پنجاب وچ بجلی دا ڈاڈھا بحران، بجلی دا ٹیرف 2 رُپئے 97 پیسے ہور مہنگا……٭رویل خبر٭

اسلام آباد (نیوز ڈیسک) لوڈشیڈنگ تے مہنگی بجلی توں پریشان لوکائی لئی بُری خبر اے‘ نیپرا نے وفاقی حکومت نُوں بجلی دا ٹیرف 2 رُپئے 97 پیسے ودھان دی اجازت دے دِتی۔ اکتوبر 2021 توں بجلی 1 رُپئے 72 پیسے مہنگی کرن دیاں حکومتی نظرثانی درخاستاں منظور کر لئیاں گئیاں‘ کمرشل‘ زرعی صارفین اُتے اِک رُپئے 25 پیسے سرچارج لان دی وی اجازت دے دِتی گئی‘ گھریلو صارفین نویں سرچارج توں مستثنا ہون گے۔ نیپرا گھریلو صارفین لئی بجلی اِک رُپئے 72 پیسے مہنگی کرن دی اجازت دِتی گئی‘ نیپرا نے اکتوبر توں بجلی مہنگی کرن دیاں حکومتی نظرثانی درخاستاں منظور کر لئیاں۔ وفاقی حکومت نے بجلی مختلف شماہی ایڈجسٹمنٹس دی مد وچ مہنگی کرن دا فیصلا کیتا۔ 2019-20 دی چوتھی شماہی دی مد وچ بجلی 82 پیسے مہنگی کرن دا فیصلا کیتا گیا‘ 2020-21 دی پہلی‘ دوجی سماہی ایڈجسٹمنٹس وچ بجلی 90 پیسے مہنگی کرن دا فیصلا کیتا گیا۔ بجلی دیاں قیمتاں وچ وادھے دا اطلاق اکتوبر 2021 توں کیتا جاوے گا۔ نیپرا بجلی صارفین توں وادھو وصولیاں اِک سال لئی کرے گا‘ نیپرا قیمتاں وچ وادھے دا اطلاق لائف لائن صارفین اُتے نہیں کیتا جاوے گا۔ نیپرا اِک شماہی ایڈجسٹمنٹ دی مدت ایس سال ستمبر وچ مُک جاوے گی۔ دوجے پاسے لاہور سنے پورے پنجاب وچ بجلی دا ڈاڈھا بحران پیدا ہو گیا اے تے شارٹ فال 6 ہزار میگا واٹ تک پہنچ گیا اے جہدے نال شہراں وچ 8 توں 10 جد کہ پنڈاں وچ 12 گھنے تک لوڈشیڈنگ کیتی جان لگی اے جہدے نال لوکائی دیاں چیکاں نکل گئیاں نیں تے اوہ حکومت دی جان نُوں رو رہے نیں۔