گرمیاں وچ گیس دی لوڈشیڈنگ بد انتظامی دی انتہا سبھ پی ٹی آئی دی ہوس دا خمیازا اے:شہباز شریف ……٭رویل خبر٭

لاہور (نمایندا رویل) پاکستان مسلم لیگ (ن) دے صدر تے قائد حزب اختلاف شہباز شریف نے کہیا اے کہ پی ٹی آئی دی ہوس دا خمیازا صنعت تے سی این جی مالکان نُوں ارباں رُپئے دے نقصان دی صورت وچ بھگتنا پے رہیا اے۔ شہباز شریف نے ملک وچ صنعتاں تے سی این جی دے شعبے نُوں گیس دی فراہمی دی مکمل بندش اُتے تشویش دا اظہار کردیاں ہویاں کہیا اے کہ پچھلے مہینے توں بجلی تے گیس دی لا متناہی لوڈشیڈنگ افسوسناک سلسلا جاری اے‘ گرمیاں وچ گیس دی لوڈشیڈنگ ہو رہی اے جو بد انتظامی دی انتہا اے‘ ملک وچ وادھو بجلی موجود ہون دے باوجود بجلی دی بدترین لوڈشیڈنگ جاری اے‘ ایس توں بھیانک بد انتظامی ہور کیہ ہو سکدی اے؟۔ شہباز شریف نے کہیا کہ ویلے نے ثابت کیتا کہ پاکستان مسلم لیگ ن نے ملکی لوڑاں نُوں ساہمنے رکھدیاں ہویاں بجلی دی پیداواری صلاحیت ودھائی‘ گیس تے بجلی دی لوڈشیڈنگ دے پچھے پی ٹی آئی دی دولت کمان دی ہوس تے بدترین نا اہلی اے‘ گیس تے بجلی دی لوڈشیڈنگ دی بنیادی وجھا وزیراعظم تے ایہدی کابینا اے۔ آگو ن لیگ نے کہیا کہ مقامی صنعت تے سی این جی دے شعبے نُوں گیس دی مکمل بندش قوم لئی اِک ہور بُری خبر اے‘ ایس توں پہلے گیس بحران دا ملبا پی ٹی آئی نے ایل این جی ٹرمینل دی دو دنا بندش اُتے پایا سی‘ پی ٹی آئی دی ہوس زر دا خمیاز صنعت تے سی این جی مالکان نُوں ارباں رُپئے دے نقصان دی صورت وچ بھُگتنا پے رہیا اے‘ بدترین مہنگائی‘ بیروزگاری‘ تباہ حال معیشت وچ گیس دی لوڈشیڈنگ لوکائی دے پھٹاں اُتے لون سُٹن وانگوں اے‘ حکومت بحران اُتے قومی اسمبلی وچ بحث کروائے تاں جے ایس مسئلے دا کوئی حل نکلن نال لوکائی نُوں ریلیف ملے۔