب ہو گیا اے جہدے نال لوک قیامت خیز گرمی وچ دُہرے عذاب دا شکار ہو رہے نیں۔ شہریاں دا کہنا اے کہ آئے دن حکومتی وزراء بجلی دی کوئی کمی نہیں کَہ کَہ کے نہیں تھکدے تے فیر ایس ظالمانا لوڈشیڈنگ دا کیہ جواز اے‘ جے سسٹم وچ وادھو بجلی ہون دے باوجود لوڈشیڈنگ ہو رہی اے تے ایہ نااہلی دی انتہا اے۔ اوہناں نے کہیا اے کہ سانوں ڈاڈھی گرمی دے نال نال غیر اعلانیا لوڈشیڈنگ دا عذاب وی بھگتنا پے رہیا اے۔ آٹا‘ گھیو‘ کھنڈ تے دوائی دے بعد ہُن لوکائی بجلی توں وی محروم ہو رہے نیں‘ عمران خان لوکائی نُوں لوڈشیڈنگ والے نویں پاکستان وچ لے آئے نیں‘ حکومت سیاست تے الزام تراسیاں چھڈے جے کم نہیں ہوندا تے گھر چلے جان‘ لوکائی نُوں ہور اذیت تے تکلیف نہ دیوے۔