کشمیری لوکائی دے جذبے نُوں سلام،ظلم  دے نظام خلاف ساڈا جہاد اے‘ قانون دی حکمرانی لئی جنگ لڑ رہے آ ں:وزیر اعظم دابھمبر وچ جلسے نال خطاب ……٭رویل خبر٭

بھمبر (نیوز ڈیسک) وزیراعظم عمران خان نے کہیا اے کہ بدقسمتی نال اسیں غلط راہ اُتے چلے گئے ساں‘ بھیک لین والے دی کوئی عزت نہیں کردا‘ میں پوری دنیا وچ سبز پاسپورٹ دی عزت کروانا چاہندا آں۔ اداکاری کر کے باہر جان والے نواز شریف دی بیماری لندن اپڑدیاں ای مُک گئی۔ ایہناں خیالاں دا اظہار اوہناں نے ازاد کشمیر دے علاقے بھمبر وچ جلسے نال خطاب وچ کیتا۔ ایس موقع اُتے اوہناں دا کہنا سی کہ ووٹ پان ویلے لوکاں توں پُچھو کہ کیہ اوہناں دا لیڈر سچا اے؟ اسیں اپنے ملک نُوں وی بدلنا اے‘ میرے پاکستانی بھراؤ اسیں اپنے آپ نُوں بدلنا اے‘ میرے نبی ؐ دی شریعت اُتے چلو‘ شریعت اُتے چلن نال انسان وڈا بن جاندا اے‘ چاہندا آں پوری دنیا پاکستانیاں نُوں عزت نال ویکھے‘ بھیک منگ کے تے قرضے لے کے ملک نہیں چلایا جا سکدا۔ اوہناں نے کہیا کہ کشمیری لوکائی اُتے بھارت نے بہت ظلم کیتا‘ میں بھمبر دی لوکائی دے جذبے نُوں سلام پیش کردا آں‘ میں کشمیری لوکائی دے جذبے نُوں سلام پیش کردا آں۔ کرونا دے کارن دنیا دی معیشت تباہ ہو گئی اے‘ جتھے احتیاط نہیں کیتی گئی اوتھے لکھاں بندے زندگی دی بازی ہار گئے‘ پاکستان اُتے اللہ پاک دا کرم اے کہ سانوں کرونا توں بچایا‘ پر کرونا وائرس حالے پاکستان وچ ختم نہیں ہویا۔ ازاد کشمیر دی لوکائی ماسک لازمی پائے‘ گوانڈھی ملک بھارت وچ کرونا دی وجھا توں لکھاں لوک مر چکے نیں۔ اوہناں دا کہنا سی کہ اسیں طاقتور نُوں قانون ہیٹھ لیان دی کوشش کر رہے آں‘ دنیا وچ غربت‘ کرپشن تے لاقانونیت دی وجھا توں اے‘ دنیا وچ جتھے غربت ہے اوتھے وی زرداری تے نواز شریف ورگے لیڈرنیں۔ اپنے آپ نُوں لیڈر کہن والا بندا اداکاری کر کے باہر چلا گیا‘ نواز شریف نُوں جویں ای لندن دی ہوا لگی ٹھیک ہو گیا‘ نواز شریف نے ایہو جہیا ڈراما کیتا کہ ساڈی کابینا دے سوانی ارکان رون لگے۔ ن لیگ دی ادھی قیادت ملک توں باہر اے‘ جے تہاڈا لیڈر ایماندار نہیں تے فیر ملک دے وزیر وی کرپٹ ہون گے۔ نواز شریف دا منشی ساڈی حکومت توں پہلے نَس گیا۔ ایہ لوک لوکائی دا پیسا باہر لے گئے تے ہُن ایہناں دا پوترا پولو میچ کھیڈ رہیا اے‘ لندن وچ پولو میچ بادشاہواں دا کھیڈ اے‘ کوئی ایہناں توں پُچھے کہ پوترے دے کول اینا پیسا کتھوں آیا؟ ایہ لوکائی دا پیسا اے۔ اوہناں نے ہور کہیا کہ جہڑے ملک اپنے پیراں اُتے نہیں کھلوندے اوہناں دی عزت نہیں ہوندی‘ پاکستان وچ عدلیا ازاد اے‘ عدالتاں ازاد نیں تے ایہناں سبھ لوکاں نُوں کہدا ڈر اے۔ مینوں مقابلا کرنا آندا اے تے میں لوکائی دی حمایت نال ایہناں مافیاز نُوں ہرا کے وکھاواں گا‘کمزور جیلاں وچ جان تے طاقتور این آر او لے کے باہر جا کے اپنے پوتریاں د ا پولو میچ ویکھن‘ ایہ تہاڈا پیسا اے‘ اسیں اِک عظیم قوم بننا اے‘ ایس راہ اُتے نکل چکے آں‘ ظلم دے نطام دے خلاف ساڈا جہاد اے‘ قانون دی حکمرانی لئی اسیں جنگ لڑ رہے آ ں‘ عمران خان کوئی ڈنڈیاں نال سپریم کورٹ اُتے حملا نہیں کردا‘ عمران خان کسے جج نُوں فون نہیں کردا کہ 3 نہیں 5 سال سزا دوو‘ ایتھے عدالتاں ازاد نیں‘ لاہور ہائیکورٹ نُوں تحریک انصاف کنٹرول نہیں کردی فیر ایہ ملک توں نَسے ہوئے کیوں نیں؟‘ جہڑے پرانے نظام نُوں بچانا چاہندے نیں‘ ایہناں نال ہر دن جنگ لڑ رہے آں‘ لوکائی دی مدد نال ایہناں مافیاواں نُوں ہرا کے وکھاواں گا‘ ازاد انسان کدی کسے دی غلامی نہیں کردا‘ مینوں فخر اے میں کشمیر دا کیس پوری دنیا وچ چُکیا‘ کشمیریاں لئی خُشخبری اے‘ انشاء اللہ آن والے دناں وچ اسیں مقبوضا کشمیر نُوں ازاد ویکھاں گے‘ ووٹ دین ویلے کدی دوستی‘ خاندان یاں قبیلے دا نہ سوچو‘ ایس طرحاں ساڈا ملک ترقی نہیں کرے گا‘ 25 تاریخ نُوں دوستیاں تے رشتے داریاں توں اُچّا ہونا نظریے نُوں ترجیح دینی پوے گی۔