kraamaat@gmail.com
+ +92 333-430-6384


 پاکستانی فوج اُتے تنقید برداشت نہیں کراں گے:آرمی چیف جنرل قمر جاوید باجوا ……٭رویل خبر٭


نمائندا رویل July 03, 2021


اسلام آباد (نیوز ڈیسک) آرمی چیف جنرل قمر جاوید باجوا دا کہنا اے کہ پاکستانی فوج اُتے تنقید برداشت نہیں کراں گے‘ میرے اُتے تنقید تے نواز شریف تے ایاز صادق نے وی کیتی پر اسیں برداشت کیتی۔ پارلیمانی کمیٹی برائے قومی سلامتی د ے اجلاس دی اندرونی کہانی ساہمنے آ گئی۔ وسیلیاں دے مطابق اجلاس وچ بریفنگ دے بعد سوالاں دے جوابات آرمی چیف نے آپ دِتے‘ پہلا سوال مشاہد حسین‘ دوجا شہباز شریف‘ تیجا بلاول بھٹو تے چوتھا شاہ محمود قریشی نے کیتا جد کہ سیاسی تے عسکری قیادت وچ بُہتی گپ شپ کھانے دی میز اُتے ہوئی‘ بریفنگ دا مقصد ملک دی سیکیورٹی پالیسی دی سیاسی اونرشپ لینا سی۔ وسیلیاں دے مطابق اجلاس وچ ماحول چنگا سی تے کسے معاملے اُتے وی تلخی نہیں ہوئی جد کہ اپوزیشن تے اسٹیبلشمنٹ وچ برف پگھلی اے۔ وسیلیاں دا کہنا اے کہ شہباز شریف ولوں سپیکر دفتر نُوں باقاعدا کہیا گیا سی کہ وزیراعظم اجلاس وچ نہ آن۔ بریفنگ دے دوران دَسیا گی اکہ افغانستان وچ مقامی فوجی چار مہینے توں تنخاہ نہ ملن اُتے آپ طالبان نال رَلدے جا رہے نیں جد کہ افغان طالبان دیاں فیملیاں لمے عرصے توں پاکستان وچ نیں‘ پاکستان وچ افغان مہاجرین دے 200 مدرسے وی نیں‘ خانا جنگی ہوئی تے 5 توں 7 لکھ افغان مہاجرین پاکستان آ سکدے نیں پر مہاجرین نُوں ایران وانگوں بارڈر دے نیڑے کیمپاں وچ رکھیا جاوے گا جد کہ ٹی ٹی پی تے پاکستان دشمن لوک مہاجرین دی شکل وچ آ سکدے نیں ایس لئی ایہناں نُوں روکنا ضروری اے۔ بریفنگ وچ عسکری قیادت نے کہیا کہ افغانستان سرزمین ساڈے خلا ف استعمال نہیں ہونی چاہیدی‘ افغانستان وچ ٹی ٹی پی تے بلوچ دہشتگرد تنظیماں دے 6 ہزار توں ودھ لوک موجود نیں‘ داعش دے 2 توں 3 ہزار بندے شام توں افغانستان منتقل ہوگئے‘ داعش دے لوک مختلف بارڈرز اُتے جا رہے نیں۔ افغانستان وچ نیٹو دے 7 ہزار 250 تے 1500 امریکی فوجی موجود نیں‘ چھے‘ ست سو فوجی امریکی سفارتخانے دی حفاظت لئی موجود رہن گے جد کہ بھارت تے طالبان دا حالے تک براہ راست رابطا نہیں ہویا۔ وسیلیاں دا کہنا اے کہ اجلاس دے دوران آرمی چیف نے کہیا کہ تہاڈے نال اسیں کھانا کھاواں گے‘ ناشتا وی کرن نُوں تیار آں‘ ایس موقع اُتے سپیکر قومی اسمبلی اسد قیصر نے کہیا کہ مسئلا کشمیر تے سیکیورٹی صورتحال اُتے بریفنگ لینی اے‘ کجھ دن بعد فیر اجلاس بلا لیندے آں جہدے اُتے آرمی چیف نے کہیا کہ سانوں کوئی اعتراض نہیں‘ بے شک ویک اینڈ اُتے ای اجلاس رکھ لوو۔ اجلاس وچ آرمی چیف نے آگو ن لیگ احسن اقبال نال مکالما کردیاں ہویاں کہیا کہ تہاڈے پُتر نال نیشنل ڈیفنس یونیورسٹی وچ مِلیا سی‘ آو ن لیگ مشاہد حسین نے کہیا کہ اپوزیشن خاص طور اُتے مسلم لیگ ن اُتے ہتھ ہولا رکھو جہدے اُتے آرمی چیف نے ہسدیاں ہویاں جواب دِتا کہ فواد چودھری وی نال ای کھلوتے نیں تہاڈے۔ وسیلیاں دے مطابق کھانے دی میز اُتے رانا ثناء اللہ تے رانا تنویر وی آ گئے تے جنرل باجوا نے کہیا میری تے گھروالی وی راجپوت اے تے میرے چھوٹے منڈے دی منگنی پشتوناں وچ ہوئی‘ ایہدے علاوا پاکستان دی فوج وچ 40 فیصد پشتون نیں‘ اسیں ساریاں نُوں نال لے کے چلدے آں۔ ایس موقع اُتے چیئرمین پیپلز پارٹی بلاول بھٹو زرداری نے آرمی چیف نُوں کہیا کہ پی ٹی ایم دے ایم این اے علی وزیر نُوں معاف کر دوو جہدے اُتے آرمی چیف نے کہیا کہ پاکستانی فوج اُتے تنقید برداشت نہیں کراں گے ایس لئی علی وزیر نُوں وی معافی منگنی پوے گی‘ میرے اُتے تنقید تے نواز شریف تے ایاز صادق نے وی کیتی پر اسیں برداشت کیتی۔ ایس دوران محسن داوڑ اُٹھ کے بولن دی کوشش کیتی تے سپیکر نے ڈَک دِتا جہدے اُتے جنرل قمر جاوید باجوا نے کہیا کہ تُسیں کھُل کے گل کرو‘ محسن داوڑ تُسیں میرے نال علیحدگی وچ وی ملے‘ کدی تہاڈا راہ نہیں روکیا‘ تُسیں الیکشن جت کے آئے ایس لئی تہاڈی گل سنن نُوں تیار آں‘ فوج اُتے الیکشن وچ مداخلت دا کہندے نیں‘ جے اسیں مداخلت کردے تے تُسیں جویں جتددے‘ تُسیں جدوں کہیا میں تہاڈے نال مِلیا۔ وسیلیاں نے ہور دَسیا کہ اجلاس دے دوران 90 منٹ تک ڈی جی آئی ایس آئی لیفٹیننٹ جنرل فیض حمید نے پوائنٹر دی مدد نال رلتیاں نُوں افغانستان دی موجودا صورتحال اُتے تفصیلی اگاہ کیتا جد کہ آرمی چیف نے اراکین دے سوالاں دے جوابات آپ دِتے‘ سبھ توں ودھ سوالات محسن داوڑ نے کیتے۔ افغانستان دے معاملے اُتے ہر سوال دا جواب آرمی چیف جنرل قمر جاوید باجوا نے دلایل تے بیک گراؤنڈ دے نال دِتا جد کہ ڈی جی آئی ایس آئی لیفٹیننٹ جنرل فیض حمید نے متحارب افغان گرُپاں نُوں اِک میز اُتے لیا ن بارے رابطیاں تے ملاقاتاں بارے اعتماد و چلیا۔ تفصیلی جوابات اُتے کئی موقعیاں اُتے رلتی ڈیسک وی وجاندے رہے۔ اپوزیشن لیڈر شہباز شریف نے کہیا کہ ایہو جہیاں بریفنگز ہوندیاں رہنیاں چاہیدیاں اے کئی دھڑکُو دور ہو گئے۔ اجلاس دوران بلاول نے وی تعریف کردیاں ہویاں کہیا کہ افغانستان دی صورتحال اُتے حقایق کھُل کے ساہمنے آ گئے نیں اسیں مطمئن آں۔ وسیلیاں مں طابق عسکری قیادت دا کہنا سی کہ ساڈا کیمپ بس پاکستان اے ہُن اسیں کسے کیمپ دا حصا نہیں آں‘ افغانستان دے مسئلے دا کوئی فوجی حل نہیں‘ امریکا نُوں وی پتا لگ گیا اے‘ افغان مسئلا سیاسی انداز وچ گلبات نال ای حل ہووے گا‘ اسیں کسے دی لڑائی ہُن نہیں لڑاں گے۔ عسکری قیادت دا ہور کہنا سی کہ ماضی وچ ساڈا بہت زیادا جانی تے مالی نقصان ہویا‘ ماضی وچ جو ہوندا رہیا اوہ ہُن نہیں ہووے گا‘ پاکستان دیس لامتی تے خُد مختاری سبھ توں مقدم اے‘ ایدھر اودھر دیاں لڑائیاں وچ نہیں پینا چاہندے۔ افغان لوکائی اُتے چھڈ دِتا جاوے کہ اوہ کہنوں منتخب کردے نیں۔ ساڈی دھرتی افغانستان دے خلاف استعمال ہووے گی نہ ای افغانستان دی دھرتی اپنے خلاف استعمال ہون دواں گے۔ ہُن ساڈی پالیسی وچ کوئی ابہام نہیں ماضی دیاں غلطیاں توں سِکھیا اے۔ وسیلیاں دا کہنا اے کہ اپوزیشن لیڈر شہباز شریف‘ بلاول زرداری سنے کئی پارلیمانی لیڈرز وکھرے ہو کے وی آرمی چیف نال ملے تے ڈی جی آئی ایس آئی تے آرمی چیف دے مدلل جواباں دی تعریف کیتی۔