پاکستان وچ کرونا وائرس دی چوتھی لہر دے دوران کیسز وچ وادھا،مثبت کیساں دی شرح 5.34 ہو گئی ……٭رویل خبر٭

اسلام آباد (نیوز ڈیسک) پاکستان وچ کرونا وائرس دی چوتھی لہر دے دوران کیسز وچ مسلسل وادھا ہون لگا‘ مثبت کیساں دی شرح ساڈھے 5 فیصد دے نیڑے ہو گئی۔ نیشنل کمانڈ اینڈ اپریشن سینٹر دے آنکڑیاں دے مطابق پاکستان وچ 24 گھنٹیاں دے دوران کرونا وائرس دے ہور 2 ہزار 607 کیسز ساہمنے آئے نیں جد کہ ہور 21 بندے ایس خطرناک وباء دے ساہمنے زندگی دی بازی ہار گئے‘ کرونا دے ہور 834 روگی شفا یاب ہو گئے‘ مثبت کیساں دی شرح 5.34 ہو گئی اے۔ پورے پاکستان وچ کرونا وائرس دے ہُن تک 22 ہزار 781 روگی انتقال کر چکے نیں‘ ایس خطرناک وائرس دے کل روگیاں دی گنتی 9 لکھ 89 ہزار 275 ہو چکی اے۔ پورے ملک وچ ہسپتالاں‘ اکلاپا سینٹرز‘ وینٹی لیٹرز تے گھراں وچ کرونا وائرس دے 47 ہزار 331 روگی علاج ہیٹھ نیں‘ جہناں وِچوں 2 ہزار 508 روگیاں دی حالت ماڑی اے‘ 9 لکھ 19 ہزار 163 روگی ہُن تک ایس بیماری توں شفا یاب ہو چکے نیں۔ پاکستان وچ پچھلے 24 گھنٹیاں دے دوران 5 لکھ 13 ہزار 82 بندیاں نُوں کرونا وائرس دی ویکسین لائی گئی۔ ہُن تک کل 2 کروڑ 27 لکھ 35 ہزار 993 کرونا ویکسین دیاں خوراکاں دِتیاں جا چُکیاں نیں۔